بۇل اسا قۇندى تاريحي قۇجات قازاقستان يندۋسترياسىن جاڭا تەحنولوگيالاردى ەنگىزۋدىڭ كوشباسشىسىنا اينالدىرۋ, وندىرىستىك ۇدەرىستەردى تسيفرلاندىرۋ ارقىلى ونەركاسىپتەگى ەڭبەك ونىمدىلىگىن ارتتىرۋ, رەسۋرستىق الەۋەتتى ءتيىمدى پايدالانۋ, وندىرىسكە اقپاراتتىق تەحنولوگيالىق شەشىمدەردى باتىل ەنگىزۋ, اگروونەركاسىپ كەشەنىن جاڭا تەحنولوگيالىق دەڭگەيگە كوتەرۋ, كولىك پەن لوگيستيكالىق ينفراقۇرىلىمدى ودان ءارى دامىتۋ مىندەتتەرىن قامتيدى.
جۇرتشىلىق كوبىنە ۇلتتىق بيزنەس مۇددەسىن قورعايتىن پارتيا رەتىندە تانيتىن «اق جول» پارتياسىنىڭ وكىلدەرىن ارينە ءبىرىنشى كەزەكتە جولداۋدىڭ بيزنەسكە قاتىستى تۇستارى قىزىقتىردى. بيزنەسكە قاتىستى ەلباسىنىڭ ۇستانىمدارى سەگىزىنشى – ء«تيىمدى مەملەكەتتىك باسقارۋ» باعىتىنداعى ءىس-شارالار كەشەنىنە ەنگىزىلىپتى جانە بۇل قاعيداتتار ناقتىلىعىمەن ەرەكشەلەنىپ, مەملەكەت پەن بيزنەستىڭ اراقاتىناسىن ايقىنداپ بەرگەن.
«اق جول» پارلامەنتتىك فراكتسياسى بيزنەسكە قاتىستى ماسەلەلەردى ءماجىلىس مىنبەرىنەن ۇنەمى قوزعاپ كەلەدى. الداعى ۋاقىتتا دا اقجولدىقتار ءۇشىن پرەزيدەنتتىڭ ادال باسەكەلەستىكتى, وتاندىق كاسىپكەرلەردى قولداۋعا جانە جالپى نارىقتىق رەفورمالاردى دامىتۋعا باعىتتالعان تاپسىرمالارى باسىم باعىت بولىپ سانالادى.
جولداۋدىڭ ادام كاپيتالىنا قاتىستى ءبولىمىن وقىعان كەزدە دەنساۋلىق پەن ءبىلىم سالاسىنا پرەزيدەنتتىڭ ءجىتى كوڭىل بولگەنىن بايقادىق. ماسەلەن, جولداۋدا ناقتىلانعان تاپسىرما اياسىندا مەملەكەتتىڭ كەپىلدىگىمەن مەديتسينالىق تەگىن كومەكتى ۇيىمداستىرۋدىڭ جاڭا ۇلگىسى جوسپارلانۋدا. ەلباسى ازاماتتارىمىزدىڭ بارلىق بۋىندارىن قامتيتىن ءبىلىم بەرۋ سالاسىنىڭ كوكجيەكتەرىن ناقتى بەلگىلەگەن, سونداي-اق بۇل تاريحي قۇجات ۇلتتىق سانانى جاڭعىرتۋ قاعيداتتارىن ودان ءارى جۇيەلى جۇرگىزۋگە ۇمتىلدىرادى. جولداۋدا «ۇلتتىڭ الەۋەتىن ارتتىرۋ ءۇشىن مادەنيەتىمىز بەن يدەولوگيامىزدى ودان ءارى دامىتۋىمىز كەرەك. «رۋحاني جاڭعىرۋدىڭ» ءمان-ماڭىزى دا ناق وسىندا. ءوزىنىڭ تاريحىن, ءتىلىن, مادەنيەتىن بىلەتىن, سونداي-اق زامانىنا لايىق, شەت تىلدەرىن مەڭگەرگەن, وزىق ءارى جاhاندىق كوزقاراسى بار قازاقستاندىق ءبىزدىڭ قوعامىمىزدىڭ يدەالىنا اينالۋعا ءتيىس», دەپ ايرىقشا اتاپ كورسەتىلگەن, پرەزيدەنت وسكەلەڭ ۇرپاقتىڭ حالقىمىزدىڭ, تاۋەلسىزدىكتىڭ تاريحىن ءبىلۋ كەرەكتىگىن تاعى ءبىر رەت قاداپ تۇرىپ ايتىپ, ەسكە سالعان.
بىلتىر تاريحىمىزدىڭ قاسيەتتى دە قايعىلى, سونىمەن قوسا داڭقتى ءبىر بولشەگى – الاش ۇلت-ازاتتىق قوزعالىسىنىڭ 100 جىلدىعى ەل اۋماعىندا كەڭىنەن اتاپ ءوتىلدى. قاراشا ايىندا استانادا وتكەن «رۋحاني جاڭعىرۋ الاش جانە ازاتتىق يدەياسىنىڭ ساباقتاستىعى» اتتى حالىقارالىق عىلىمي-تاجىريبەلىك كونفەرەنتسياسىنىڭ قاتىسۋشىلارىنا جولداعان قۇتتىقتاۋىندا ەلباسى الاش قوزعالىسىنىڭ سيپاتىنا «الاش قوزعالىسىنىڭ حح عاسىردىڭ باسىنداعى قازاق حالقىنىڭ ساياسي-الەۋمەتتىك قۇقىقتارىن قورعاۋ, ۇلتتىق بەت-بەينەسىن ساقتاپ قالۋ جولىنداعى كۇرەسى, ازاتتىق ءۇشىن كۇرەستىڭ جارقىن بەتى بولىپ تابىلادى» دەپ باعا بەردى. ەندەشە, الاش تاقىرىبى مەرەيتويلىق ءىس-شارالارمەن ءتامامدالىپ, كۇن تارتىبىنەن ءتۇسىپ قالماۋى ءتيىس. ماسەلەن, بيىل الاشتىڭ اقيىق اقىنى ماعجان جۇماباەۆتىڭ تۋعانىنا 125 جىل. وسىعان وراي وتكەن جىلدىڭ سوڭىندا «اق جول» پارتياسىنىڭ پارلامەنتتىك فراكتسياسى دەپۋتاتتىق ساۋال جولداپ, رەسپۋبليكا كولەمىندە ماعجان وقۋلارىن وتكىزۋدى ۇسىندى. ساۋالدا «الاشتىڭ ماعىناسى ونىڭ ءبىر عانا ءجۇز جىلدىعىمەن شەكتەلمەيدى. ءبىرتۋار تۇلعا ماعجان اقىننىڭ اماناتىن اقتاۋىمىز ءۇشىن الاشتىڭ 100 جىلدىق مەرەيتويى ماعجان وقۋلارىمەن جالعاسىن تاپسا دەگەن ۇسىنىسىمىزدى مادەنيەت مينيسترلىگىنە جولدايمىز. ماعجان وقۋلارى بۇكىل رەسپۋبليكا اۋماعىندا وتكىزىلىپ, ال ونىڭ قورىتىندىسى ماعجان جۇماباەۆتىڭ تۋعان ولكەسى قىزىلجار وڭىرىندە جاسالعانى ءجون. ال بولاشاقتا ماعجان وقۋلارى, اتاۋلى داتالاردا عانا ەمەس, جىل سايىن تۇراقتى وتكىزىپ تۇرسا نۇر ۇستىنە نۇر بولار ەدى» دەلىنگەن.
ايتا كەتەيىك, بۇل ساۋالعا وڭ جاۋاپ الىندى. اتالعان مينيسترلىك «دارىن» رەسپۋبليكالىق عىلىمي-پراكتيكالىق ورتالىعىمەن بىرلەسە وتىرىپ, «ماعجان وقۋلارىن» ۇيىمداستىرۋ بويىنشا جەرگىلىكتى اتقارۋشى ورگاندارمەن جۇمىس جۇرگىزىپ جاتقانىن حابارلادى. اتاپ ايتقاندا, الاش اقىنىنىڭ وقۋلارى ونىڭ تۋعان جەرى – سولتۇستىك قازاقستان وبلىسىنان باستاۋ الىپ, اقىننىڭ مەرەيتويى اياسىندا دوڭگەلەك ۇستەلدەر, شىعارماشىلىق كەشتەر, عىلىمي كونفەرەنتسيالار, كىتاپ كورمەلەرى ۇيىمداستىرىلماق. بىزدىڭشە, رۋحاني جاڭعىرۋ دەگەنىمىزگە ەلىمىزدىڭ تاۋەلسىزدىگى ءۇشىن كۇرەسكەن تاريحي تۇلعالاردىڭ ەڭبەكتەرى مەن ونەگەلى ىستەرىن كوپكە دارىپتەۋ دە كىرەدى.
ويتكەنى اتا-بابالارىمىز عاسىرلار بويى اڭساعان ازاتتىق, تاۋەلسىزدىك جولىندا جاندارىن قۇربان ەتكەن الاش ارىستارىنىڭ ەسىمدەرى دە حالىق جادىندا ساقتالىپ, ارتىندا قالعان مۇرالارى تۋعان حالقىنىڭ جۇرەگىنە جەتە بەرۋى ءتيىس جانە ونى بۇگىنگى تاۋەلسىز قازاقستان جونىندەگى ەلباسىمىزدىڭ وي-تۇجىرىمدارىمەن ساباقتاستىرىپ ناسيحاتتاۋدى كۇشەيتىپ, بۇگىنگى زاماننىڭ كادەسىنە جاراتۋ قاجەت دەپ سانايمىز.
ءسابيت بايدالى,
«اق جول» پارتياسى
ورتالىق كەڭەسىنىڭ حاتشىسى
