2-4 اقپان كۇندەرى ەلىمىزدىڭ تەننيسشى جىگىتتەرى ازۋىن ايعا بىلەگەن شۆەيتساريا قۇراماسىن جەڭىپ, وتان ابىرويىن تاعى ءبىر مارتە اسقاقتاتتى.
شۆەيتساريا قۇراماسى استاناعا ءوز ەلىنىڭ ءھام الەمنىڭ ۇزدىك تەننيسشىلەرىنىڭ ءبىرى جانە بىرەگەيى رودجەر فەدەرەر مەن ستەن ۆاۆرينكانى اكەلمەسە دە حالىقارالىق تۋرنيرلەردە ابدەن ىسىلعان, تاجىريبەلى ويىنشىلارىمەن كەلگەن-ءدى. سپورتشىلارىمىز وزگە ەلدىڭ قۇرامالارى سەكىلدى قازاقستاننىڭ دا الەمدىك دەڭگەيدە ويناي الاتىنىن دالەلدەپ بەردى.
ءدال وسى ءتۋرنيردىڭ 2010 جىلعى باسەكەسىنىڭ پلەي-وفف كەزەڭىندە شۆەيتساريانى ۆاۆرينكا سەكىلدى ۇزدىك تەننيسشىسى ويناعان كەزدە دە 5:0 ەسەبىمەن تاس-تالقان ەتىپ ۇتقانىمىزدى جانكۇيەرلەر ءالى ۇمىتا قويماعان شىعار. سول جىلى رودجەر فەدەرەردىڭ وتانداستارىن جەڭىپ قانا قويماي, دەۆيس كۋبوگىنىڭ الەمدىك توبىنا شىققان ەدىك. مىنە, ارادا سەگىز جىل وتكەندە ازۋلى قارسىلاسىمىزدى تاعى دا جەڭىپ, الەمدىك سىننىڭ شيرەك فينالىنا جولداما الىپ وتىرمىز.
قازاقستان سپورتشىلارىنا بۇل جەڭىس وڭاي كەلگەن جوق. تاۋەلسىزدىك العاننان بەرى ەلباسىنىڭ ءاردايىم سپورتقا كوڭىل ءبولۋىنىڭ, ۇدايى قولداۋ كورسەتىپ كەلە جاتقانىنىڭ ارقاسىندا وعلاندارىمىز وسىنداي ايتۋلى جەڭىسكە جەتىپ وتىر.
سونداي-اق سلوۆەنيادا فۋتزالدان ەۋروپا چەمپيوناتىنىڭ «ۆ» توبىندا سىنعا ءتۇسىپ جاتقان قازاقستان قۇراماسىنىڭ فۋتزالشىلارى ءوز توبىندا ءبىرىنشى ورىنمەن شيرەك فينالعا شىقتى. بۇل 2016 جىلعى بىرىنشىلىكتەگى ناتيجەمىزدى جاقسارتۋعا تاعى ءبىر تاماشا مۇمكىندىك. ەكى جىل بۇرىن وتانداستارىمىز ءۇشىنشى ورىن يەلەنگەن بولاتىن.
ءسويتىپ بۇل ساڭلاقتارىمىز تورگە وزعان كۇن بولدى.
ءالي بيتورە,
«ەگەمەن قازاقستان»
