يران يسلام رەسپۋبليكاسىنىڭ زاڭىنا سايكەس, ايەلدەر ەرلەردەن بولەك جەكە سايىسقا ءتۇسۋى قاجەت. سوندىقتان تاڭەرتەڭنەن تۇسكە دەيىن ايەلدەر, ودان كەيىن ەرلەر اراسىنداعى جارىستار ءوتىپ جاتىر.
بۇگىن, 2 اقپان كۇنى تاڭەرتەڭگى باعدارلامادا قىزدارىمىز باپكەرلەر شتابىنىڭ سەنىمىن اقتادى. فينالدا ونەر كورسەتكەن 6 سپورتشىنىڭ بەسەۋى جۇلدەگە ىلىكتى. ونىڭ ىشىندە ۇشەۋى التىن.
400 مەترگە جۇگىرگەن سۆەتلانا گولەندوۆا (جامبىل وبلىسى) مەن ەلينا ميحينا (شقو) التىن مەن كۇمىستى ءوزارا ءبولىستى. 24 جاستاعى گولەندوۆا مارەگە 53.28 سەكۋندتا جەتتى. ەلينا ميحينا ءوز كەزەگىندە 53.49 سەكۋندپەن كۇمىس جۇلدەگە قول جەتكىزدى. قولا جۇلدە شري-لانكا سپورتشىسىنا بۇيىردى.
ال 60 مەترگە توسقاۋىلدار ارقىلى جۇگىرگەن ايگەرىم شىنازبەكوۆا قازاق قىزدارى اراسىنان العاش بولىپ, جەڭىل اتلەتيكادان جابىق كەشەندەگى ازيا چەمپيوناتىنىڭ جەڭىمپازى اتاندى. ايگەرىم تەگراندا اتالعان قاشىقتىقتى 8.32 سەكۋندتا جۇگىردى.
ءۇشىنشى التىنعا سىرىقپەن سەكىرۋشى اناستاسيا ەرماكوۆا يە بولدى.17 جاستاعى سپورتشى تەگەراندا 3.70 مەترگە سەكىرىپ, سونىڭ ارقاسىندا چەمپيون اتاندى. ەكىنشى ورىنداعى يران سپورتشىسى 20 سانتيمەترگە قالىپ قويدى.
اناستاسيا بۇعان دەيىن 10 قاڭتاردا وسكەمەندە وتكەن قازاقستان كۋبوگىندا 3.81 مەترگە سەكىىپ, جاستار اراسىنداعى قازاقستان رەكوردىن جاڭارتقان ەدى.
تاعى ءبىر كۇمىس 60 مەترگە جۇگىرگەن ۆيكتوريا زيابكيناعا بۇيىردى. الماتىلىق 25 جاستاعى اتلەت فينالدا 7.39 سەكۋندپەن مارەگە ەكىنشى كەلدى. باس جۇلدە قىتاي قىزى ليان سياوچجيعا (7,20) بۇيىردى. ايتپاقشى, قىتاي سپورتشىسى جابىق كەشەندەگى ازيا چەمپيوناتىنىڭ رەكوردىن جاڭارتتى. ول رەكورد بۇعان دەيىن ۆيكتوريا زيابكيناعا تيەسىلى بولاتىن. ۆيكتوريا 2016 جىلى دوحادا ءدال وسى قاشىقتىقتى 7.27 سەكۋندتا جۇگىرگەن ەدى.
وكىنىشكە قاراي, ريما كاشافۋتدينوۆا فينالدا جوعارى ناتيجە كورسەتە المادى. قاراعاندى وبلىسىنىڭ اتلەتى 7.50 سەكۋندپەن بەسىنشى ورىندى قاناعات تۇتتى. ريما ەڭ بولماسا كەشەگى ىرىكتەۋ كەزەڭىندەگى ناتيجەسىن قايتالاعاندا قولا جۇلدەگە يە بولار ەدى...
ايتا كەتەيىك, قازاقستان سپورتشىلارى جابىق كەشەندەگى ازيا چەمپيوناتىنان ازىرگە 5 التىن, 2 كۇمىس, 1 قولا مەدال جەڭىپ الدى. جالپى كوماندالىق ەسەپتە ءبىرىنشى ورىندا كەلەمىز
