«قۇرمەتتى فورۋم قاتىسۋشىلارى, «جاھاندانۋ داۋىرىندەگى تسيفرلىق كۇن ءتارتىبى» فورۋمىنا قوش كەلدىڭىزدەر. الەمدە جىلدام ءارى تۇبەگەيلى تەحنولوگيالىق وزگەرىستەر ءداۋىرى باستالدى.
ءتيىمدى تسيفرلاندىرۋ شارالارى ۇلتتىق ەكونوميكانىڭ قارقىندى دامۋى مەن حالىقتىڭ ءومىر ءسۇرۋ ساپاسىن ارتتىرۋدىڭ نەگىزگى فاكتورىنا اينالۋدا. الەمنىڭ وزىق ەلدەرى, ولاردىڭ G-20 جانە ەۋروپالىق وداق سەكىلدى بىرلەستىكتەرى وزدەرىنىڭ تسيفرلاندىرۋ بويىنشا ستراتەگيالىق قۇجاتتارىن قابىلدادى. ءبىزدىڭ ەۋرازيالىق ەكونوميكالىق وداق تا 2025 جىلعا دەيىنگى تسيفرلىق كۇن ءتارتىبىن قابىلدادى.
بۇگىنگى فورۋم اتالعان كۇن ءتارتىبىن ىسكە اسىرۋدىڭ ماڭىزدى قادامى. ورتاق نارىقتىڭ بولۋى تسيفرلاندىرۋ ماسەلەلەرىندە بىرلەسكەن تاسىلدەر مەن شارالاردى ازىرلەۋدى تالاپ ەتەدى. كۇشتەردى جۇمىلدىرۋ ەۋرازەق-تىڭ تۇتاستاي جانە ءار ەلدىڭ جەكەلەي دامۋى ءۇشىن سينەرگەتيكالىق تيىمدىلىكتى قامتاماسىز ەتەدى. بۇل ءىس-شارا قاجەتتى شەشىمدەردى ازىرلەۋگە جانە ىنتىماقتاستىقتى نىعايتۋعا ىقپال ەتەتىنىنە سەنىمدىمىن. فورۋمنىڭ بارلىق قاتىسۋشىسىنا جەمىستى ەڭبەك جانە العا قويىلعان ماقساتتارىنا قول جەتكىزۋدى تىلەيمىن», — دەلىنگەن مەملەكەت باسشىسى ن. نازارباەۆتىڭ حاتىندا.
باقىتجان ساعىنتاەۆ بايانداماسىندا تسيفرلىق كۇن تارتىبىنە بايلانىستى قازاقستان تاراپىنان اتقارىلىپ جاتقان جۇمىستارمەن ءبولىستى. ء«بىز تسيفرلىق كۇن تارتىبىندە وسىمەن ەكىنشى جىل ءومىر ءسۇرىپ جاتىرمىز. قازاقستان ەلەكتروندى قىزمەت كورسەتۋدى 10 جىل بۇرىن باستادى. ءبىزدىڭ ماقساتىمىز - مەملەكەتتىك قىزمەتتەردىڭ 80 پايىزىن ەلەكتروندى فورماتقا كوشىرۋ. ينفراقۇرىلىم ءۇشىن قازاقستان اۋماعى وتە ۇلكەن. ءبىز اۋىلداردى كەڭ جولاقتى ينتەرنەتپەن قامتاماسىز ەتۋدى 2020 جىلعا دەيىن اياقتاۋدى جوسپارلاپ وتىرمىز. حالىقتى تسيفرلىق قىزمەت تۇرىنە تارتۋ كەرەك, ونى قولدانۋ سانگە اينالۋى كەرەك. ءبىز مەكتەپ قابىرعاسىنان ماتەماتيكتەر مەن باعدارلاماشىلاردى ازىرلەپ, جوعارى وقۋ ورىندارىن وسى سالاعا باعىتتاپ جاتىرمىز. يننوۆاتسيا كەرەك, سول ءۇشىن ءبىز شەتەلدىك ارىپتەستەرمەن قارىم-قاتىناس ورناتامىز, اسىرەسە تسيفرلاندىرۋ ماسەلەسىندە بىرگە ارەكەت ەتۋ ماڭىزدى. ءسوز جوق, ءار مەملەكەت وزىنشە داميدى, دەگەنمەن, ەڭ ماڭىزدىسى - فورۋمنان كەيىن تسيفرلاندىرۋ سالاسىندا ىنتىماقتاسا الۋىمىزدا بولىپ وتىر», - دەدى باقىتجان ساعىنتاەۆ.
بايانداماسىندا پرەمەر-مينيستر ەلىمىزدە تەحنولوگيالىق كاسىپكەرلىككە جاعداي جاسالىپ وتىرعانىن ايتتى. «ەكسپو اۋماعىندا IT-حاب جۇمىسىن جارتى جىلدان كەيىن ىسكە قوسامىز. ول تۋرالى شەشىم قابىلداندى, زاڭ شىعارىلدى. اعىلشىن قۇقىعىنداعى استانا حالىقارالىق قارجى ورتالىعى تۋرالى كونسيتۋتسيالىق زاڭ قابىلداندى, ءبىزدىڭ IT-حاب وسى ورتالىققا قوسىلدى. ءبىز وعان الەمنىڭ دارىندى ادامدارىن تارتقىمىز كەلەدى. سونىمەن قاتار, ءبىز كيبەرقاۋىپسىزدىك تۋرالى ۇمىتپاۋىمىز كەرەك. ەاەو ماسەلەسىنە كەلگەندە ءبىز كەلىسىمدى ازىرلەۋ بارىسىندا ەكونوميكا قۇرۋ سالاسىندا عانا ينتەگراتسيا ورناتۋعا كەلىسكەنبىز. بىراق, ۋاقىت وتە كەلە ءبىز شەكارالاردىڭ اشىقتىعانا جەتەمىز, سەبەبى, تسيفرلىق پلاتفورمادا شەكتەۋ, شەكارا دەگەن جوق, وسى وي مەنى ءجيى مازالايدى», - دەدى ب.ساعىنتاەۆ.
ايتا كەتەيىك, فورۋم قازاقستان پرەزيدەنتى نۇرسۇلتان نازارباەۆتىڭ باستاماسىمەن ۇيىمداستىرىلىپ وتىر. فورۋم جۇمىسىنا ارمەنيا, بەلارۋس, قازاقستان, قىرعىزستان, رەسەي, وزبەكستان جانە تاجىكستاننىڭ پرەمەر-مينيسترلەرى, سونداي-اق حالىقارالىق بىرقاتار IT كومپانيالاردىڭ وكىلدەرى قاتىسۋدا.
