اتىراۋ وبلىسىنىڭ اكىمى نۇرلان نوعاەۆ قۇرمانعازى اۋدانىنا بارعان جۇمىس ساپارىندا ايماقتاعى بالىق شارۋاشىلىعى پروبلەمالارىنا ارنالعان كوشپەلى جينالىس وتكىزدى. وعان مەملەكەتتىك ورگاندار مەن قۇقىق قورعاۋ سالاسىنىڭ وكىلدەرى, وندىرىستىك كووپەراتيۆتەردىڭ باسشىلارى قاتىستى. جينالىستىڭ نەگىزگى تاقىرىبى بالىق شارۋاشىلىعىن رەتتەۋ, زاڭسىز بالىق اۋلاۋشىلارمەن كۇرەس توڭىرەگىندە ءوربىدى.
بالىق قورىن ساقتاۋ ماقساتىندا قازاق ۇلتتىق بالىق شارۋاشىلىعى ينستيتۋتىنىڭ وكىلدەرى سۋ ايدىنىنىڭ, تەڭىزدىڭ ەكى جاعىنان دا ساعاسىنان 50 شاقىرىم اۋماقتا جانە ءۇش مەتردەن تومەن تەرەڭدىكتەن كاسىپشىلىك بالىق اۋلاۋدى شەكتەۋدى ۇسىندى. «امانگەلدى» وك باسشىسى سانات تىلەپبەرگەنوۆتىڭ ايتۋىنشا, قازىرگى قولدانىستاعى جۇيەمەن بالىق اۋلاۋدى جالعاستىرا بەرسە, ەندى ءبىراز ۋاقىتتان كەيىن ايماقتاعى بالىق قورى ازايىپ كەتەدى.
-ءبىزدىڭ كووپەراتيۆ وتكەن جىلدان بەرى تەڭىزدەن كاسىپشىلىك بالىق اۋلاپ جاتىر. ءۇش مەتردەن اساتىن تەرەڭدىك الىس ەمەس, بۇل پروبلەما دا ەمەس. ارينە ول ءۇشىن جابدىقتالعان فلوت, كەمەلەر كەرەك, ەسەسىنە ناتيجەسى دە جاقسى بولادى. ءتورت بالىقشىمىز 132 توننا بالىق اۋلادى. تەڭىزدە بالىق بار, - دەدى سانات تىلەپبەرگەنوۆ.
ايتا كەتەيىك, سوڭعى بەس جىلدا كاسىپشىلىك بالىق اۋلاۋعا بەرىلەتىن ليميت ەكى ەسەگە ازايىپ, 25 مىڭ توننادان 12,5 مىڭ تونناعا دەيىن ءتۇستى. سولاي بولا تۇرا, وسى جىلدار ارالىعىندا بەلگىلەنگەن ليميت بىردە ءبىر رەت تولىعىمەن يگەرىلگەن جوق.
-ءبىز ءليميتتى جايدان-جاي ازايتقانىمىز جوق, بالىق اۋلايتىن كووپەراتيۆتەر يگەرە المايدى, بالىقتى براكونەرلەردەن قابىلداپ ءجۇر. بۇل ماسەلەنى شەشۋ ءۇشىن سالاعا زاڭدى ءتارتىپ ەنگىزۋ كەرەك. زاڭسىز بالىق اۋلاۋشىلاردى توقتاتىپ, ادال بالىقشىلار ءۇشىن جاعداي جاساۋعا ءتيىسپىز, - دەدى نۇرلان نوعاەۆ.
ايماق باسشىسى بارلىق ۇسىنىستاردى قاراپ, ماماندار مەن بالىقشىلاردىڭ وڭىردە بالىق قورىن ساقتاۋ جونىندەگى پىكىرلەرىن ەسەپكە الۋدى تاپسىردى.
وتكەن جىلى اتالعان سالاداعى وندىرىلگەن ءونىم كولەمى 9,8 توننا بولدى. بالىق ونىمدەرىن ەكسپورتتاۋ كورسەتكىشى 240 تونناعا ارتىپ, 8 374 تونناعا جەتتى.
وبلىستىق اۋىل شارۋاشىلىعى جانە ۆەتەريناريا باسقارماسىنىڭ باسشىسى ەربولات قاديموۆ 2017 جىلى رەسەيگە 6,2 مىڭ توننا بالىق ەكسپورتتالعانىن ايتتى, ال 1 895 توننا بالىق جاقىن شەتەلدەرگە, ۋكراينا, وزبەكستان مەن گرۋزياعا جىبەرىلگەن. 187 توننا گەرمانيا, پولشا, فرانتسيا سەكىلدى باسقا دا ەۋروپا ەلدەرىنە ەكسپورتتالعان.
