باعدارلاماشى مامان مەيىرحات تولقىنوۆتىڭ باستاماسىمەن قولعا الىنعان تسيفرلى جوبا «جەتىسۋ-360» دەپ اتالادى. «تسيفرلى باعدارلامانى قولدانا وتىرىپ, جەلىگە جۇكتەلگەن سۋرەتتەردى بارلىق قىرىنان, ياعني 360 گرادۋستا كورۋگە بولادى. جوبانىڭ اتاۋىن وسىدان الدىق. الەمدىك تەحنولوگيا كۇن سايىن جاڭارۋدا, بۇرىن 3D فورماتىنداعى كورىنىستەردى ارنايى قۇرىلعىنىڭ كومەگىمەن عانا كورۋگە بولاتىن ەدى عوي, قازىرگى مۇمكىندىكتى يگەرىپ ۇلگەرۋ كەرەك. ءبىزدىڭ 3d-Tour.kz سايتىنا كىرىپ, جەتىسۋ ولكەسىندەگى مۋزەيلەردىڭ قۇندى جادىگەرلەرىمەن تانىسۋ وڭاي ءارى قىزىقتى. كەز كەلگەن سمارتفوننان, ينتەرنەتكە شىعاتىن مۇمكىندىگىڭىز بولسا جەتكىلىكتى, تۇتاس تاريحتى كوز الدىڭىزعا اكەلەمىز», دەيدى جوبا اۆتورى.
قازىر كۇنى بۇل جوبا بويىنشا مۇحامەدجان تىنىشباەۆ جانە ءىلياس جانسۇگىروۆ اتىنداعى مۋزەيلەرگە ۆيرتۋالدى ساياحات جاساۋ مۇمكىندىگى بار. مۇحامەدجان تىنىشباەۆ اتىنداعى مۋزەيدە ساقتاۋلى تۇرعان 27 454 ەكسپونات 3D فورماتىنا كوشىرىلسە, ءىلياس جانسۇگىروۆ اتىنداعى مۇراجايدىڭ 6 مىڭعا جۋىق جادىگەرىن دە ءار قىرىنان, ءتۇرلى-ءتۇستى بەينەدە تاماشالاۋعا بولادى.
ايتپاقشى, 26 جاستاعى كاسىبي فوتوگراف ءارى IT مامانى مەيىرحات تولقىنوۆ جەتىسۋ وڭىرىندەگى ۇلكەندى-كىشىلى مۋزەيلەردى 3D فورماتىنا كوشىرۋدى ارماندايدى. ول قازىر وڭىرلىك كوممۋنيكاتسيالار قىزمەتىندەگى جۇمىسىن وسى باعىتپەن ۇشتاستىرۋدا.
«وبلىستا 22 مۋزەي بار, بارلىعىمەن جۇمىس ىستەۋگە دايىنمىن. ءاربىر ەكسپونات تاريحي جادىگەر بولعاندىقتان, ادامدار ءۇشىن قولجەتىمدى ءارى ساپالى بولۋى كەرەك. وسىعان ۇلەسىمدى قوسقىم كەلەدى. بارلىق مۋزەيگە ۆيرتۋالدى ساياحات جاساپ, مۇراعاتاردى 3D فورماتىندا جاساپ, VR كوزىلدىرىگىمەن دە كورۋگە بولاتىنداي ەتىپ جاساپ شىعامىن...», دەيدى مەيىرحات.
قالماحانبەت مۇقامەتقالي,
«ەگەمەن قازاقستان»
الماتى وبلىسى
