وعان ارنايى كەلگەن پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ومىرزاق شوكەەۆ وبلىس اكىمدەرىنىڭ اۋىل شارۋاشىلىعى سالاسىنا جەتەكشىلىك جاسايتىن ورىنباسارلارى جانە وڭىرلەردەگى ءىرى اگروونەركاسىپ كەشەنىنىڭ جەتەكشىلەرى الدىندا جولداۋداعى ءۇشىنشى مىندەتتە قويىلعان تالاپتارعا قاتىستى الداعى كەزدە اتقارىلاتىن ىستەر جونىندە ەگجەي-تەگجەيلى ايتىپ بەردى. وسىعان بايلانىستى ۇكىمەتتە سالانى العا قاراي دامىتۋدىڭ باسىم باعىتتارى بەلگىلەنگەن. ءبىزدىڭ قازىرگى ءىس-قيمىلىمىز وسى باعىتتار بويىنشا جۇيەلى جۇمىس جۇرگىزۋگە باعىتتالۋى ءتيىس, دەپ اتاپ كورسەتتى ءو.شوكەەۆ.
وڭىرگە ەكى كۇندىك جۇمىس ساپارى كەزىندە سالا باسشىسى مۇنداعى اگروونەركاسىپ كەشەنىنىڭ جاي-كۇيىمەن جانە وسى باعىتتاعى بىرقاتار نىساندارمەن تانىستى. سوندىقتان دا ول جيىندا وسى ماسەلەلەرگە بايلانىستى كوڭىلگە تۇيگەندەرىن جولداۋ تالاپتارى مەن ساباقتاستىرا وتىرىپ تۇيىندەپ بەردى. ايتالىق, ءو.شوكەەۆتىڭ مالىمدەۋىنشە, ايماقتاعى «اكتەپ», «ايس» جانە «اقتوبە ەت كلاستەرى» جشس سەكىلدى وڭدەۋشى قۇرىلىمدار ەڭبەك ونىمدىلىگىن ارتتىرۋ جونىندە وڭ ناتيجەلەرگە قول جەتكىزە بىلگەن. العاشقى اتالعان نىساندا اگروكلاستەر قۇرۋ ءىسىنىڭ قۇپتارلىق كورىنىستەرى بار ەكەنى دە سالا باسشىسىنىڭ وڭ باعاسىنا يە بولدى. وسىنداي تاجىريبەلەردەن ۇيرەنىپ, ونى ءارى قاراي دامىتا بەرۋدىڭ تيىمدىلىگى مول, دەدى ول.
ءو.شوكەەۆتىڭ وڭىرگە ساپارى بارىسىندا ەت كلاستەرىن دامىتۋدىڭ جانە ەت ەكسپورتى كولەمىن ودان ءارى ۇلعايتۋدىڭ تولعاعى جەتكەن ماسەلەلەرى تالقىلاندى. بۇعان ەڭ قاجەتتى العىشارتتىڭ ءبىرى – كولىك-لوگيستيكا ينفراقۇرىلىمىن دامىتۋ. ءبىز ەجەلدەن مال وسىرگەن, وسى سالانىڭ جاي-كۇيىن جەتىك بىلەتىن حالىقتىڭ ۇرپاعىمىز. قازىرگى قازاقتىڭ ۇلان-بايتاق دالاسى مەن قۇنارلى جەرى جايىلىمدىق مال شارۋاشىلىعىن دامىتۋعا وتە ىڭعايلى. سولاي بولا تۇرا مال, سونىڭ ىشىندە ءىرى قارا مالىنىڭ ونىمدەرى بىزگە يمپورتتىق جولمەن كەلۋى قانشالىقتى ءتيىمدى. ونىڭ ىشىندە ەكسپورتتىق مال ونىمدەرىن, سونىڭ ىشىندە سيىر ەتى ەكسپورتىن ۇلعايتا تۇسكەنىمىز ءجون ەمەس پە. پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ءو.شوكەەۆتىڭ قاتىسۋىمەن وتكىزىلگەن «اقىلدى تەحنولوگيالار – اگرونەركاسىپ كەشەنىن قارقىندى دامىتۋ مۇمكىندىگى» اتتى رەسپۋبليكالىق سەمينارعا قاتىسۋشىلار وسى ماسەلەلەر توڭىرەگىندە دە جان-جاقتى وي-پىكىرلەر الماستى.
رەسپۋبليكالىق سەميناردا اقتوبە وبلىسىنىڭ اكىمى ب.ساپارباەۆ اگروونەركاسىپ كەشەنىن وركەندەتۋ ىسىنە تۇتاستاي ەل وڭىرىندە جانە وبلىستا اتقارىلۋعا ءتيىستى كەيبىر ماسەلەلەرگە توقتالدى. ونىڭ ءبىرىنشىسى فەرمەرلەر مەن شاعىن اۋىلشارۋاشىلىق ءونىمىن وندىرۋشىلەرگە قىزمەت كورسەتەتىن بىرىڭعاي ورتالىق قۇرۋ بولىپ تابىلادى. مۇنداي جاعدايدا ارتىق شىعىندار ازايىپ, شاعىن اگروقۇرىلىمدار قىزمەتىنىڭ تيىمدىلىگى كوتەرىلە تۇسەدى. ولار الەكەدەي جالاڭداعان الىپساتارلار مەن دەلدالدارعا جەم بولمايدى. سونداي-اق ءوڭىر باسشىسى ەكسپورتتىق مال ونىمدەرى ۇلەسىن كوبەيتۋ ءۇشىن ءالى دە پايدالانىلماي جۇرگەن رەزەرۆتەر مەن مۇمكىندىكتەردى ىسكە قوسۋ قاجەتتىگىن ايتتى.
ساپار قورىتىندىسىندا ءو.شوكەەۆ ۇكىمەتتىڭ ەلىمىزدەگى ۇلكەن وڭدەۋشى اگروقۇرىلىمدارعا كورسەتكەن قولداۋىنىڭ كىشى شارۋاشىلىقتارعا دا كومەگى بولا الاتىنىن اتاپ ءوتتى. ايتالىق, وسى اقتوبە ايماعىندا «اكتەپ» جانە «ايس» سەكىلدى وڭدەۋشى كاسىپورىنداردىڭ قۇرامىندا بەلگىلى ءبىر جوبانى يگەرۋگە قاتىسى بار كوپتەگەن ۇساق قۇرىلىمدار بار. ءبىز وسى ىسپەتتەس قۇرىلىمداردى قولداي بىلسەك, وسى توڭىرەكتەگى ۇساق شارۋاشىلىقتار دا قولداۋدان تىس قالا المايدى. اگروكلاستەر قۇرۋ مەن وعان قاتىستى شاعىن قۇرىلىمداردى دامىتۋدىڭ باستى ءبىر تۇتقاسى دا وسى تۇستان تابىلادى, دەدى ءو.شوكەەۆ.
تەمىر قۇسايىن,
«ەگەمەن قازاقستان»
اقتوبە وبلىسى
