كورمەنىڭ باستى ماقساتى دا سول, مۋزەيگە كەلۋشى ءتۇرلى دەڭگەيدەگى مۇمكىندىگى شەكتەۋلى جانداردى جادىگەرلەرمەن جاقىنىراق تانىستىرۋ ارقىلى ولاردىڭ تانىم كوكجيەگىن كەڭەيتىپ, قازاقستاندىق جانە شەتەلدىك مادەني قۇندىلىقتاردى تاماشالاۋلارىنا جاعداي جاساۋ بولاتىن. كورمەگە كەلگەن جاستار قولونەر تۋىندىلارىمەن تانىسىپ قانا قويماي, ولاردىڭ اۆتورلارىمەن دە سۇحباتتاسىپ ۇلگەردى. وزدەرىنىڭ سۇراقتارىن قويىپ, ءمۇسىن ونەرىنە دەگەن قىزىعۋشىلىقتارىن ءبىلدىرىپ جاتتى. مۇنداي كورمەلەر مۇمكىندىگى شەكتەۋلى جانداردىڭ شىعارماشىلىق قابىلەتتەرىن ارتتىرا وتىرىپ, بوس ۋاقىتتارىن ءتيىمدى وتكىزۋلەرىنە دە ىقپال ەتەدى.
كورمەگە قويىلعان قولونەر شەبەرلەرىنىڭ, مۇسىنشىلەردىڭ, سۋرەتشىلەردىڭ ءار تۋىندىسىنان ۇلتتىق بولمىستىڭ بوياۋىن انىق اڭعارۋعا بولادى. ەرەكشە ەكسپوناتتاردى كەلۋشىلەر قولمەن ۇستاپ, ءبىلدىرىپ جاتقان پىكىرلەرىنەن ءبىز وسىنى اڭعاردىق. سونداي-اق كورمە ەكسپوزيتسياسىندا ەركىنبەك ەسىموۆتىڭ تۋىندىلارىنان بولەك يۋري بۋشترۋك, سەرگەي ساناكوەۆ سىندى قازاقستان مەن تمد-نىڭ بەلگىلى مۇسىنشىلەرىنىڭ تۋىندىلارى بار.
«بۇل ونەرمەن بالا جاسىمنان اينالىستىم. ت.جۇرگەنوۆ اتىنداعى ونەر اكادەمياسىن ءتامامداپ, قازىرگى تاڭدا ەلوردامىزدا شاكىرت تاربيەلەۋ ۇستىندەمىن. وسى ۋاقىتقا دەيىن 500-دەي ونەر تۋىندىم ەل نازارىنا ۇسىنىلدى. سونىڭ ەكەۋىن وسى مۋزەيگە سىيعا تارتتىم. ولار بۇگىن بالالار تاماشالاپ جاتقان «تاكاپپار تۇيە» جانە «اۋىل-تۇيە» دەپ اتالاتىن تۋىندىم», دەيدى ە.ەسىموۆ.
كورمەگە كەلۋشىلەردىڭ كوبىسىنىڭ ءتۇرلى دەڭگەيدەگى مۇمكىندىگى شەكتەۋلى بولعاندىقتان, وندا قويىلعان جادىگەرلەردىڭ ەتيكەتاجدارى برايل الىپبيىمەن جازىلعان. قۇلاعى ناشار ەستيتىن كەلۋشىلەر ءۇشىن ەكسكۋرسيا سۋردواۋدارما ارقىلى جۇرگىزىلدى.
ميراس اسان,
«ەگەمەن قازاقستان»
