«ەكى جارتى – ءبىر ءبۇتىن» دەگەندەي كوزى كورەتىن سامير شۇرىق-تەسىك داماسك كوشەلەرىمەن باراتىن جەرىنە جەتۋ ءۇشىن ابدۋللاعا سۇيەنسە, ونىڭ سوقىر دوسى سول كوشەلەردەگى شۇڭقىرلارعا ءتۇسىپ كەتپەۋ ءۇشىن دوسى ساميرگە سۇيەنگەن. ياعني سامير دوسىنىڭ ارقاسىنا وتىرىپ الىپ, جول كورسەتەتىن.
ءسويتىپ, ەرگەجەيلى حريستيان مەن زاعيپ مۇسىلمان ءبىرى-بىرىنە ارقا سۇيەپ, ءومىردىڭ قيىنشىلىعىنا قارسى تۇرادى. ءبىر بولمەدە تۇرىپ, بىرگە جۇمىس ىستەيدى.سال حريستيان ەسكى داماسكىنىڭ ءبىر كوفەحاناسىندا «حيكايا ايتۋشى» بولىپ ناپاقا تاپسا, زاعيپ مۇسىلمان ونىڭ قاسىندا پىسىرىلگەن بۇرشاق ساتىپ, كوپپەن بىرگە دوسىنىڭ كەرەمەت حيكايالارىن تىڭدايتىن.
ءبىر كۇنى ءدامى تاۋسىلىپ سامير قايتىس بولادى. مۇسىلمان ابدۋللا جالعىز قالادى. جانسەرىگىنەن ايىرىلعان ول قاتتى قايعىرىپ, جەر باۋىرلاپ جاتىپ قاپتى. ءبىر اپتادان سوڭ ول دا و دۇنيەلىك بولىپتى.
وسى ەكى ادامنىڭ ءومىرى جايلى ءال-ازحار ۋنيۆەرسيتەتىنىڭ كافەدرا مەڭگەرۋشىسى, ءدىندار-عالىم اتو ءاس-سىنباتي ءوزىنىڭ ءبىر ەڭبەگىندە «بۇل ەكەۋىنىڭ ءومىرى ءبىزدىڭ بارلىعىمىزعا ادام قانداي دىندە بولسىن ءبىر-بىرىنە مۇقتاج ەكەنىن راستايتىن ۇلگى» دەپ جازىپتى.
بەكەن قايرات ۇلى,
«ەگەمەن قازاقستان»
