حابارلاماعا سۇيەنسەك, قور جولداۋداعى ەڭ ماڭىزدى ءۇش مىندەتكە باسىمدىق بەرمەك. ءبىرىنشىسى, اقپاراتتىق جۇيەلەر مەن ءموبيلدى قوسىمشالاردى دامىتۋ ارقىلى مەديتسينالىق كومەكتىڭ قولجەتىمدىلىگى مەن تيىمدىلىگىن قامتاماسىز ەتۋ. ەسكە سالا كەتەيىك, بىلتىر قاراشا ايىندا قوردىڭ ءموبيلدى قوسىمشاسى ىسكە قوسىلعان بولاتىن. «مسق: حالىقتىق باقىلاۋ» دەپ اتالاتىن قوسىمشا ەلىمىزدەگى اۋرۋحانالار مەن ەمحانالار قىزمەتىن باعالاۋعا مۇمكىندىك بەرەدى. قوسىمشانى ۇيالى تەلەفونعا جۇكتەپ, كەپىلدەندىرىلگەن تەگىن مەديتسينالىق كومەك شەڭبەرىندە قىزمەت كورسەتەتىن ەمدەۋ مەكەمەلەرىنىڭ جۇمىسىنا باعا بەرۋگە بولادى. ەمحانا نەمەسە ستاتسيونار قىزمەتى دارىگەر قابىلداۋىنا كىرۋگە كەتكەن ۋاقىت, كورسەتىلگەن قىزمەت ساپاسى, دارىگەر بەرگەن ەمنىڭ تۇسىنىكتىلىگى سىندى ولشەمدەر نەگىزىندە باعالانادى. سونىمەن قاتار قوسىمشانى پايدالانۋشىلار كەز كەلگەن مەديتسينا ۇيىمى جايلى پىكىرىن ەركىن تۇردە جازىپ قالدىرا الادى. الداعى ۋاقىتتا وسى پىكىرلەر نەگىزىندە كلينيكالاردىڭ رەيتينگى جاسالادى. ال بۇل ازاماتتارعا ەلىمىزدەگى ەڭ ۇزدىك ەمحانالار مەن كلينيكالاردى تاڭداۋعا كومەكتەسپەك. «حالىقتىق باقىلاۋ» قوسىمشاسىن Android جانە iOS پلاتفورمالارىمەن جۇمىس ىستەيتىن سمارتفوندارعا ورناتۋعا بولادى. ءموبيلدى قوسىمشا ۇنەمى جاڭارتىلىپ, تولىقتىرىلىپ وتىرماق. الداعى ۋاقىتتا وعان ەمحاناعا تىركەلۋ, مەديتسينالىق قىزمەت ساپاسىن باعالاۋ, دارىگەر قابىلداۋىنا جازىلۋ سىندى فۋنكتسيااردى قوسۋ كوزدەلىپ وتىر, دەيدى قوردىڭ ءباسپاسوز قىزمەتى.
ەكىنشىسى, كەپىلدەندىرىلگەن تەگىن مەديتسينالىق كومەك كولەمىن وڭتايلاندىرۋ. جالپى, بۇل قۇجات ۇكىمەت تاراپىنان بەكىتىلەدى. ءبىز ءوز ۇسىنىستارىمىزدى ازىرلەپ وكىلەتتى ورگانعا بەرەمىز. ءبىر سوزبەن ايتقاندا, كەپىلدەندىرىلگەن تەگىن مەديتسينالىق كومەك پاكەتى قايتا قارالادى دەۋگە بولادى. بولاشاقتا مەملەكەت ءۇشىن تيىمدىلىگى تومەن ءارى شىعىنى كوپ ديسپانسەرلىك جۇيەدەن باس تارتىپ, ونىڭ ورنىنا سوزىلمالى سىرقاتتاردى قاشىقتىقتان دياگنوستيكا جاساۋ جانە امبۋلاتورلىق ەمدەۋ تاسىلدەرىن پايدالانۋ ارقىلى ەمدەۋ جۇيەسىنە كوشۋ كوزدەلىپ وتىر, دەلىنگەن حابارلامادا.
الداعى ەكى جىلدا قور كەپىلدەندىرىلگەن تەگىن مەديتسينالىق كومەك پەن الەۋمەتتىك مەديتسينالىق ساقتاندىرۋ پاكەتتەرىنە كىرەتىن قىزمەت تۇرلەرىن ىرىكتەۋمەن اينالىسپاق. ىرىكتەۋ بارىسىندا مەديتسينالىق قىزمەتتەرگە دەگەن سۇرانىس پەن ولاردىڭ تيىمدىلىگى مىندەتتى تۇردە ەسكەرىلەدى.
ۇشىنشىدەن, ستاتسيونارلىق كومەكتەن پروفيلاكتيكاعا جانە وزگە دە قىزمەت تۇرلەرىنە كوشۋ. مەملەكەت باسشىسى بيىلعى جولداۋىندا قازىرگى دەنساۋلىق ساقتاۋ جۇيەسىنىڭ باعاسى قىمبات بولىپ كەلەتىن ستاتسيونارلىق ەمگە ەمەس, اۋرۋدىڭ الدىن الۋعا دەن قويۋى كەرەكتىگىن قاداپ ايتتى. سەبەبى ەلىمىزدە ناۋقاستاردىڭ 70 پايىزى دارىگەرگە اۋرۋى ابدەن اسقىنعاننان كەيىن قارالادى. سونىڭ سالدارىنان ازاماتتاردىڭ شىعىنى مەن مەملەكەت قالتاسىنان شىعاتىن قاراجات بىرنەشە ەسە ارتادى. بۇل رەتتە بولاشاقتا ستاتسيوناردى الماستىراتىن قىزمەت تۇرلەرىن كوبەيتۋگە, سوعان باسىمدىق بەرۋگە كۇش سالىنباق. 2018 جىلدان باستاپ كەپىلدەندىرىلگەن تەگىن مەديتسينالىق كومەككە بولىنەتىن قاراجاتتىڭ 5 پايىزى وسى قىزمەت تۇرلەرىنە جۇمسالاتىن بولادى. سونىمەن قاتار پروفيلاكتيكالىق ءىس-شارالار اۋقىمىن ەداۋىر ارتتىرۋ كوزدەلىپ وتىر.
ال ءوزىن-ءوزى جۇمىسپەن قامتىعاندار مەديتسينالىق قىزمەتكە قالاي قول جەتكىزەدى؟ بيىلعى جولداۋدا حالىقتى لايىقتى الەۋمەتتىك قورعاۋ جۇيەسىن قۇرۋ جانە ساپالى جۇمىسپەن قامتۋ پروبلەماسى ايتىلعانى بەلگىلى. مەملەكەت باسشىسى بۇل ماسەلەنى شەشۋ ءۇشىن ازاماتتاردىڭ مۇمكىندىكتەرىن ارتتىرۋ قاجەتتىگىن, ءوزىن-ءوزى جۇمىسپەن قامتىعانداردى تىركەۋ ۇدەرىسىن جەڭىلدەتۋ كەرەكتىگىن ايتتى. ياعني قولايلى جاعداي جاسالسا ازاماتتار ءۇشىن مەملەكەت الدىنداعى مىندەتتەرىن قالتقىسىز ورىنداۋ ءتيىمدى بولارى ءسوزسىز.
قازىرگى ۋاقىتتا مەملەكەتتىك ورگاندار پرەزيدەنتتىڭ ءوزىن-ءوزى جۇمىسپەن قامتىعان حالىقتى ەكونوميكاعا جۇمىلدىرىپ, الەۋمەتتىك مەديتسينالىق ساقتاندىرۋ جۇيەسىنە تارتۋ تۋرالى تاپسىرماسىنا سايكەس بىرقاتار ءىس-شارالار لەگىن ازىرلەدى. اتاپ ايتساق, زاڭ اكتىلەرىندە ء«وزىن-ءوزى جۇمىسپەن قامتىعان» تۇسىنىگىن ناقتىلاۋ, ءوز كۇنىن ءوزى كورىپ جۇرگەن ازاماتتاردى مەملەكەتتىك تابىس ورگاندارىندا تىركەۋ ءتارتىبىن جەڭىلدەتۋ, ولاردان سالىق ءوندىرۋ ءتارتىبىن ايقىنداۋ, ءوزىن-ءوزى جۇمىسپەن قامتىعاندار مەن جۇمىسسىز ازاماتتاردى تىركەيتىن مەكەمەلەر قىزمەتىن تولىعىمەن تسيفرلاندىرۋ, جەرگىلىكتى اتقارۋ ورگاندارى مەن ورتالىق مەملەكەتتىك ورگانداردىڭ اقپاراتتىق جۇيەلەرىن ءبىر-بىرىمەن ىقپالداستىرۋ كوزدەلگەن. وعان قوسا, ءوزىن-ءوزى جۇمىسپەن قامتىعان ازاماتتارعا از مولشەردە جارنا تولەپ, ءمامس پاكەتىن تولىق پايدالانۋعا مۇمكىندىك بەرىلەتىنىن دە ايتا كەتكەنىمىز ءجون.
دۋمان اناش,
«ەگەمەن قازاقستان»
