كەڭەيتىلگەن وتىرىستا ءبىرىنشى بولىپ وبلىس اكىمىنىڭ ەكونوميكالىق دامۋ ماسەلەلەرى جونىندەگى ورىنباسارى اسقار بياحمەتوۆ ەسەپ بەردى. ول وبلىس اكتيۆى الدىنا شىققاننان كەيىن ءوڭىر ەكونوميكاسىنىڭ بۇگىنگى جاي-كۇيى, كەلەشەك كەلبەتى تۋرالى تالداۋلار مەن ساراپتامالار, سالىستىرۋلار جاساۋدىڭ ورنىنا, كوپشىلىككە بۇرىننان بەلگىلى دەرەكتەردى قاعازدان باس الماي, بىرىنەن سوڭ ءبىرىن ءتىزىپ الا جونەلدى. البەتتە, تىڭدالماسا, كوپشىلىكتىڭ كوڭىلىن اۋدارماسا, ءسوز جەتىم ەمەس پە؟! قاپتاعان تسيفرلار ءوڭىر ەكونوميكاسىنىڭ تامىر سوعىسىن بىلدىرە الا ما؟! ەكونوميكا كۋراتورى وڭىرگە تارتىلاتىن ينۆەستيتسيالىق قارا جاتتىڭ باستى بولىگى مەن مۇمكىندىكتەرىن جانە بيۋدجەتتىڭ كىرىس كوزدەرىن جان-جاقتى تارقاتىپ بەرگەن جاعدايدا ۇتىمدىلىق پەن ۇتقىرلىققا جول اشا الار ەدى. وكىنىشكە قاراي, ولاي بولمادى. ا.بياحمەتوۆ قارجى ينستيتۋتتارىمەن بايلانىس, ولاردان تارتىلاتىن قاراجات كولەمى تۋرالى دا ەشتەڭە ايتا المادى.
جىل قورىتىندىسىنداعى كەيبىر دەرەكتەرگە كوز سالساق, وبلىستا مەرزىمىندە تولەنبەگەن سالىق مولشەرى كوبەيىپ بارا جاتقانى بايقالادى. سونداياق بيۋدجەتكە تۇسەتىن قوسىمشا سالىق مولشەرىن ءوسىرۋ ىسىندە دە كىدىرىستەر بار. بۇل جايتتار كەڭەيتىلگەن وتىرىس بارىسىندا دا ايتىلدى. وتكەن جىلى گازەتىمىزدە اقتوبە ايماعىنداعى تۇرىپ قالعان كاسىپورىندار جونىندە ساراپتامالىق ماقالا جاريالانعان بولاتىن. سودان بەرى ونى ساۋىقتىرۋ مەن قالپىنا كەلتىرۋ جونىندە ناقتى ىستەر قولعا الىنعانىنان دا حاباردارمىز. جىلدىڭ ەكونوميكالىق ەسەبىنە كىرەتىن ماسەلەنىڭ ءبىرى دە وسى بولسا كەرەك-ءتى. سونداي-اق وتكەن جىل ىشىندەگى الەۋمەتتىك ەكونوميكالىق دامۋ قورىتىندىلارى بويىنشا ءسوز قوزعاعان كەزدە وڭىردەگى اگلومەراتسيالىق دامۋ دەڭگەيى مەن باعىتتارى تۋرالى ايتىلماي قالسا, قازاق ادەبيەتىنىڭ اقساقالى شەرحان مۇرتازا ايتقانداي ء«بىر كەم دۇنيە» بولىپ شىعادى.
اقتوبە وبلىسىنىڭ اكىمى بەردىبەك ساپارباەۆ القا ءماجىلىسى ۇستىندە ورىندى اتاپ كورسەتكەندەي, ونىڭ جۇمىسشى ورگانى ۇكىمەت تە, مينيسترلىكتەر دە نەمەسە ورتالىقتاعى وزگە دە باسقارۋشى بۋىندار ەمەس, ناقتى وسى اقتوبە وبلىسى اكىمدىگىنىڭ ءوزى بولىپ وتىر. ەندەشە اقتوبە اگلومەراتسياسىن دامىتۋعا مۇددەلى ەڭ ءبىرىنشى وكىلەتتى تۇلعالار جەرگىلىكتى اتقارۋشى ۇيىمدار بولۋى كەرەك. ءوز كەزەگىندە بۇل ىسكە تىكەلەي جەتەكشىلىك جاسايتىن وبلىس اكىمىنىڭ ەكونوميكا جونىندەگى ورىنباسارى ا.بياحمەتوۆتىڭ تاراپىنان اگلومەراتسيانىڭ جايكۇيىنە قاتىستى ءبىر اۋىز ءسوز اي تىلماعانىن قالاي تۇسىنۋگە بولادى؟!
ەگەر ءوڭىر باسشىسى بۇعان بايلانىستى ءتيىستى تولىقتىرۋلار جاساماعاندا, ءوڭىردىڭ ەكونوميكالىق دامۋىنىڭ باستى يندەكسى مەن كورسەتكىشى سيپاتىنداعى كوكەيكەستى ماسەلە جابۋلى كۇيىندە قالىپ قويار ما ەدى. وبلىس ەكونوميكاسىنا نەگىزىنەن ستراتەگيالىق شيكىزات كوزدەرى مەن وزگە دە قازبا بايلىقتاردى ءوندىرۋ, يندۋستريالاندىرۋدى دامىتۋ جانە ءوندىرىس پەن ونەركاسىپتى وركەندەتۋ سيپاتى ءتان بولعانىمەن, اقتوبە ەلىمىزدىڭ اگرارلىق وڭىرلەرى قاتارىندا قالا بەرەتىنى انىق. سوندىقتان مۇندا ءتيىستى ونەركاسىپ كەشەنىن ودان ءارى دامىتۋدىڭ بۇگىنگى تاكتيكاسى مەن الداعى ستراتەگياسى ناقتى تۇردە بەلگىلەنۋى ءتيىس.
وسى ورايدا كەڭەيتىلگەن القا ماجىلىسىندە وبلىس اكىمىنىڭ اۋىل شارۋاشىلىعى سالاسىنا جەتەكشىلىك جاسايتىن ورىن باسارى ماۆر ابدۋللين بۇل باعىتتا قولعا الىناتىن باعدارلامالارعا, ايماقتاعى اۋىل شارۋاشىلىعى سالاسىندا ءوز شەشىمىن كۇتىپ تۇرعان ىستەرگە تەرەڭ تالداۋلار جاسايتىن شىعار دەپ كۇتكەن ەدىك. بۇل ءۇمىتىمىز دە اقتالا قويمادى. وسى رەتتە وبلىس اكىمدىگىنىڭ كەڭەيتىلگەن وتىرىسىندا جوعارىدا ايتىلعانداي كەيبىر جەتەكشىلەردىڭ ەسەبى قۇرعاق ءسوز, جالاڭ ستاتيستيكا توڭىرەگىنەن شىعا الماي قالعانى وكىنىشتى-اق.
تەمىر قۇسايىن,
«ەگەمەن قازاقستان»
اقتوبە
