الەۋمەتتىڭ اكىمدەردەن جاقسى جاڭالىق كۇتەتىنى بەلگىلى. دەگەنمەن, شىندىعىنا كەلگەندە اۋدان ورتالىقتارىندا, اۋىلداردا ءتۇيىنى تارقاماعان ماسەلەلەر ءالى دە بارشىلىق. ال اكىمدەر حالىققا ۋادە بەرىپ, كەيىن ۋادە ۇدەسىنەن شىعىپ جاتسا, ءتىپتى جاقسى.
وڭىردە ينفراقۇرىلىمدى جاقسارتۋ, ەكونوميكانى كوتەرۋ, الەۋمەتتىك سالانى دامىتۋ ماسەلەلەرى بويىنشا بىرقاتار جۇمىستار اتقارىلىپ كەلەدى. بار نارسەنى ايتقان جاقسى, بىراق جوقتىڭ دا جايىن ەسكەرە جۇرگەن دۇرىس-اق. الايدا ەل ىشىندە حالىقتىڭ تىلەگىنە وراي شەشىمىن كۇتكەن ماسەلەلەر دە جەتىپ-ارتىلادى. ماسەلەن, تالاس اۋدانىنىڭ ورتالىعى قاراتاۋ قالاسىندا اۋىز سۋ, گاز تارتۋ ماسەلەلەرى وڭ شەشىمىن تاپقانىمەن, قالاداعى قوعامدىق كولىك ماسەلەسى ءالى وزەكتى بولىپ تۇر. ەسەپتى كەزدەسۋدە قالا اكىمىنەن قالا تۇرعىنى س.قۇلباەۆا وسى ماسەلەنى سۇراعان بولاتىن. سونىمەن قاتار س.قۇلباەۆا ءار سەنبى سايىن وتەتىن جارمەڭكە كەزىندە ازىق-ت ۇلىك باعاسىنا باقىلاۋ بولۋ كەرەكتىگىن ايتتى. راسىندا دا الا-قۇلا باعا قاراپايىم حالىقتىڭ قالتاسىنا ارتىق سالماق سالادى.
تۇرعىندار ايتقان تاعى ءبىر ماسەلە – قاراتاۋ قالاسىنداعى ب.ەسجان ۇلى مەن تولە بي كوشەلەرىنە جوندەۋ جۇمىستارىنىڭ قاجەتتىگى. قالا اكىمى ق.سەرىموۆ كەزدەسۋدە بۇل ماسەلەلەر كوپ كەشىكپەي وڭ شەشىمىن تاباتىنىن جەتكىزدى.
ال وبلىس ورتالىعىنان شالعاي جاتقان شۋ اۋدانىنىڭ اقسۋ جانە ورازالى باتىر اۋىلىنان «باتىس ەۋروپا – باتىس قىتاي» باعىتىمەن جۇرەتىن 6,3 شاقىرىم جولدىڭ سىن كوتەرمەيتىنى كوپكە ءمالىم. جالپى, شۋ اۋدانى جول ماسەلەسىنە كەلگەندە سىن ساداعىنا ءبىرىنشى ىلىنەدى. اۋدان ارقىلى تارازدان الماتىعا قاتىناپ جۇرگەن جولاۋشىلارعا جولدىڭ جاي-كۇيى جاقسى تانىس. اقسۋ اۋىلدىق وكرۋگى اقساقالدار القاسىنىڭ توراعاسى ب.ايتقوجاەۆتىڭ بۇل ماسەلەگە قاتىستى ساۋالىنا اۋىل اكىمى تالعات يتەكەەۆ بۇل جولدىڭ بيىلعى جىلى جوندەۋدەن وتكىزىلەتىنىن ايتتى. ەسكى شۋ اۋىلدىق وكرۋگىندە دە جاستار ءۇشىن سپورت زال قاجەت, اۋىلدىق كلۋبقا جوندەۋ دە ارتىقتىق ەتپەيدى. اۋىلدىق وكرۋگ اكىمى جاپارقۇل تاجيەۆتىڭ ايتۋىنشا, الداعى ۋاقىتتا كلۋبتى جوندەۋ ماسەلەسى جان-جاقتى قاراستىرىلادى. ەسكى شۋ اۋىلىندا تالاي ۋاقىتتان بەرى اۋىز سۋ تارتۋ مەن بالاباقشا سالۋ ماسەلەسى دە شەشىمىن كۇتىپ تۇر.
مويىنقۇم اۋدانىنىڭ قاشقانتەڭىز ستانساسىندا تەمىر جولداعى قاۋىپسىزدىك ماسەلەسى كۇن تارتىبىنەن تۇسكەن ەمەس. ستانسا باسشىسى قاسىمحان كەنجەەۆتىڭ ايتۋىنشا, ستانسا اينالاسىن كۇل-قوقىستان تازارتۋ دا وزەكتى. جەدەل جاردەم كولىگى بەرىلسە, جوندەلگەن جەرلەرگە جول بەلگىلەرى قويىلسا, كوشە شامدارىنىڭ جانۋى ءبىر جۇيەگە كەلتىرىلسە دەگەن دە ستانسا تۇرعىندارىنىڭ تىلەگى بار.
قياقتى اۋىلىنداعى اعىباي باتىر اتىنداعى ورتا مەكتەپتىڭ توبەسىنەن سۋ تامشىلاپ تۇرعانىن مەكتەپ مۇعالىمى گاۋھار شالعىنباەۆا جەتكىزدى. بۇگىندە ەلىمىز ءبىلىم ساپاسىن ارتتىرىپ, باسەكەگە قابىلەتتىلىكتى العا قويىپ وتىرعان ۋاقىتتا بۇل ءبىلىم وشاعىنىڭ مۇنداي كۇي كەشۋى ەرسى ارينە.
جامبىل اۋدانى قاراتاۋ اۋىلى كۇنى بۇگىنگە دەيىن تابيعي گازدىڭ يگىلىگىن كورە الماي وتىر. وڭىردەگى وزگە ەلدى مەكەندەر كوگىلدىر وتىنمەن قامتىلىپ جاتقان كەزدە قاراتاۋلىقتاردىڭ بۇل يگىلىكتەن قالىس قالۋى ويلاندىرماي قويمايدى. اۋدان تاراز قالاسىنان قاشىق ەمەس, ءارى كەتسە 20-25 شاقىرىم جەردە. قاراتاۋ اۋىلىنىڭ تۇرعىنى سالتانات لەپباەۆانىڭ ايتۋىنشا, كوشەدەگى ەسكىرگەن ەلەكتر سىمدارى بالالاردىڭ ومىرىنە قاۋىپ توندىرەدى ەكەن.
بايزاق اۋدانىنىڭ بوتامويناق اۋىلدىق وكرۋگىنە قاراستى ۇشبۇلاق ستانساسىنا گاز جۇرگىزۋ دە ەل تىلەگىنىڭ ءبىرى. ۇشبۇلاق ستانساسى توعىز جولدىڭ تورابىندا ورنالاسقان, تاراز قالاسىنا جاپسارلاس ەلدى مەكەننىڭ ءبىرى. ءدال تۇستان «باتىس ەۋروپا – باتىس قىتاي» حالىقارالىق تاسجولى مەن حالىقارالىق تەمىر جول وتەدى. بۇل ەلدى مەكەنگە اۋىز سۋ, بالالارعا ارنالعان ويىن الاڭى مەن ينتەرنەت جەلىسى دە قاجەت ەكەن. اۋىلدىق وكرۋگ اكىمى ەركىن زاۋىربەكوۆ تۇرعىنداردىڭ قاجەتتىلىگى الداعى ۋاقىتتاردا وتەلەتىنىن ايتىپ, ۋادە بەردى.
سارىسۋ – شالعاي اۋدانداردىڭ ءبىرى. اۋداننىڭ جايلاۋكول اۋىلىن ءتىپتى قيان شەت دەسە دە بولعانداي. اۋىلدان وبلىس ورتالىعى تۇگىلى, اۋدان ورتالىعى جاڭاتاس قالاسىنا جەتۋدىڭ ءوزى قيىن. اسىرەسە قىستىڭ كوزى قىراۋدا دەنساۋلىعى سىر بەرگەن ازاماتتار ءۇشىن ءتىپتى قاۋىپتى. اۋىلدىق ارداگەرلەر كەڭەسىنىڭ توراعاسى ە.امانجولوۆ اۋىلدىڭ امبۋلاتورياسىنا دارىگەر كەرەك ەكەنىن ايتسا, ق.داۋلەتوۆ شاعىن بولسا دا ءدارىحانا قاجەت دەيدى.
سارىسۋلىقتاردى جايىلىمنىڭ جايى دا الاڭداتادى. نەگىزىنەن مال شارۋاشىلىعىمەن كۇن كورىپ وتىرعان تۇرعىنداردىڭ بۇل تىلەگى ورىندى. ۇلانبەل-شىعاناق اۋىلدارىنىڭ ارالىعىنداعى اۆتوجول كوپ جىلدان بەرى جوندەۋ كورمەگەن. بۇل ورايدا اۋدان اكىمىنىڭ ورىنباسارى بەرگەن وماربەك تۇرعىنداردىڭ تالاپ-تىلەگى الداعى ۋاقىتتا وڭ شەشىم تاباتىنىن ايتتى.
اۋىلدىڭ بارىن ۇقساتىپ, جوعىن تۇگەندەۋ اكىمدەردىڭ قىزمەتتىك مىندەتى ەكەنى ايان. تىلگە تيەك ەتكەن جايتتار ۇساق-تۇيەك بولىپ كورىنگەنمەن, بۇل سونداعى حالىقتىڭ تۇرمىس-تىرشىلىگىندەگى وزەكتى ماسەلەلەر سانالادى. الداعى ۋاقىتتا اكىمدەر ايتقان ۋادەلەرىنىڭ ۇدەسىنەن شىعىپ, الەۋمەتتىڭ تىلەگىن قاناعاتتاندىرۋى ءتيىس.
حاميت ەسامان,
«ەگەمەن قازاقستان»
جامبىل وبلىسى
