اۆتور كىتاپتىڭ العىسوزىندە: «بۇل كىتاپ – مەنىڭ ۇلى قولداۋشىم, كەمەل كەلەشەگىنە ءوزىنىڭ قازاقستاندىق جولىمەن قارىشتاعان جاسامپاز حالقىما ارنالادى» دەپ, ەش بۇكپەسىز اعىنان جارىلادى. شىنىندا دا وتە قىسقا مەرزىمدە عاسىرعا پارا-پار ىستەر تىندىرۋ, تىڭنان تۇرەن سالۋ, وركەنيەتتى ەلۋ ەلدىڭ قاتارىنا جەتۋ ەلباسى سياقتى سۇڭعىلا ساياساتكەرگە ءتان قاسيەت بولسا كەرەك.
جاسىراتىنى جوق, كەڭەس وداعى ىدىراپ, ەكونوميكالىق بايلانىستار ءۇزىلىپ, قايدا بارارىمىزدى بىلمەي باسىمىزدى تاۋعا دا, تاسقا دا ۇرعان سول ءبىر ءولىارا كەزەڭدە بولاشاعىمىز ءدال وسىنداي كەمەل بولارىنا سەنبەگەنىمىز راس. جوعارىنىڭ نۇسقاۋىنا ابدەن ۇيرەنىپ قالعان حالىق سەڭدەي سوعىلىسىپ, سارىۋايىمعا سالىنىپ, ءتىپتى ومىردەن تۇڭىلگەن ساتتەر دە كەزدەسكەن. قىزىلجار وڭىرىندە دە تىكەلەي ماسكەۋگە باعىناتىن ءىرى اسكەري كاسىپورىندار جۇمىسىن توقتاتىپ, بيۋدجەت قازىناسى بوس قالعانىن, ونى ايتامىز-اۋ, مۇعالىمدەر مەن دارىگەرلەرگە جالاقى اراق تۇرىندە بەرىلگەنىن قالاي ۇمىتارسىڭ؟ بالا-شاعاسىن اسىراۋ ءۇشىن اشىق ساۋدا جاساۋعا ۇيالاتىن ءبىر تانىسىم قازىر بۇل كاسىپتىڭ قۇلاعىن ۇرشىقشا اينالدىرادى. «ەڭبەك ەتسەڭ ەمەرسىڭ» دەگەن وسى. ەلدىگىمىز سىنعا تۇسكەن ساتتە پرەزيدەنتىمىزدىڭ جول باستاۋىمەن اۋىر تاۋقىمەتتى قالاي جەڭگەنىمىزدى جاس بۋىن ءبىلىپ, ءتۇيسىنىپ وسسە دەيسىڭ. ەڭبەكتى وقي وتىرىپ ءامىرشىل-اكىمشىل جۇيەدەن نارىقتىق ەكونوميكاعا كوشۋ وڭاي سوقپاعانىنا, اسىرەسە قازاقستاندىقتاردى پسيحولوگيالىق جاعىنان دايىنداۋ, كەمەل كەلەشەككە سەندىرۋ ۇلكەن كۇشكە تۇسكەنىنە كوز جەتكىزەمىز. ءدال وسى تۇستا ەلباسىمىز تاركىلەۋ, اشارشىلىق, ساياسي قۋعىن-سۇرگىن جىلدارى شەتەلدەرگە امالسىز باس ساۋعالاپ كەتكەن قانداستارىمىزدى ەلگە ورالتۋ تۋرالى ۇندەۋ تاستاعاندا تۇرمىس-تىرشىلىگىمىز وڭالماي جاتقاندا مۇنىسى نەسى ەكەن دەگەندەي ۇركە, ءتىپتى مىسقىلداي قاراعاندار بولماي قالعان جوق. مىنە, ارىدەن, تەرەڭنەن بولاشاقتى ويلايتىن كەمەڭگەرلىك ۇستانىم دەپ وسىنى ايتادى! ۇلى كوشتىڭ العاشقى لەگى قىزىلجار وڭىرىنە دە دامىلداپ, موڭعوليادان كەلگەن اعايىندارىمىزبەن قۋانا قاۋىشقانىمىز ەسىمىزدە.
ەڭبەكتەگى «...تاريحتا تۇڭعىش رەت ءبىزدىڭ مەملەكەتتىك شەكارامىز حالىقارالىق-قۇقىقتىق تۇرعىدان رەسىمدەلدى جانە وڭىردەگى بەيبىتشىلىك پەن تۇراقتىلىقتى قامتاماسىز ەتۋدىڭ ءىس جۇزىندەگى ناقتى قۇرالى بولا الدى. وسى كەزدەن باستاپ دەربەس قازاقستان زاڭدى تۇردە رەسىمدەلگەن 14 مىڭ شاقىرىمدىق قۇرلىقتىق شەكاراعا يە بولدى. ونىڭ 7591 شاقىرىمى – رەسەيمەن, 2351 شاقىرىمعا جۋىعى – وزبەكستانمەن, 1793 شاقىرىمى – قىتايمەن, 1242 شاقىرىمى – قىرعىزستانمەن, 426 شاقىرىمى – تۇرىكمەنستانمەن ءتۇيىسىپ جاتىر» دەگەن بۇلتارتپاس دەرەكتەردى وقىعاندا ءبىر شاڭىراق استىندا ءتۇتىنى ءتۇزۋ ۇشقان قازاق ۇلتى مەن سان الۋان ەتنوستاردىڭ وي-ارمانىنىڭ ورىندالعانىنا شۇكىرشىلىك ەتەسىڭ. سولتۇستىك قازاقستان رەسەيدىڭ ءۇش وبلىسىمەن شەكتەسەدى. ەلباسىنىڭ شەكارالاس ايماقتاردا ىنتىماقتاستىق كوكجيەگىن ودان ءارى كەڭەيتۋ ۇستانىمى ايقىن. وعان ەكى مەملەكەت باسشىلارىنىڭ بىلتىر چەليابىدە وتكەن وڭىرارالىق بايلانىستى دامىتۋعا ارنالعان كەلەلى كەزدەسۋى دالەل. وسىنداي القالى باسقوسۋ بيىل ماعجان ەلىندە وتەتىن بولىپ بەلگىلەندى.
ەلباسىمىزدىڭ كەز كەلگەن باستامالارى مەن ۇسىنىستارى جۇرتشىلىق تاراپىنان كەڭ قولداۋعا يە بولىپ كەلەدى. قازاقستان حالقى اسسامبلەياسى قۇرىلعالى جايشىلىقتا ومىراۋلاپ, وزەۋرەپ, تيىسۋگە قارا تاپپاي, بۇيرەكتەن سيراق شىعارىپ جۇرەتىن وڭىردەگى سەپاراتيستىك باعىتتاعى توپتار مەن كۇشتەر پىشاق كەسكەندەي تىيىلدى. ونىڭ باسشىلارى مەن وكىلدەرى ءوز قاتەلىكتەرى ءۇشىن كەشىرىم سۇراپ, جۋاسىپ تىندى. ايتا بەرسە, ەسكە الاتىن ەستەلىكتەر تاۋسىلمايدى.
نۇرسۇلتان ءابىش ۇلىنىڭ «تاۋەلسىزدىك ءداۋىرى» اتتى جاسامپازدىق ەڭبەگىندە ءبارىمىزدىڭ باسىمىزدان وتكەرگەن «تار جول, تايعاق كەشۋدەن» باستاپ دامۋدىڭ داڭعىل جولىنا تۇسكەن وسى كەزىمىزگە دەيىنگى قاتپارلى وقيعالار شىنايى شىندىقپەن شىرايلى باياندالادى.
اماندىق جانتەمىروۆ,
قازاقستاننىڭ مادەنيەت قايراتكەرى
سولتۇستىك قازاقستان وبلىسى
