بۇگىندە كۇللى الەمدە ەنەرگيا تاپشىلىعى بايقالىپ وتىرعانى بەلگىلى. قازىر ءوزىمىز قۋات كوزى رەتىندە پايدالانىپ وتىرعان كومىر, مۇناي, تابيعي گاز سەكىلدى ەنەرگيا تۇرلەرى ءتۇپتىڭ تۇبىندە تۇگەسىلەتىنى انىق. سوندىقتان قازاقستان دا بولاشاعى ءۇشىن قام جاساپ, جاڭعىرمالى ەنەرگيا كوزدەرى ارقىلى رەسۋرستىق قوردى جاساپ الۋعا ەرەكشە ىقىلاس تانىتىپ وتىر. ۆيتسە-ءمينيستردىڭ ايتۋىنشا, «قازاقستان-2050» ستراتەگياسىندا دا تابيعي رەسۋرستاردىڭ سارقىلۋى قازىرگى زامانعى سىن-تەگەۋرىندەردىڭ ءبىرى رەتىندە قاراستىرىلعان. وسىعان وراي ەلىمىز بالامالى قۋات كوزدەرىن دامىتۋدى قولعا الا باستادى. ع.سادىبەكوۆ ەلەكتر ەنەرگەتيكاسى سالاسىنداعى جاڭعىرمالى ەنەرگيانىڭ ۇلەسىن 2030 جىلعا قاراي 30 پايىزعا دەيىن جەتكىزۋ مىندەتى تۇرعانىن العا تارتتى. بىلتىر بۇل سالاداعى ءوسىم ساعاتىنا 1 ملرد كۆت-ساعات ەنەرگياعا جەتكەن. ول 2016 جىلمەن سالىستىرعاندا 22 پايىزعا ارتىق كورسەتكىش. ەندىگى بيىلعى جوسپار – ەنەرگيانى ءوندىرۋدى ساعاتىنا 1,7 ملرد كيلوۆاتقا جەتكىزۋ.
مەملەكەت جاڭعىرمالى ەنەرگيا كوزدەرىن وندىرەتىن نىسانداردى دا سالۋعا دەن قويىپ, بىلتىر وسىنداي بەس نىسان ىسكە قوسىلعان. ولاردىڭ ءبارى دە الدىمەن شالعاي وڭىرلەردى بالامالى ەنەرگيا كوزىمەن قامتاماسىز ەتۋدى ماقسات ەتكەن. بيىل تاعى 10 نىساندى پايدالانۋعا بەرۋ جوسپارلانىپ وتىر.
ۆيتسە-مينيستر جاڭعىرمالى ەنەرگيا كوزدەرىن ودان ءارى دامىتۋ ءۇشىن اۋكتسيوندىق مەحانيزمدەر ەنگىزىلە باستاعانىن ايتا كەلىپ, بۇل جوبالارعا ينۆەستيتسيالاردى كوپتەپ تارتۋعا, پروتسەستىڭ اشىق ءارى ءادىل وتۋىنە ىقپال ەتەتىنىن جەتكىزدى. بۇعان قوسا بيىل العاش رەت جالپى قۋاتى ءبىر گيگاۆاتتى قۇرايتىن جاڭعىرمالى ەنەرگيا كوزدەرى جوبالارىنا حالىقارالىق اۋكتسيوندىق ساتىلىمدار ەنگىزۋ جوسپارلانۋدا. ءبىرىنشى ساتىلىمدار مامىر ايىندا وتكىزىلەدى. «اۋكتسيوندىق ساتىلىمداردى وتكىزۋ تۋرالى مالىمەتتەر رەسمي ينتەرنەت-رەسۋرستارىندا جاريالانادى. ىرىكتەۋدىڭ شارتتارى بارلىق كاسىپكەرگە بىردەي بولادى. اۋكتسيونعا تەك بيزنەسمەندەر عانا ەمەس, ازاماتتىعىنا قاراماستان كەز كەلگەن نيەت ءبىلدىرۋشى قاتىسا الادى. اۋكتسيوندىق ساتىلىمدارعا قاتىسۋعا وتاندىق بيزنەستەن باسقا قازىردىڭ وزىندە ساۋد ارابياسى, كانادا, اقش, قىتاي سەكىلدى شەتەلدەردىڭ كومپانيالارى قىزىعۋشىلىق تانىتىپ وتىر. مۇنداي اۋكتسيون ءتۇرىن ەنگىزۋ ارقىلى ءبىز ەكى ماسەلەنى شەشپەكپىز. بىرىنشىدەن, جاڭعىرمالى ەنەرگيا كوزدەرىنىڭ قۇنى مەن ەلىمىزدىڭ ەكونوميكاسىنا ىقپال ەتۋ دەڭگەيىن تومەندەتەمىز. ەكىنشىدەن, جاڭعىرمالى ەنەرگيا كوزدەرى سالاسىنداعى وزىق تەحنولوگيالاردى ەلىمىزگە تارتاتىن بولامىز», دەدى ع.سادىبەكوۆ.
بۇدان كەيىن جاسىل تەحنولوگياعا كوشۋ ماسەلەسىنە توقتالعان ۆيتسە-مينيستر تۇرمىستىق قالدىقتاردى وڭدەۋ ۇلەسىن 2030 جىلعا قاراي – 40 پايىزعا, 2050 جىلعا قاراي 50 پايىزعا دەيىن جەتكىزۋ كوزدەلىپ وتىرعانىن ايتتى. ال 2030 جىلعا قاراي حالىقتىڭ 100 پايىزى قالدىقتاردى شىعارۋ قىزمەتىمەن قامتىلىپ, تۇرمىستىق قاتتى قالدىقتار پوليگوندارىنىڭ 95 پايىزى ەكولوگيالىق تالاپتار مەن سانيتارلىق ەرەجەلەرگە ساي جۇمىس ىستەيتىن بولادى.
قالدىقتاردى بولەك جيناۋ 40 ەلدى مەكەندە, سۇرىپتاۋ – ەلىمىزدىڭ 19 وڭىرىندە ەنگىزىلگەن. بيىل شىمكەنت, قاراعاندى قالالارىندا, الماتى مەن سولتۇستىك قازاقستان وبلىستارىندا قالدىقتاردى قايتا وڭدەۋ بويىنشا 5 نىساندى پايدالانۋعا بەرۋ جوسپارلانىپ وتىر ەكەن.
ەسكى كولىكتەردى قايتا وڭدەۋ, قابىلداۋ جۇمىستارى دا اياقسىز قالماعانىن ايتقان ع.سادىبەكوۆ بۇگىندە توزىعى جەتكەن كولىگىن وتكىزگەن جاندارعا بەرىلەتىن وتەماقى 49 مىڭنان 150 مىڭعا دەيىن جەتىپ وتىرعانىن اتاپ ءوتتى. ءارى كولىگىن وتكىزگەن ازاماتتارعا وتاندىق جاڭا كولىكتەردى جەڭىلدىكپەن الۋعا مۇمكىندىك بەرەتىن ارنايى سەرتيفيكات تاپسىرىلادى.
قىمبات توقتامۇرات,
«ەگەمەن قازاقستان»
