جيىندا تاياۋ شىعىس بويىنشا بۇۇ باس حاتشىسىنىڭ ارنايى وكىلى نيكولاي ملادەنوۆ وڭىردەگى جاعداي بويىنشا سوڭعى مالىمەتتەر تۋرالى, ونىڭ ىشىندە يراك, سيريا, يەمەن, پالەستينا-يزرايل تۋرالى تولىۇ مالىمەت بەردى. اسىرەسە, پالەستينا-يزرايل قارىم-قاتىناسى ەرەكشە نازاردا بولدى. كەڭەس مۇشەلەرى ەكى مەملەكەت باسشىلارىنا حالىقارالىق كەلىسىمگە كەلۋگە, قاۋىپسىزدىك كەڭەس مۇشەلەرى ەكى جاققا الدىن الا شارت قويماي كەلىسسوزدەردى قايتا جالعاستىرۋعا شاقىردى.
كەڭەس مۇشەلەرى ەكى مەملەكەت تىكەلەي كەلىسسوزدەر وتكىزىپ, ارقايسىسى ءوز مىندەتتەرىن ورىنداۋ كەرەكتىگىن ايتتى. سونىمەن قاتار دەلەگاتسيالار بەيبىت جاعدايدى تۇراقتاندىرۋ ءۇشىن پالەستينا مەن ءيزرايلدى ءوزارا تۇسىنىستىككە كەلۋگە شاقىردى.
دەباتقا قاتىسقان مەملەكەتتەردىڭ كوپشىلىگى اقش-تڭ بۇۇ-نىڭ پالەستيناعا كومەك كورسەتۋىنە بەرىلەتىن قارجىسىن قىسقارتقانىنا الاڭداۋشىلىق ءبىلدىردى, سەبەبى بۇل قاراجات تاياۋ شىعىستاعى بوسقىندار شىعىنىنىڭ 50 پايىزىن قامتيدى. ال ونىڭ قىسقارۋى بوسقىنداردىڭ جاعدايىن قيىنداتادى.
قازاقستاننىڭ بۇۇ جانىنداعى تۇراقتى وكىلى قايرات وماروۆ ءوز سوزىندە مەملەكەتىمىزدىڭ يزرايل-پالەستينا شيەلەنىسىنىڭ شەشىلگەنىن قالايتىنىن جەتكىزدى. سونىمەن قاتار ول شيەلەنىستى كۇشەيتەتىن كەز-كەلگەن ارەكەتتەن اۋلاق بولۋعا شاقىردى.
قازاقستاندىق دەلەگاتسيا 18 قاڭتار كۇنى نۇرسۇلتان نازارباەۆتىڭ «جاپپاي قىرىپ-جوياتىن قارۋدى تاراتپاۋ: سەنىم شارالارى» تاقىرىبى بويىنشا جوعارى دەڭگەيدەگى پىكىرتالاسقا قاتىسقانىن اتاپ ءوتتى.
