راسىندا بىزدەر كۇردەلى دە كۇرمەۋلى, ءسات سايىن وزگەرىپ, جاڭاشا جاعدايلار مەن تالاپتار تۋىنداتىپ وتىرعان عالامدا ءومىر سۇرۋدەمىز. بۇگىندە بالالارعا جالاڭ بازالىق ءبىلىم بەرىپ قويۋ جەتكىلىكسىز. بىلىممەن قاتار فۋنكتسيالىق ساۋاتتىلىقتى ارتتىرۋ ماقساتى تۇنەكتەگى «جارىق جۇلدىز» سىندى ءبىزدىڭ نەگىزگى باعدارشامىمىز بولۋى قاجەت. بۇل دەگەنىمىز – وقۋشى بويىندا اناليز جانە سينتەز جاساۋ, ءوزىن ءوزى باعالاۋ, سىني ويلاۋ جانە قورىتىندى جاساي ءبىلۋ سياقتى جوعارى دەڭگەيدەگى ماشىقتاردى دامىتۋ. وسى تۇرعىدان الىپ قاراعاندا جولداۋدىڭ بارلىق ون تارماعى, ونىڭ ىشىندە «اقىلدى تەحنولوگيالاردى» دامىتۋ, قارجى سەكتورىن «قايتا جاڭعىرتۋ», كولىك-لوگيستيكا ينفراقۇرىلىمىنىڭ تيىمدىلىگىن ارتتىرۋ تارماقتارى تىكەلەي نەمەسە جاناما تۇردە ءبىلىم سالاسىن قۇبىلمالى الەمنىڭ, سونداي-اق ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ تالاپتارىنا سايكەستەندىرۋ قاجەتتىگىن كوزدەيدى.
ءبىلىم بەرۋ سالاسىن جاڭارتىلعان مازمۇنعا كوشىرۋ بارىسىندا الدىمىزدا مىناداي ءتورت مىندەت تۇر. بىرىنشىدەن, تۇراقتى دامىپ وتىرۋ, وقىتىلىپ جاتقان جالپى وقۋ باعدارلامالارىنا تالداۋ جاساۋ. ەكىنشىدەن, باعالاۋ جۇيەسىن جەتىلدىرۋ. سەبەبى بۇل جاڭا باعدارلامانىڭ قالاي ىسكە اسىپ جاتقانىن جانە ونىڭ ناتيجەسىن كورسەتەتىن بىردەن-ءبىر دۇنيە. ۇشىنشىدەن, مەكتەپتەردە يگىلىكتى ءبىلىم ورتاسىن قالىپتاستىرۋ: بالا مەكتەپتە ءوزىن ەركىن سەزىنىپ, ۇستازدارى مەن قۇربىلارى اراسىنداعى قارىم-قاتىناس مەيلىنشە مەيىرىمدى بولۋى ابزال. سوڭعى ءتورتىنشى تالاپ, ماتەريالدىق-تەحنيكالىق بازانى ءتيىمدى پايدالانۋ. بۇكىل مەكتەپ زەرتحانالارى مەن ينفراقۇرىلىمدارى بىرلەسىپ, پاندەردى وقىتۋ مەن بالانى دامىتۋدا بارلىعى ورتاق شىعارماشىلىق زەرتحاناعا ءارى ورتاق شىعارماشىلىق دامىتۋ ورتالىعىنا اينالىپ, جۇمىلا جۇمىس اتقارۋى ءتيىس.
پرەزيدەنت جاس ۇرپاقتى عىلىمي-زەرتتەۋ جانە وندىرىستىك تەحنولوگيالار جۇمىستارىنا تارتۋدىڭ ماڭىزدىلىعىن اتاپ ءوتتى. بالالار ءۇشىن جاڭا تەحنولوگيالار قولجەتىمدى بولۋى كەرەك. وقۋ باعدارلاماسى ءاردايىم ەلەكتيۆتى كۋرستارمەن تولىقتىرىلىپ وتىرۋى قاجەت-اق. ەگەر مەكتەپتەن تىس ۇيىمدار روبوت-تەحنيكا كابينەتتەرىمەن, 3D پرينتەرلەرمەن جانە باسقا دا تەحنيكالارمەن قامتاماسىز ەتىلسە, ەرتەڭ مەكتەپتەگى ءبىلىم ساپاسى دا داميدى, سەبەبى بالادا وقۋعا دەگەن قىزىعۋشىلىق جۇمىستى تەحنيكادا ءوز قولىمەن جاساۋ جانە باعدارلامالار قۇراستىرۋ بارىسىندا ويانادى.
جولداۋدىڭ جەتىنشى باعىتىندا ۇستازداردىڭ بىلىكتىلىگىن ارتتىرۋ تۋرالى, وسىعان بايلانىستى پەداگوگيكالىق جوعارى وقۋ ورىندارىنا مامانداردى ازىرلەۋ جۇيەسىن تولىقتاي قايتا قاراۋ تۋرالى ماسەلە ايتىلعان. بۇل وتە وزەكتى ماسەلە, سەبەبى ءبىلىم سالاسىنداعى نەگىزگى تىرەك – ءوز ءىسىن, بالالاردىڭ پسيحولوگياسى مەن جاس ەرەكشەلىگىن جانە وقىتۋ مەتوديكاسى مەن تەحنولوگياسىن مەڭگەرگەن مۇعالىم. پرەزيدەنت وقىتۋشىلاردىڭ جالاقىسى مۇعالىمنىڭ بىلىكتىلىگىنە سايكەس تولەنەتىندىگىن ايتتى, سول سەبەپتى قازىر ءبىلىم جۇيەسىندە ۇلتتىق بىلىكتىلىك تەستىنە دايىندىق باستالىپ كەتتى. بۇل جاعىمدى جاڭالىق مۇعالىمدەرگە بۇدان ءارى ءوزىن ءوزى دامىتىپ وتىرۋعا جول اشاتىن بولدى.
نازارباەۆ زياتكەرلىك مەكتەپتەرىنىڭ ميسسياسى – ۇزدىك قازاقستاندىق داستۇرلەر مەن حالىقارالىق تاجىريبەگە نەگىزدەلگەن ءبىلىم بەرۋدىڭ يننوۆاتسيالىق جۇيەسىن ازىرلەۋ جانە وزىندىك تاجىريبەنى ەلىمىزدىڭ جالپى ءبىلىم بەرۋ جۇيەسىنە تاراتۋ. باسقا سوزبەن ايتقاندا, ءبىزدىڭ مەكتەپتەر – تاجىريبە الاڭى. مەملەكەت باسشىسى زياتكەرلىك مەكتەپتەر ءبىلىم جۇيەسىنە جاڭا ستاندارتتاردى ەنگىزۋگە كومەكتەسەتىن, وڭىرلەردەگى نەگىزگى ادىستەمەلىك ورتالىققا اينالۋى كەرەكتىگىن تاپسىردى. بۇگىندە ولار شىن مانىندە كوپشىلىككە باعىت-باعدار بەرەتىن ادىستەمەلىك ورتالىققا اينالدى: ءبىز نازارباەۆ زياتكەرلىك مەكتەپتەرىندە باعدارلامالار ازىرلەپ, ولاردى ءتۇسىندرۋ بويىنشا ەلىمىزدىڭ تۇكپىر-تۇكپىرىندەگى مۇعالىمدەرگە ارناپ كوپتەگەن سەمينار وتكىزۋدەمىز. بىزدە جاڭا تەحنولوگيالاردىڭ ارقاسىندا ونلاين-رەجىمدەگى جۇيەلىك-ادىستەمەلىك كەشەن جۇمىس ىستەيدى. «نازارباەۆ زياتكەرلىك مەكتەپتەرى» دببۇ جانىنان اشىلعان ءبىلىم بەرۋ رەسۋرسى, پەداگوگيكالىق شەبەرلىك, پەداگوگيكالىق ولشەمدەر, ءبىلىم بەرۋ باعدارلامالارى ورتالىقتارى ەلىمىزدىڭ ۇستازدارىنا تۇراقتى كومەكتەسىپ, قولداۋ ءبىلدىرىپ وتىرادى.
پرەزيدەنت جولداۋى ەلىمىزدىڭ ۇستازدار قاۋىمىنا بەرىلگەن كارت-بلانش دەپ ەسەپتەيمىن, ياعني جولداۋ باسىمدىعى بىلىمدە دەپ بىلەمىن. وسى مۇمكىندىكتى پايدالانىپ, وقۋ پروتسەسىنە ءبىلىم بەرۋدىڭ جاڭا مازمۇنىن ەنگىزۋىمىز قاجەت.
كۇلاش ءشامشيدينوۆا,
«نازارباەۆ زياتكەرلىك مەكتەپتەرى» دببۇ باسقارما ءتورايىمى
