«بۇل ءان بۇرىنعى اننەن وزگەرەك» دەپ شاكارىم قاجى ايتقانداي, بيىلعى جولداۋدىڭ – ءجونى بولەك, جولى باسقا. ولاي دەيتىنىمىز, زاماناۋي تەحنولوگيالار وزگەرىسكە ۇشىراپ, جاھاندىق ىلگەرىلەۋشىلىكتەر وزىمەن بىرگە سىن-قاتەرلەردى دە الا كەلۋدە. الەمدى القىمىنان الار داعدارىستاردىڭ قاۋپى دە اسا زور. قارقىندى ءجۇرىپ جاتقان جاھاندانۋ دا ۇلت الدىنا اسا كۇردەلى مىندەتتەر قويىپ وتىر. وسىنداي سىن كەزەڭدە كەلەشەكتە بولۋى ابدەن ىقتيمال قيىندىقتاردىڭ الدىن الىپ, ونى ەڭسەرۋدىڭ اداستىرماس اق جولىن كورسەتكەن, تەرەڭ ويلى, تەكتى ءسوز!... بۇل – جولداۋ كورەگەندىكتىڭ تاعى ءبىر كوركەم دە كەرميىق, كەرەمەت كورىنىسى!...
ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» ەلباسى جولداۋىندا تايعا تاڭبا باسقانداي اپ-ايقىن كورىنىپ تۇر. بۇل جولداۋدىڭ ءار ءبولىمى, ءار ابزاتسى عانا ەمەس, ءار جولى – «ماڭگىلىك ەلگە» الىپ باراتىن «نۇرلى جول».
بۇل جولعى جولداۋدا بۇرىن ايتىلماعان وزەكتى, وتكىر ماسەلەلەر الشى تۇسەر ساقاعا قۇيىلعان قورعاسىنداي كوكەيگە قونا كەتەدى. ءبىر عانا مىسال, ەلباسى العا قويعان جەتىنشى مىندەت: «ادامي كاپيتال – جاڭعىرۋ نەگىزى». قازاقستاننىڭ ەڭ باستى بايلىعى – التىنى, مۇنايى, گازى عانا ەمەس, جاڭارعان ومىرگە ساي جاڭا ساپاداعى ءبىلىمدى, ەڭبەكقور حالقى.
ەل باستاعان كوسەمى – كەمەل ويلى كەمەڭگەر, حالقى ەل سۇيسىنگەن ەڭبەككەر بولسا, ەڭسەرىلمەس قيىندىق, الىنباس اسۋ جوق. بۇگىنى – نۇرلى, كەلەشەگى – كەمەل قازاقستان سونىڭ ايقىن ايعاعى!
پرەزيدەنت ەرەكشە ءمان بەرىپ وتىرعان «ادامي كاپيتال» جايلى ايتساق, كەز كەلگەن مەملەكەتتىڭ ءۇش الىپ تىرەگى بار. ولار: جەراستى بايلىعى, ءوندىرىس ورىندارى مەن ادام كاپيتالى. وسى ءۇش الىپتىڭ نەگىزگىسى – ەلباسى جولداۋىندا ايتىلعان «ادامي كاپيتال». وسى تۇستا, بيلل گەيتستىڭ: ء«بىز بايۋدى ماقسات ەتىپ بار كۇشتى بايلىققا جۇمسادىق. ناتيجەسىندە, ادامي قۇندىلىقتاردان ايىرىلىپ قالدىق», – دەگەن ءسوزى قالام ۇشىنا ورالىپ تۇر. پرەزيدەنت جولداۋىنىڭ ءار جولى ەرەن ەڭبەككە جۇمىلدىرىپ, جىگەرىڭدى جانىپ, رۋحىڭدى اسقاقتاتادى.
ءبىر سوزبەن ايتساق, بيىلعى جولداۋ – وتكەن جولداۋلاردى مۇلدە قايتالامايتىن جاڭا ويلارعا تولى, وزگەشە جولداۋ!..
ەلباسى جولداۋى – ەل ومىرىندەگى ەلەۋلى وقيعا.
ءسابيت دوسانوۆ,
مەملەكەتتىك سىيلىقتىڭ لاۋرەاتى, جازۋشى
