قازاقستان رەسپۋبليكاسىنىڭ بيۋدجەتتىك جۇيەسى دامۋىنىڭ زاماناۋي كەزەڭى باعدارلامالىق-ماقساتتىق جۇيەسىن ەنگىزۋ ارقىلى بيۋدجەتتىك شىعىستاردىڭ تيىمدىلىگىن ارتتىرۋ بولىپ تابىلاتىن «شىعىستاردى باسقارۋ» ۇلگىسىنەن «ناتيجەنى باسقارۋ» ۇلگىسىنە اۋىسۋىمەن سيپاتتالادى.
اتالعان ءادىس بيۋدجەتتىك رەسۋرستاردى قوعامدىق ماڭىزدى ناتيجەلەرگە جەتۋگە باعىتتالعان قاجەتتىلىك قانا ەمەس, مونيتورينگ جۇرگىزە وتىرىپ, بەلگىلەنگەن سوڭعى ماقساتتارعا جەتۋدى باقىلاۋعا دا مۇمكىندىك بەرەدى.
ماقساتتى باعدارلامالاردى ىسكە اسىرۋ ءۇشىن بيۋدجەتتىك شىعىستاردىڭ تيىمدىلىگىن ۇنەمى باعالاۋ ۇكىمەت پەن جەرگىلىكتى اتقارۋشى ورگانداردىڭ الدىنا قويىلعان مىندەتتەردى ورىنداۋ, بيۋدجەتتىك ءۇردىستىڭ ايقىندىق دەڭگەيىن جاقسارتۋ, سونداي-اق جۇمسالعان بيۋدجەتتىك رەسۋرستاردىڭ ماقساتىن, كولەمى مەن ناتيجەلەردىڭ اقپاراتتىق قولجەتىمدىلىگىن ء(اربىر ادامعا تۇسىنىكتى تۇردە) قامتاماسىز ەتۋ ءۇشىن قاجەت.
ەلباسىنىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» جولداۋىنا سايكەس تيىمدىلىكتىڭ باستى كريتەريى – ءبىزدىڭ سالىمىمىزدىڭ قايتارىم دەڭگەيى.
بۇگىندە مەملەكەتتىك قارجىعا باستى تالاپ – بيۋدجەتتىك شىعىستاردىڭ تيىمدىلىگى. ءوز كەزىندەگى مەملەكەتتىك شىعىستاردىڭ قاۋىرت ءوسۋى ەلىمىزدىڭ بۇرىنعى كوپتەگەن ماڭىزدى سالالارىنىڭ قىزمەتىن جەتكىلىكسىز قارجىلاندىرۋدى وتەۋ قاجەتتىلىگىمەن دالەلدەندى. بىراق قازىرگى كەزدە تۋىنداعان ماسەلەلەردىڭ ورنىن بيۋدجەتتىك قاراجاتتى ءبولۋ اعىنىمەن تولتىرۋعا بولمايدى. ەلىمىزدىڭ بارلىق قىزمەت سالاسىندا ءبىرىنشى ورىندا ءتيىمدى, ءاربىر بيۋدجەت تەڭگەسىنىڭ ناتيجەلى جۇمسالۋ كريتەريى بولۋى ءتيىس.
دەبيتورلىق بەرەشەكتەردى قىسقارتۋ بويىنشا جۇمىستار بيۋدجەت شىعىستارىنىڭ تيىمدىلىگىن ارتتىرۋعا باعىتتالۋى ءتيىس. ءار جىلدا باستالعان بيۋدجەتتىك-ينۆەستيتسيالىق جوبالار ءارتۇرلى سەبەپتەرمەن توقتاتىلعان نەمەسە قارجىلاندىرۋ تولىق بولىنبەگەن, ءتىپتى ودان كەيىنگى جىلداردا اتالعان وبەكتىلەر بويىنشا قاراجات بيۋدجەتكە سالىنباعان.
وسىنىڭ بارلىعى دەبيتورلىق نەمەسە كرەديتورلىق بەرەشەكتىڭ پايدا بولۋىنا, وبەكتىنىڭ كونسەرۆاتسيالانۋىنا, جوبالاۋ-سمەتالىق قۇجاتتامانىڭ قىمباتتاۋىنا, وبەكتىنى پايدالانۋعا بەرۋ مەرزىمىنىڭ بۇزىلۋىنا, سوڭعى ناتيجەگە جەتە الماۋعا, سايىپ كەلگەندە, بيۋدجەت قاراجاتىنىڭ ءتيىمسىز جۇمسالۋىنا اكەلىپ سوعادى.
تابىستىڭ باستى كريتەريى جوبالاردى ۋاقىتىندا اياقتاۋ بولىپ تابىلادى. كۇن سايىنعى كىدىرىس كىرىستىڭ الىنباعان بەلگىلى ءبىر سوماسىنا قوسىلىپ, ناتيجەگە باعىتتالعان بيۋدجەتتەۋگە جەتە الماۋعا, ءتىپتى ايماقتاعى الەۋمەتتىك-ەكونوميكالىق جاعدايعا دا اسەر ەتەدى.
تاعى دا ماڭىزدى ءساتتىڭ ءبىرى – بيۋدجەتتى جوسپارلاۋ جانە ساراپتامانى, قارجىلىق-ەكونوميكالىق نەگىزدەمەنى (قەن), تەحنيكالىق-ەكونوميكالىق نەگىزدەمەنى (تەن) قالىپتاستىرۋ ساپاسىنا ءارتۇرلى دەڭگەيدەگى باسشىلاردىڭ تىكەلەي جاۋاپكەرشىلىگى قولدانىستاعى زاڭنامامەن قاراستىرىلماعان.
ەلباسىمىز ەكونوميكادا مەملەكەتتىڭ قاتىسۋىن نەعۇرلىم ازايتۋعا شاقىرعان بولاتىن. ۆەدومستۆوعا قاراستى ۇيىمدار كورسەتەتىن كونسالتينگتىك, ساراپتامالىق قىزمەتتەر وزدەرى بەرەتىن كەڭەستەر مەن قورىتىندىلاردىڭ تيىمدىلىگىنە بايلانىستى تەكسەرىلۋى ءتيىس. قارجىلىق-ەكونوميكالىق ەسەپتەۋلەر دۇرىس جاسالماسا, ەلىمىز بەن مەملەكەت بيۋدجەتىنە كەلتىرىلەتىن زيان وراسان بولماق. ونى بيۋدجەتتى اتقارۋداعى, اتاپ ايتقاندا, مەملەكەتتىك ساتىپ الۋ ءتارتىبى بويىنشا انىقتالعان بۇزۋشىلىقتارمەن سالىستىرۋ مۇمكىن ەمەس. ال نەگىزدەمەنىڭ باستى ماقساتى – ۇكىمەتكە ينۆەستيتسيالىق جوبالاردى باسقاراتىن كىرىستەر ولشەمىمەن ورنى تولتىرىلاتىن بيۋدجەت شىعىستارىن كورسەتۋ.
زاڭنامادا ەسەپتەۋلەر مەن باسقا نەگىزدەمەلەردىڭ دۇرىس جاسالۋىنا, سونداي-اق ناقتى نەگىزدەمەلەرگە ساي قۇرىلىس بويىنشا جوبالار, ۇقساس جوبالاردىڭ ىسكە اسىرىلۋىنا بارلىق قاتىسۋشىلارعا اكىمشىلىك جانە قىلمىستىق جاۋاپكەرشىلىك قاراستىرىلعان جاۋاپكەرشىلىك بولۋى ءتيىس. بۇل رەتتە دەكلاراتسيالار مەن باستامالار ەمەس, بيۋدجەتتىك ينۆەستيتسيالاردىڭ ناتيجەسى مەن قورىتىندىسى ماڭىزدى بولۋى قاجەت.
زاماناۋي مەملەكەتىمىزدىڭ «100 ناقتى قادام» بەس ينستيتۋتتىق رەفورماسىنىڭ «ەسەپ بەرەتىن مەملەكەتتى قالىپتاستىرۋ» V تاراۋىن ىسكە اسىرۋ شەڭبەرىندە قازاقستان رەسپۋبليكاسىندا بارلىق ازاماتتار ءۇشىن قولجەتىمدىلىگى زاڭنامامەن قورعالاتىن, مەملەكەتتىك قۇپيا جانە اقپاراتتان باسقا, مەملەكەتتىك ورگانداردىڭ يەلىگىندەگى ءارتۇرلى اقپاراتتى الۋعا مۇمكىندىك بەرەتىن «اشىق ۇكىمەت» قۇرۋ قاراستىرىلعان.
بۇگىندە بيۋدجەتتىك ينۆەستيتسيانىڭ ناتيجەسى بويىنشا بيۋدجەتتىك نەسيەلەندىرۋدە, مەملەكەت قارىزى مەن مەملەكەتتىك كەپىلدىكتەردە تىكەلەي دە, كۆازيمەملەكەتتىك سەكتور سۋبەكتىلەرىنىڭ جارعىلىق كاپيتالىنا قاتىسۋ تۇرىندە دە جەتكىلىكتى ايقىندىلىق جوق.
بارلىق مەملەكەتتىك ورگاندار مەن كۆازيمەملەكەتتىك سەكتور سۋبەكتىلەرى ءۇشىن بيۋدجەتتىك ينۆەستيتسيا سانىنىڭ ناتيجەسىن, ماسەلەن كەرۋەت-ورىنداردىڭ, وقۋشىلاردىڭ, زەينەتكەرلەردىڭ, اۆتوجولداردىڭ ۇزاقتىعىن, تاماقتانۋ شىعىستارىنىڭ نورماسىن, ءدارى-دارمەكپەن قامتاماسىز ەتۋ جانە ت.ب. ساندىق جانە ساپالىق كورسەتكىشتەرىمەن جاريالاۋ ءۇشىن بىرىڭعاي اقپاراتتىق جۇيە قۇرۋ قاجەت.
بيۋدجەتتىڭ اشىق بولۋى ەلىمىزدىڭ ەكونوميكالىق دامۋىنا بىردەن-ءبىر اسەر ەتەتىن كوپتەگەن فاكتورلاردىڭ ءبىرى, وسى ورايدا پروتسەستەر مەن اقپاراتتاردىڭ جاسىرىن بولۋى مەملەكەتتىك ورگانداردا جەمقورلىقتى تۋدىرادى دەپ ەسەپتەيمىز.
راحات توقباەۆ,
استانا قالاسى بويىنشا قازىناشىلىق دەپارتامەنتىنىڭ باسشىسى
