ءمينيستردىڭ ايتۋىنشا, بىلتىر قازاقستان ءتۋريزمدى وركەندەتۋ تۇرعىسىنان جاڭا كەزەڭگە قادام باسقان. اسىرەسە, حالىقارالىق مامانداندىرىلعان ەكسپو كورمەسى وسى سالانى دامىتۋعا ۇلكەن مۇمكىندىكتەر جاساعان. «كورمەنى ءساتتى وتكىزۋدىڭ ارقاسىندا ەلىمىز باتىس جانە شىعىس مادەنيەتىنىڭ قيىلىسقان تۇسىنداعى جاڭا تۋريستىك دەستيناتسيا رەتىندە تانىلدى. وسىلايشا, تاۋەلسىزدىك العالى العاش رەت قازاقستان الەمدىك تۋريزم كارتاسىندا ايقىن كەسكىنگە يە بولدى», دەدى مينيستر.
تۋريزم سالاسىن وركەندەتۋ باعىتىندا اتقارىلىپ جاتقان جۇمىستارعا توقتالعان ا.مۇحامەدي ۇلى وسى سالانىڭ ىشكى جالپى ونىمدەگى ۇلەسىن 2016 جىلعى 1 پايىزدان 2025 جىلى 8 پايىزعا جەتكىزۋ جوسپارلانىپ وتىرعانىن جەتكىزدى. وسىعان بايلانىستى بىلتىر ءبىراز ىستەر تىندىرىلعان. ايتالىق, تۋريستىك سالانى دامىتۋدىڭ 2023 جىلعا دەيىنگى جاڭارتىلعان تۇجىرىمداماسى قابىلدانعان. سالانى دامىتۋ تاريحىندا العاش رەت مادەنيەت جانە سپورت مينيسترلىگى مەن ەلىمىزدىڭ وڭىرلەرى اراسىندا ىنتىماقتاستىق تۋرالى مەموراندۋمدارعا قول قويىلعان. سونداي-اق ءتۋريزمى قارقىندى دامىعان الدىڭعى قاتارلى مەملەكەتتەردىڭ ۇزدىك تاجىريبەلەرى بويىنشا مەملەكەتتىك دەڭگەيدە ءتۋريزمدى باسقارۋ جونىندەگى كەڭسە قۇرىلىپتى.
مينيسترلىك ەلىمىزگە كەلەتىن تۋريستەر اعىمىن كوبەيتۋ ءۇشىن ۆيزالىق-كوشى-قون رەجىمىن دە وڭتايلاندىرۋ جۇمىستارىن باستاعان. ماسەلەن, قازىردىڭ وزىندە بىرەگەي ۆيزاسىز رەجىم ەنگىزىلىپ, ول 2018 جىلدىڭ سوڭىنا دەيىن ۇزارتىلعان. مىسالى, الماتى مەن استانا قالالارى ارقىلى وتەتىن قىتاي حالىق رەسپۋبليكاسى ازاماتتارى ءۇشىن 72 ساعاتتىق ترانزيت ەنگىزىلىپ, سونىڭ ناتيجەسىندە تەك ەكسپو كورمەسىنە وسى ەلدەن 4,5 مىڭ تۋريست كەلگەن ەكەن. ەندى وسىنداي رەجىمدى ءۇندىستان ازاماتتارى ءۇشىن دە ەنگىزۋ جوسپارلانىپ وتىر.
ەلىمىزدىڭ سىرتقى ءتۋريزمى عانا ەمەس, ىشكى ءتۋريزمدى دامىتۋعا دا كۇش سالىنۋدا. بىلتىرعى توعىز ايدىڭ كورسەتكىشى بويىنشا ىشكى تۋريزمدەگى اعىم بۇرىنعىدان 25 پايىزعا ارتىپ, 3,5 ملن ادامدى قۇراعان.
مينيستر قازاقستانداعى كورىكتى ورىنداردى الەمگە دارىپتەپ, ءتۋريزمنىڭ قايناعان ورتاسىنا اينالدىرۋ باعىتىندا دا بىرقاتار جۇمىستار قولعا الىنعانىن ايتتى. ماسەلەن, استانا مەن ششۋچە-بۋراباي كۋرورتتىق ايماعىنىڭ ينفراقۇرىلىمىن دامىتۋدىڭ باعدارلامالىق قۇجاتتارى قابىلدانعان.
الايدا ءوز ەلىمىزدە دە ماقتان ەتەرلىك كورىكتى مەكەندەر كوپ بولعانىمەن, ونداعى قىزمەت كورسەتۋ ساپاسى مەن باعاسى كوڭىل كونشىتە بەرمەيدى. بۋرابايدا دەمالعاننان گورى تۇركيادا تىنىققان ارزانىراق دەپ حالىق بەكەردەن-بەكەر ايتپاسا كەرەك. وسى ماسەلەنى كوتەرىپ, ساۋال قويعان ءجۋرناليستىڭ سۇراعىنا مينيستر حالىقارالىق ستاندارتتاردى ەنگىزۋ ارقىلى بارلىق دەمالىس ورنىنداعى قىزمەت كورسەتۋ ساپاسىن كوتەرۋدى ماقسات ەتىپ وتىرعانىن ايتتى. «بۇل احۋالدى تۇزەپ, تۋريستەر لەگىن ارتتىرۋ ءۇشىن ششۋچە-بۋراباي كۋرورتتىق ايماعىن دامىتۋدىڭ تۇبەگەيلى ءادىسى قابىلداندى. ءبىرىنشى كەزەكتە جول ينفراقۇرىلىمى جاقسارىپ, قىزمەت ساپاسى تۇزەتىلەتىن بولادى», دەدى ول. ونىڭ ايتۋىنشا, بۋرابايدا تۋريستەرگە قولايلى جاعداي جاساۋ ءۇشىن جاڭا نىساندار سالىنادى. بۋراباي كولىنەن باسقا, ۇلكەن جانە كىشى شاباقتى كولدەرىن اباتتاندىرۋ دا جوسپارلانىپ وتىر. ءمينيستردىڭ سوزىنە سەنسەك, 2018-2019 جىلدارى ششۋچە-بۋراباي كۋرورتتى ايماعىنداعى احۋال مۇلدەم باسقاشا تۇرلەنىپ, ادام تانىماستاي وزگەرمەك. «جالپى ءتۋريزمدى دامىتۋعا قاتىستى جوسپار كوپ. اسىرەسە, «رۋحاني جاڭعىرۋ» باعدارلاماسىن ىسكە اسىرۋ ارقىلى ىشكى ءتۋريزمدى دامىتۋدى ىنتالاندىرۋدى جالعاستىرماقپىز. ىشكى جانە سىرتقى ءتۋريزمدى دامىتۋ ءۇشىن اۋقىمدى اقپاراتتىق ناۋقاندى ىسكە قوسۋ جوسپارلانىپ وتىر. بۇدان وزگە, ەلەكتروندى ۆيزانى ەنگىزۋ دە تۋريستەر اعىمىن كوبەيتەدى دەگەن سەنىمدەمىز. ەڭ باستىسى, تۋريزمگە دەگەن جاڭا كوزقاراس قالىپتاسىپ, الەمدەگى ەڭ ۇزدىك تۋريستىك كليمات قالىپتاستىرا الۋىمىز كەرەك», دەدى ول.
قىمبات توقتامۇرات,
«ەگەمەن قازاقستان»
