ەندى اقساي قالالىق №8 جالپى ورتا ءبىلىم بەرەتىن مەكتەبى اتالاتىن بۇل ءبىلىم عيماراتىنا وتكەن جىلى عانا پايدا بولعان 100 ۇيلىك ارالتال شاعىن اۋدانىنىڭ بالالارى بارادى. مەكتەپ عيماراتى تولىقتاي زاماناۋي ۇلگىدە سالىنىپ, قاجەتتى كەرەك-جاراقتارمەن قامتاماسىز ەتىلگەن. مۇندا سپورت زالدارى, اسحانا, زەرتحانا كابينەتتەرى مەن شەبەرحانا, سونداي-اق شاعىن ورتالىق جۇمىسىنا ارنالعان ارنايى ورىندار اشىلعان.
مەكتەپ عيماراتىنىڭ اشىلۋ سالتاناتىنا باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ قاتىسىپ, بارلىق اتا-انالار مەن مۇعالىمدەردى, وقۋشىلاردى ايتۋلى وقيعامەن قۇتتىقتادى.
- ەلباسى بيىلعى جولداۋىنىڭ «ادامي كاپيتال – جاڭعىرۋ نەگىزى» اتتى جەتىنشى باعىتىندا ەلىمىزدەگى ءبىلىم بەرۋ سالاسىنا ەرەكشە كوڭىل ءبولىپ, بۇل ىستە وزىق جۇيەنى قالىپتاستىرۋ كەرەكتىگىن ايتقانىنا توقتالدى. سونداي-اق «رۋحاني جاڭعىرۋ» باعدارلاماسىندا دا مەملەكەتتىڭ العا دامۋى تەك ءبىلىمنىڭ سالتانات قۇرۋى ارقىلى عانا مۇمكىن دەپ ايتىلعان. بۇل ورايدا وبلىس كولەمىندە اتقارىلعان اۋقىمدى ىستەر كوپ. جىل سايىن ءبىلىم ساپاسىن كوتەرۋ, مۇعالىمدەردىڭ بىلىكتىلىگىن ارتتىرۋ باعىتىندا تىنباي جۇمىس جاسالىپ, جاڭا ءبىلىم بەرۋ نىساندارىنىڭ قۇرىلىسى جۇرگىزىلىپ جاتىر, - دەدى عابيدوللا وسپانقۇلوۆ.
وتكەن جىلى باتىس قازاقستان وبلىسىندا 24 ءبىلىم بەرۋ نىسانى سالىنسا, بيىل قاڭتار ايىنىڭ وزىندە جاڭادان 2 مەكتەپ پايدالانۋعا بەرىلدى.
قازبەك قۇتتىمۇرات ۇلى
«ەگەمەن قازاقستان»
سۋرەتتەردى تۇسىرگەن ايباتىر نۇراش
باتىس قازاقستان
