ەندى ەكى جىلدان بەرى سول شىرعالاڭدى ەكرانداۋعا بايلانىستى ءجۇرىپ جاتقان حالىقارالىق كينوجوبانىڭ ناتيجەسىندە «ايدىڭ ارعى بەتى» اتتى فيلم تۇسىرىلمەك.
جاڭا جوباعا بايلانىستى وتكەن ءباسپاسوز ءماسليحاتىندا «ايدىڭ ارعى بەتى» كىتابىنىڭ اۆتورى, زاڭگەر يگور ياريماك پەن كينوپروديۋسەر ساكەن بەلگىباەۆ كارتينا ساتىمەن ءتۇسىرىلىپ, الەمدىك پروكاتقا شىقسا, ەۋروپانىڭ ەكى مەملەكەتىنەن-اق فيلمگە كەتكەن 10 ميلليون ەۋرو قايتاتىنىنا سەنىمدى ەكەندىكتەرىن مالىمدەدى. بەرلين, روتتەردام كينوفەستيۆالدەرىنىڭ جەتەكشىلەرى دە بۇل كينو-يدەيانىڭ تابىستى بولاتىنىنا وڭ پىكىر بىلدىرگەن.
ەسكە سالا كەتەيىك, بۇكىلالەمدىك باق جارىسا جازعان بۇل اتىشۋلى وقيعا 2000 جىلدىڭ 24 مامىرىندا قازاقستاندىق حاكەر ولەگ زەزەۆ Bloomberg Financial News قارجىلىق جۇيەسى مەن نيۋ-يورك مەرى مايكل بلۋمبەرگتىڭ جەكە پوشتاسىنا بۇزىپ كىرگەن كەزدە باستالدى. بۇل «حاكەرلەر ىسىنە» قاتىستى بۇكىل الەمدى دۇرلىكتىرگەن وقيعاعا اينالدى. ناتيجەسىندە, ولەگ زەزەۆ ءتورت جىلعا سوتتالدى. زاڭگەر يگور ياريماك لوندونداعى بريكستون تۇرمەسىندە ەكى جىلىن جانە نيۋ-يوركتەگى امەريكالىق فەدەرالدىق تۇرمەدە ءبىر جىلىن تۇتقىندا وتكىزۋگە ءماجبۇر بولدى. بۇكىل وسى ۋاقىت بويى ول ءوزىنىڭ ايىپسىز ەكەندىگىن دالەلدەۋمەن بولدى, اقىرىندا 2003 جىلى وعان تاعىلعان بۇكىل ايىپ الىنىپ تاستالدى.
فيلم يگور ياريماكتىڭ وسى شىنايى وقيعالارعا قاتىستى جازعان «ايدىڭ ارعى بەتى» اتتى بەستسەللەرىنىڭ نەگىزىندە تۇسىرىلەدى. كىتاپقا جانە فيلمگە قاتىستى پاتەنت پەن اۆتورلىق قۇقىق بار. اتالمىش كينو قازاقستان, اقش, يرلانديا, يسپانيا, شوتلانديا جانە انگليادا تۇسىرىلەدى دەپ جوسپارلانىپ وتىر.
ايناش ەسالي,
«ەگەمەن قازاقستان»
الماتى
