قازىرگى تاڭدا قازاقستان سپورتشىلارى قىسقى سپورتتىڭ بىرنەشە تۇرىنەن 49 ليتسەنزيا ۇتىپ الدى. ولاردىڭ قاتارىندا مەدالعا دەگەن ۇمىتكەرلەر دە از ەمەس. ەلسيار قاناعاتوۆتىڭ ايتۋىنشا, ولار فريستايلشىلار دميتري رەيxەرد, يۋليا گالىشەۆا, جانبوتا الدابەرگەنوۆا, مانەرلەپ سىرعاناۋشى دەنيس تەن, شاڭعىشى الەكسەي پولتورانين سىندى ساڭلاقتار.
– سپورتشىلاردىڭ دايىندىعى ويداعىداي. ۇوك, فەدەراتسيالاردىڭ جانە مسم تاراپىنان قولداۋ كورسەتىلۋدە. بىرنەشە كۇندە ليتسەنزيالارىمىزدىڭ سانى انىق بەلگىلى بولادى. سپورتشىلارىمىزعا جەڭىس تىلەيمىز, – دەدى مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ.
سونداي-اق كوميتەت توراعاسى وليمپيادا جەڭىمپازى مەن جۇلدەگەرلەرىنە مەملەكەت تاراپىنان سىياقى بەرىلەتىنىن ايتتى. «وليمپيادا چەمپيونى اتانعان سپورتشى مەن ونىڭ جاتتىقتىرۋشىسىنا مەملەكەت 250 مىڭ اقش دوللارى كولەمىندە سىياقى تاعايىنداعان. كۇمىس مەدال العان سپورتشىعا 150 مىڭ, ال قولاعا قول جەتكىزگەن سپورتشىعا 75 مىڭ اقش دوللارى بەرىلەدى. سونىمەن قاتار ۇزدىك التىلىققا ەنگەن سپورتشىعا دا قارجىلاي سىياقى قاراستىرىلعان», دەدى ول.
ال پxەنچxان قالاسىنداعى قىسقى وليمپيادا ويىندارى ەكى كلاستەردە ورنالاسقان 12 سپورتتىق نىساندا وتكىزىلەدى. پxەنچxان تاۋلى كلاستەرىندە شاڭعى سپورتىنان جارىستار وتسە, جاعاجايداعى كاننىڭ كلاستەرىندە كونكي سپورتىنىڭ شەبەرلەرى ءوزارا مىقتىنى انىقتايتىن بولادى. قازاقستان سپورتشىلارى وڭتۇستىك كورەياعا ءبىرىنشى اقپاننان باستاپ اتتانا باستايدى.
– وسى تارتىستى دوداعا دايىندىق قارقىندى تۇردە وتۋدە. ءوزىمدى جاقسى جاعىمنان كورسەتىپ, ءبىر ناتيجەگە قول جەتكىزسەم دەيمىن. ءبىزدىڭ سپورت تۇرىنەن قازىر 3 ليتسەنزيا بار. مەنەن بولەك العاشقى رەت وليمپيادادا اقمارجان قالمۇرزاەۆا مەن مارجان اقجىگىت ونەر كورسەتەدى. ءتورتىنشى ليتسەنزيانى جىبەك اراپباەۆا جەڭىپ الادى دەپ ويلايمىز. بۇل مەن ءۇشىن ەكىنشى وليمپيادا. قوبالجىپ ءجۇرمىن, ويتكەنى ماعان سەنىم ارتۋشىلار كوپ, 2014 جىلى العاش بارعانىمدا قازىرگىدەي جاۋاپكەرشىلىك بولماعان ەدى, – دەدى باق وكىلدەرىنە بەرگەن سۇحباتىندا فريستايل-اكروباتشى جانبوتا الدابەرگەنوۆا.
سالتاناتتى شارا بارىسىندا ۇوك پرەزيدەنتى تيمۋر ق ۇلىباەۆ پەن مادەنيەت جانە سپورت ۆيتسە-ءمينيسترى ساكەن مۇسايبەكوۆ سپورتشىلارىمىزعا جەڭىس تىلەپ, اتتاندىردى. ەل نامىسىن قورعايتىن سپورتشىلار ءوز العىستارىن ءبىلدىرىپ, ەل ءۇمىتىن اقتاۋعا تىرىسامىز دەستى.
وليمپيادا اۋىلىندا ەلىمىزدىڭ تۋى 7 اقپان كۇنى كوتەرىلەدى. ايتا كەتەيىك, پحەنچحانداعى قىسقى وليمپيادا ويىندارى اقپاننىڭ 9-ى مەن 25-ءى ارالىعىندا وتەدى. اشىلۋ سالتاناتىندا ەلىمىزدىڭ كوك تۋىن شورت-ترەكشى ابزال اجىعاليەۆ ۇستاپ شىعادى.
ايناش ەسالي,
«ەگەمەن قازاقستان»
الماتى
