سەگىز جاسار بالا بولاشاقتا عارىشكەر بولىپ, اسپان الەمىن زەرتتەۋدى ارماندايدى. تالابىمەن تاس جارعان نۇرمۇحامماد وتكەن جىلى مالايزيا مەملەكەتىنىڭ استاناسى كۋالا-لۋمپۋر قالاسىنىڭ «Genting International Convention Centre» بازاسىندا «يۋسماس» اكادەمياسىنىڭ ۇيىمداستىرۋىمەن مەنتالدى اريفمەتيكا باعدارلاماسى بويىنشا وتكەن جارىستان جۇلدەمەن ورالعان ەدى. وسىمەن 22-ءشى رەت ۇيىمداستىرىلىپ وتىرعان حالىقارالىق جارىسقا الەمنىڭ 45 ەلىنەن 3000-نان اسا وقۋشى قاتىسقان. ال ىزدەنىمپاز نۇرمۇحامماد اتىمتاي وسى سىندا ەكىنشى ورىن يەلەندى.
حالىقارالىق باسەكەنىڭ تالابى بويىنشا ءاربىر قاتىسۋشى 8 مينۋتتا 200 ەسەپتى شىعارۋى كەرەك ەكەن. نۇرمۇحاممادتىڭ ويشا ەسەپتەۋدەگى شاپشاڭدىعى الەمنىڭ ءبىلىمدى بالالارىنىڭ اراسىندا قىزىعۋشىلىق تۋعىزعان. ەندى نۇرمۇحامماد جاراتىلىستانۋ عىلىمدارىن ۇيرەنۋ ءۇشىن ماتەماتيكانى تولىق مەڭگەرۋ جولىندا ىزدەنۋ ۇستىندە.
ۇلىنىڭ تالابىن سەزگەن اكەسى باتىرحان اتىمتاي ۇلى «يۋسماس» حالىقارالىق مەنتالدى اريفمەتيكا اكادەمياسى جايلى تەلەديداردان ەستىگەن ەكەن. ءسويتىپ ءۇش بالاسىن دا سول اكادەمياعا وقۋعا بەرگەن. اراعا جىل سالىپ كەنجە ۇلى نۇرمۇحامماد بيىك بەلەستى باعىندىرىپ وتىر. ەندى ول بيىل يراننىڭ تاربيدزە قالاسىندا وتەتىن حالىقارالىق جارىسقا قاتىساتىن بولادى.
بۇگىندە الەمدىك رەكوردتار كىتابىنا ەنگەن «يۋسماس» حالىقارالىق اكادەمياسىنىڭ ورتالىقتارى ەلىمىزدىڭ بارلىق وڭىرىندە جۇمىس ىستەيدى. ەل ىشىندەگى ەرەكشە دارىنداردىڭ ءبىلىمىن جەتىلدىرىپ, تالابىن اسقاقتاتاتىن اكادەميا بولاشاقتا دا نۇرمۇحامماد سياقتى كىشكەنتاي ماتەماتيكتەردى تاربيەلەي بەرمەك.
حاميت ەسامان,
«ەگەمەن قازاقستان»
جامبىل وبلىسى
