«بۇل اۋعانستان ءۇشىن عانا ەمەس, ەلدەگى بەيبىتشىلىك پەن دامۋدى قالپىنا كەلتىرۋگە اتسالىسىپ جاتقان حالىقارالىق قوعامداستىققا قارسى جاسالعان قانقۇيلى جانە ورەسكەل ارەكەت. قازاقستان تاراپى جاۋاپكەرشىلىكتى سەزىنە وتىرىپ, اۋعانستانداعى تەرروريزم ماسەلەسىن تۇبەگەيلى شەشۋ ءۇشىن جەدەل شارالار قابىلداۋ قاجەت ەكەنىن مالىمدەيدى», دەلىنگەن سىرتقى ىستەر مينيسترلىگى تاراتقان مالىمدەمەدە.
قازاقستان تاراپى اۋعانستانداعى بارلىق ساياسي كۇشتەردى تاتۋلاسۋ بويىنشا كەلىسسوزدەر جۇرگىزۋگە شاقىرادى. سونىمەن قاتار بۇۇ قاۋىپسىزدىك كەڭەسىنىڭ توراعاسى رەتىندە ەلدەگى جاعدايدى تۇراقتاندىرۋعا, تەرروريزمدى جويۋعا جانە قالپىنا كەلتىرۋگە جان-جاقتى جاردەم كورسەتەتىنى ايتىلعان.
«بۇۇ قاۋىپسىزدىك كەڭەسى توراعاسىنىڭ قاڭتاردا قابىلداعان مالىمدەمەسى حالىقارالىق قوعامداستىقتى ەلدەگى ساياسي جاعدايدى تۇراقتاندىرۋ ماقساتىندا اۋعانستانعا قولداۋ كورسەتۋگە شاقىرادى. قازا بولعانداردىڭ تۋىستارى مەن جاقىندارىنا كوڭىل ايتامىز, سونداي-اق جاراقات العانداردىڭ تەز ارادا ساۋىعىپ كەتۋىن تىلەيمىز», دەلىنگەن مينيسترلىكتىڭ مالىمدەمەسىندە.
سەنبى كۇنى كابۋلداعى «ينتەركونتينەنتال» قوناق ۇيىنە قارۋلى باسبۇزارلار باسىپ كىرىپ, 20-دان استام ادامدى جايراتىپ سالعان. وقيعانى «تاليبان» تەرروريستىك ۇيىمى ءوز موينىنا الىپ وتىر. قازا تاپقاندار اراسىندا قازاقستاندىق ءبىر ازامات بار. باقيلىق بولعان وتانداسىمىزدىڭ وتباسى مەن تۋعان-تۋىستارىنا قايعىرىپ كوڭىل ايتامىز.
