مەملەكەت باسشىسى ەلىمىز جاڭا الەم كوشباسشىسىنا اينالۋ ءۇشىن جاس ۇرپاقتى جاڭا تەحنولوگيالىق مۇمكىندىكتەردى يگەرۋگە, ءوز بەتىمەن عىلىم, ءبىلىم ىزدەنۋگە ۇندەپ, بۇگىنگى كۇننىڭ تالابىنا ساي يننوۆاتسيا, «تسيفرلى قازاقستان», IT سالالارىن دامىتۋدىڭ باعدارلامالارىن جەتىلدىرۋدى تاپسىردى. سونىمەن قاتار ەلىمىزگە دامۋدىڭ جاڭا ساپاسى قاجەت ەكەنىن جەتكىزدى.
ەلباسى حالىققا ارناعان جولداۋىندا: «بۇگىندە الەم ءتورتىنشى ونەركاسىپتىك رەۆوليۋتسيا داۋىرىنە, تەحنولوگيالىق, ەكونوميكالىق جانە الەۋمەتتىك سالالارداعى تەرەڭ جانە قارقىندى وزگەرىستەر كەزەڭىنە قادام باسىپ كەلەدى. جاڭا تەحنولوگيالىق قالىپ ءبىزدىڭ قالاي جۇمىس ىستەيتىنىمىزدى, ازاماتتىق قۇقىقتارىمىزدى قالاي ىسكە اسىراتىنىمىزدى, بالالارىمىزدى قالاي تاربيەلەيتىنىمىزدى تۇبەگەيلى وزگەرتۋدە», دەدى.
راسىندا, ەلىمىز ەتەك-جەڭىن بۇتىندەگەن ەگەمەن مەملەكەت بولىپ, وزىندىك سيپاتى مەن الەۋەتى ايقىن, تەگەۋرىندى ۇلت رەتىندە بەرىك تە بەكەم قالىپتاسىپ, الەمدىك كەز كەلگەن وزگەرىسكە بەيىمدەلىپ ۇلگەردى. سوندىقتان ەلىمىزدىڭ بۇگىنگى-ەرتەڭگى ءوسىپ-وركەندەۋ باعدارىن تەك وسى تۇرعىدان باعامدايمىز.
ويتكەنى مەملەكەتىمىزدىڭ رۋحاني تىرەگى بولعان يسلام ءدىنى ءبىلىم مەن عىلىمي وزگەرىستەرگە بەيىمدەلۋدى قۇپتاپ, قۋاتتاي تۇسەدى. اسىل دىنىمىزدە مۇسىلمان ۇمبەتىنە, كۇللى ادامزات بالاسىنا پارىز بولعان امالدىڭ ءبىرى – ءبىلىم مەن عىلىم ۇيرەنۋ. ءبىلىمدى مۇسىلمان – تولىققاندى مۇسىلمان. قۇراننىڭ ادام بالاسىنا تۇسىرگەن ءبىرىنشى ءسوزى – «وقى!» دەپ باستالعانى بەكەر ەمەس. قاسيەتتى قۇران كارىمنىڭ ء«مۇجادالا» سۇرەسىنىڭ 11-اياتىندا: «اللا تاعالا سەندەردەن يمان كەلتىرگەندەردىڭ, عىلىم بەرگەندەردىڭ دارەجەلەرىن كوتەرەدى, ىستەگەندەرىڭدى تولىق بىلەدى», – دەلىنگەن.
ەلباسى ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا جۇرتىمىزدى جاھاندىق ۇدەرىستەرگە بەيىمدەۋدىڭ باعىت-باعدارىن ۇنەمى جەتىلدىرىپ وتىرۋدى تاپسىردى.
«بارلىق جاستاعى ازاماتتاردى قامتيتىن ءبىلىم بەرۋ ىسىندە ءوزىمىزدىڭ وزىق جۇيەمىزدى قۇرۋدى جەدەلدەتۋ قاجەت. ءبىلىم بەرۋ باعدارلامالارىنىڭ نەگىزگى باسىمدىعى وزگەرىستەرگە ۇنەمى بەيىم بولۋ جانە جاڭا ءبىلىمدى مەڭگەرۋ قابىلەتىن دامىتۋ بولۋعا ءتيىس», دەپ اتاپ ءوتتى ن.نازارباەۆ.
وسى رەتتە مەملەكەت باسشىسى ۇلتىمىزدىڭ ءداستۇرى مەن مادەنيەتىن بويىنا سىڭىرگەن ۇلتجاندى ۇرپاق تاربيەلەۋدىڭ ءمان-ماڭىزىنا دا توقتالدى. بۇل – كوكەيتەستى ماسەلە, كەلەلى پىكىر. ويتكەنى, نارىقتىق ەكونوميكاعا ءبىرجولا كوشكەن قوعامدىق-الەۋمەتتىك قاتىناس جاعدايىندا ءومىر ءسۇرۋ قارەكەتىمىز بەن مادەنيەتىمىز قانداي قالىپتا دامىپ جاتىر دەگەن ساۋال تۋىندايدى. بۇل ماسەلەنى ۇمىتپاۋ كەرەك.
«ۇلتتىڭ الەۋەتىن ارتتىرۋ ءۇشىن مادەنيەتىمىز بەن يدەولوگيامىزدى ودان ءارى دامىتۋىمىز كەرەك. «رۋحاني جاڭعىرۋدىڭ» ءمان-ماڭىزى دا ناق وسىندا. ءوزىنىڭ تاريحىن, ءتىلىن, مادەنيەتىن بىلەتىن, سونداي-اق زامانىنا لايىق, شەت تىلدەرىن مەڭگەرگەن, وزىق ءارى جاھاندىق كوزقاراسى بار قازاقستاندىق ءبىزدىڭ قوعامىمىزدىڭ يدەالىنا اينالۋعا ءتيىس», دەدى پرەزيدەنت.
حالىقتىڭ ءدىني كوزقاراسىن بىلىممەن ۇشتاستىرىپ, كوزى اشىق, كوكىرەگى وياۋ وزىق جاماعاتتى قالىپتاستىرۋ – قازاقستان مۇسىلماندارى ءدىني باسقارماسىنىڭ باستى مىندەتتەرىنىڭ ءبىرى. قازىرگى ۋاقىتتا ءدىن ماماندارىنىڭ, يمامدار مەن يسلامتانۋشى عالىمداردىڭ بەدەل-مəرتەبەسىن كوتەرىپ, ولاردىڭ ءدىني ھəم زايىرلى ءبىلىمدى يگەرۋى – زامان تالابى. بۇل باعىتتا ءدىني باسقارما تاراپىنان «قازىرگى زاماننىڭ ۇزدىك 500 زيالى يمامى» جوباسى قولعا الىندى. ال بۇل تۇپتەپ كەلگەندە, وركەنيەت قۇنارىمەن نارلەنگەن بىلىكتى ماماننىڭ قالىپتاسۋىنا, سول ارقىلى قوعامنىڭ سۇرانىسىنا ساي ءدىني كادر دايارلاۋعا ءوز سەپتىگىن تيگىزەدى.
ەلباسى جولداۋىندا باسا ايتىپ وتكەن «رۋحاني جاڭعىرۋ» باستاماسى جاڭا ساتىداعى ورىستىلىكتىڭ جولىنا شىققان مەملەكەتىمىزدىڭ وقۋ, ءبىلىم جۇيەسىنە, ۇرپاق تاربيەسىنە, ادامداردىڭ بيىك پاراسات مۇددەسىنە, تالعامىنا, كوبىرەك كوڭىل بولەتىن كەڭ اۋقىمدى شەشىمدەر مەن اركەتتەردىڭ جالعاسى دەپ ايتۋعا بولادى. بۇل – دىنىمىزگە, داستۇرىمىزگە, تاريحىمىزعا, ساباقتاسىپ كەلە جاتقان اسىل قۇندىلىقتارىمىزعا دەگەن مەملەكەتىمىزدىڭ قامقورلىعى.
دىنىمىزدە مۇسىلمان ادامنىڭ قۇلشىلىعى, باسقا ادامدارمەن قارىم-قاتىناسى, مىنەز-قۇلقى سىندى بارلىق ىستەرى ماقساتتى تۇردە جۇيەلەنگەن جوسپاردان تۇرادى. بۇل تۇرعىدا كۇللى مۇسىلمان ۇمبەتىنە ءجۇسىپ پايعامباردىڭ ءومىرى ونەگە. ول ءوزى ءومىر سۇرگەن قاۋىمعا جۇت كەلىپ, ەگىنسىز كەزەڭ كەلەتىنىن سەزىپ, ادامدارعا ودان شىعۋدىڭ جولىن سىلتەيدى. ءجۇسىپ پايعامباردىڭ قاۋىمعا قالايشا جوسپار قۇرىپ بەرگەندىگى قۇراننىڭ ء«جۇسىپ» سۇرەسىنىڭ, 47, 48, 49-اياتتارىندا باياندالعان: ء«جۇسىپ ايتتى: «جەتى جىل ۇدايى ەگىن ەگەسىڭدەر دە سوندا ورعان استىقتان ازداپ باستىرىپ الىپ, قالعانىن ساباعىمەن قوياسىڭدار (بۇزىلماس ءۇشىن). ال سودان كەيىن جەتى جىل قۋاڭشىلىق بولادى, (سوندا) بۇرىنعى جيناعان استىقتارىڭدى جەيسىڭدەر, از مولشەردەگىسىن عانا (ۇرىققا) ساقتايسىڭدار. ونىڭ ارتىنان جاڭبىر مول جاۋاتىن جىلدار كەلىپ, ادامدار جەمىس شىرىنىن ساۋاتىن بولادى» دەدى.
مىنە, قاسيەتتى قۇراندا دا اللا تاعالا ادامزات بۋىنى وسىناۋ قىراعىلىق قاسيەتىنىڭ ارقاسىندا قابىرعاسىن قاتايتىپ, بۇعاناسىن بەكىتە تۇسكەنى تۋرالى جەتكىزگەن. سوندىقتان, ىزگىلىك پەن يگىلىكتى ماقسات ەتىپ, ەلدىڭ قامى ءۇشىن قىزمەت ەتۋ – ءار مۇسىلمانعا ءتان قاسيەت.
سەرىكباي قاجى وراز,
قازاقستان مۇسىلماندارى
ءدىني باسقارماسىنىڭ توراعاسى, باس ءمۇفتي
