وعان وبلىستاعى باسقارمالار, ۆەدومستۆولار, جوعارى وقۋ ورىندارىنىڭ جانە بۇقارالىق اقپارات قۇرالدارىنىڭ باسشىلارى قاتىستى. سونىمەن قاتار وبلىستاعى اۋداندار مەن قالالار اكىمدەرى, سول جەرلەردەگى اۋىلدىق اكىمدەر مەن ءبىلىم وشاقتارىنىڭ, شارۋاشىلىقتاردىڭ باسشىلارى سەلەكتورلىق رەجىمگە قوسىلىپ, تىكەلەي بايلانىستا تالقىلاۋعا قاتىسىپ وتىردى. جولداۋدى وسى جولعى تالقىلاۋعا بارلىعى ەكى مىڭعا جۋىق ادامدى قامتىدى.
جولداۋدا جاھاندىق باسەكەگە قابىلەتتى بولۋ ءۇشىن دامۋدىڭ يندۋستريالاندىرۋ, اۋىل شارۋاشىلىعى, كولىك ينفراقۇرىلىمى, قارجى سەكتورى, IT-تەحنولوگيالار سالالارىن قامتىعان ون باسىم باعىتى كورسەتىلگەن ەدى. جولداۋدا سونىمەن قاتار ادامي كاپيتالعا نازار اۋدارىلعان بولاتىن. ەلباسى ماقسات ەتىپ قويعان باسەكەگە قابىلەتتى, ءۇش ءتىلدى مەڭگەرگەن, وزىق ويلى جاس ۇرپاق قالىپتاستىرۋ ءۇشىن دەنساۋلىق ساقتاۋ جانە ءبىلىم بەرۋ ساپاسىن ارتتىرۋ بيىك مىندەت بولىپ تابىلادى. وسىعان وراي وبلىس اكىمىنىڭ ورىنباسارى مارات جۇندىباەۆ وبلىستا اتقارىلىپ وتىرعان شارالاردان اقپارات بەردى.
ەلباسى وسىعان دەيىنگى جولداۋلارىندا دا حالىقتىڭ الەۋمەتتىك جاعدايىنا, ونىڭ ىشىندە ءبىلىم بەرۋ ءىسىن ستراتەگيالىق مىندەتتەردىڭ ءبىرى دەپ قاراستىرادى. قوستاناي وبلىسىندا دا جىل سايىن بيۋدجەتتىڭ باسىم بولىگى وسى ماقساتقا جۇمسالادى. بىلتىر وعان جۇمسالعان قارجى بۇرناعى جىلعا قاراعاندا 3,1 ميلليارد تەڭگەگە كوبەيىپ, 62 ميلليارد تەڭگەنى قۇرادى. ەلباسى تاپسىرماسىنا سايكەس بالالاردى ەرتە جاستان وقىتۋ ءىسى جۇزەگە اسىرىلىپ كەلەدى. وبلىستا بۇگىندە مەكتەپكە دەيىنگى 619 مەكەمە جۇمىس ىستەيدى, ونىڭ ىشىندە 183 بالا-باقشا, 436 شاعىن ورتالىق بار.
وبلىستا دەنساۋلىق ساقتاۋ سالاسى دا ۋاقىتتان قالماي دامىپ كەلەدى. وتكەن جىلى بۇل سالاعا 2,2 ملرد تەڭگەگە وزىق ۇلگىدەگى قۇرال-جابدىقتار الىندى. وبلىستاعى مەديتسينا مەكەمەلەرى كومپيۋتەرمەن 90 پايىزدان استامعا جابدىقتالدى. الايدا مەديتسينا مەكەمەلەرىنىڭ كەڭ جولاقتى ينتەرنەت جەلىسىنە قوسىلۋى 28 پايىزدى قۇراپ وتىر. ول اۋىلدىق جەرلەردەگى تەحنيكالىق مۇمكىندىكتەردىڭ ازدىعىنان بولىپ وتىر. ول ءۇشىن قوسىمشا قۇرالدار ساتىپ الۋعا 484 ميلليون تەڭگە قاجەت. بيىل وبلىستا تاعى دا 216 دەنساۋلىق ساقتاۋ نىسانىن كەڭ جولاقتى ينتەرنەت جەلىسىنە قوسۋ ءۇشىن جۇمىستار جۇرگىزىلەتىن بولادى.
وبلىستىڭ الەۋمەتتىك سالاسىندا جۇزەگە اسقان جۇمىستاردىڭ بارلىعى دا وڭىردە دامۋدىڭ ىرگەتاسى, ءتۇپ نەگىزى بولاتىن ادامي كاپيتالدى دامىتۋعا ىقپال ەتەرى ءسوزسىز. اكتيۆتە قوستاناي قالاسىنىڭ اكىمى بازىل جاقىپوۆ وبلىس ورتالىعىن دامىتۋ ماسەلەسى جونىندە, «سسكوب» اق پرەزيدەنتى بەرەكە مۇحامەتقاليەۆ كەن الىبىنداعى ۇزدىك تەحنولوگيالىق جاڭالىقتاردى, «بكستروي» قۇرىلىس كومپانياسىنىڭ جەتەكشىسى يگور كيم وبلىستا جۇرگىزىلىپ جاتقان «نۇرلى جەر» باعدارلاماسىنىڭ شەڭبەرىندەگى جۇمىستاردىڭ بارىسى, «جاس قانات-2006» قۇس فابريكاسىنىڭ ديرەكتورى قايرات مايىشەۆ وندىرىستەگى جاڭعىرتۋ جۇمىستارى جانە چەليابى ۋنيۆەرسيتەتىنىڭ قوستاناي فيليالىنىڭ وقىتۋشىسى ءالىمجان بەكماعانبەتوۆ قوعامدىق قاتىناستار جونىندە ايتىپ, جولداۋداعى ون باسىمدىقتىڭ ەل ەكونوميكاسى مەن الەۋمەتتىك سالالاردى, رۋحاني سالانى دامىتۋداعى تەمىرقازىق سەكىلدى باستى باعىت بولا بەرەتىنىنە جۇرت نازارىن اۋداردى.
تالقىلاۋدى قورىتىندىلاعان وبلىس اكىمى ارحيمەد مۇحامبەتوۆ وبلىستا اتقارىلاتىن باستى جۇمىستارعا توقتالدى. وتكەن جىلى وبلىستا يندۋستريالىق ايماقتىڭ ىرگەسى قالانىپ, وعان ورنالاسقان ينۆەستورلىق كاسىپورىن بيىل جازدا العاشقى ءونىمىن دە بەرەدى. جولداۋدا ايتىلعان ون باسىمدىق بويىنشا دا وبلىستا جۇمىس جۇرەتىن بولادى. سوعان وراي اكىم ءتيىستى باسشىلارعا جۇمىستاردى جوسپارلاپ, تياناقتاۋدى تاپسىردى.
ءنازيرا جارىمبەت,
«ەگەمەن قازاقستان»
قوستاناي
