دەپارتامەنت قىزمەتكەرى الەنا مينگازوۆانىڭ مالىمەتىنشە, قايعىلى جاعداي بۇگىن استانا ۋاقىتىمەن ساعات 10-30 شاماسىندا بولعان.
«ىرعىز اۋدانىنىڭ قالىباي اۋىلىنا جاقىن ماڭدا اۆتوبۋستان ءورت شىقتى. «يكارۋس» ماركالى اۆتوبۋس ىشىنەن شىققان ءورت سالدارىنان 52 جولاۋشى كوز جۇمدى. ولاردىڭ بارلىعى وزبەكستان ازاماتى. وقيعا ورنىنا ءورت سوندىرۋگە ارنالعان 2 تەحنيكا مەن 8 ادام جىبەرىلدى. بۇل جەر وبلىس ورتالىعىنان 320 شاقىرىم قاشىقتا ورنالاسقان. اپاتتىڭ شىعۋ سەبەبىنە قاتىستى ناقتى مالىمەت جوق, انىقتالىپ جاتىر»,- دەيدى ول.
ءتىرى قالعان 3 قازاقستاندىق, 2 وزبەكستاندىق ازامات اۋرۋحاناعا جەتكىزىلدى. اقتوبە وبلىستىق تدج مەن وبلىس اكىمىنىڭ ورىنباسارى جەدەل شتاب قۇردى. پوليتسيا, قۇتقارۋشى جاساق پەن پسيحولوگتار, دارىگەرلەردەن قۇرىلعان جەدەل جەلى ىسكە قوسىلدى.
قايتىس بولعانداردىڭ دەنەسىن الىپ كەتۋ ءۇشىن وزبەكستان توتەنشە جاعدايلار مينيسترلىگى ارنايى ۇشاق ازىرلەپ جاتىر. سونداي-اق اپاتتىڭ ءمان-جايىن تەكسەرۋ جانە زارداپ شەككەندەر مەن قازا بولعانداردىڭ وتباسىنا جان-جاقتى كومەك كورسەتۋ ءۇشىن ارنايى ۇكىمەتتىك ۆەدومستۆوارالىق كوميسسيا قۇرىلدى. ونىڭ قۇرامىندا ىشكى ىستەر ءمينيسترىنىڭ ورىنباسارى ەرلان تۋرگۋمباەۆ, دەنساۋلىق ساقتاۋ ۆيتسە-ءمينيسترى الەكسەي تسوي, ينۆەستيتسيالار جانە دامۋ ۆيتسە-ءمينيسترى رومان سكليار, سىرتقى ىستەر مينيسترلىگىنىڭ دەپارتامەنت ديرەكتورى ارداق ماديەۆ, وبلىستىڭ قۇقىق قورعاۋ جانە باسقا دا ورگاندارىنىڭ وكىلدەرى بار.
