ۋكراينانىڭ ونەركاسىپتى ۇلكەن قالالارىنىڭ ءبىرى دنەپروپەتروۆسك كوشەلەرىنىڭ بىرىندەگى قوقىس جاشىگىنە جارىلعىش زات جاسىرىلعان. ەشتەڭەمەن شارۋاسى جوق, كوشەدە كەتىپ بارا جاتقان زارداپ شەگۋشى ونىڭ ىشىنە بوس شيشانى لاقتىرىپ قالعاندا, جارىلعىش زات ىسكە قوسىلىپ, سونىڭ سالدارىنان ول سول جەردە كوز جۇمعان.
وبلىستىق پروكۋراتۋرا بۇل قىلمىستى ءىستى الدىمەن «قاساقانا كىسى ءولتىرۋ» دەگەن قىلمىستىق باپقا جاتقىزعان ەدى. بىراق قوسىمشا مالىمەتتەر جينالعان سوڭ «تەرروريزم» بابىنا جاتقىزىپ وتىر. قازىر وسى باپپەن قىلمىستىق ءىس قوزعالدى. ءسويتىپ, تەرروريستەر ۋكراينا قالالارىنا دا جەتە باستاعان سىڭايلى.
اق ۇيگە دە دالدەپ وق اتىلدى
اقش-تىڭ اق ۇيىنە قارسى دا وق اتىلدى. ونىڭ تەرەزەسىنە تيگەن وق «كالاشنيكوۆ» اۆتوماتىنان شىققان دەگەن بولجام بار. ول وق وتكىزبەيتىن تەرەزەگە شاعىلىپ, جەرگە تۇسكەن. ال ەكىنشى وق ءۇيدىڭ قابىرعاسىنا قادالىپتى.
بۇل ۋاقىتتا اق ءۇيدىڭ قوجايىنى باراك وباما كاليفورنيا شتاتىندا باسكەتبول جارىسىن تاماشالاپ وتىرعان ەكەن. اقش-تىڭ ارناۋلى قىزمەتتەرى وقيعانىڭ سەبەپكەرلەرىن تابۋعا قىزۋ كىرىسىپ كەتتى. بىراق ولار جۇما كۇنى ۆاشينگتوندا بولعان اتىستى بۇل وقيعامەن ساباقتاستىرماي وتىر. ول جولى دا اق ءۇيدىڭ ماڭىندا وق اتىلىپ, ارتىنان سول ماڭنان ىشىندە «كالاشنيكوۆ» اۆتوماتى جاتقان يەسىز «حوندا» كولىگى تابىلعان بولاتىن.
ءتۇن تىنىشتىعىن تىلەدى
اۋعانستان پرەزيدەنتى حاميد كارزاي ءوز ەلىندە بەيبىتشىلىك ميسسياسىمەن جۇرگەن اقش پەن ناتو اسكەرلەرىنىڭ تۇنگى رەيدتەرىنە ءۇزىلدى-كەسىلدى قارسىلىق ءبىلدىرىپ وتىر. ويتكەنى, تۇنگى جورىقتاردان كەيىن بىرنەشە بەيبىت تۇرعىن قازاعا ۇشىرايدى ەكەن.
حاميد كارزاي اقش پەن ناتو اسكەرلەرىن 2014 جىلعا دەيىن ەل اۋماعىندا قالدىرۋدىڭ نەگىزگى شارتى وسى بولادى دەپ جاريالادى كەشە اشىلعان لوي جىرعادا. ال ناتو اسكەرلەرى, كەرىسىنشە, تۇنگى جورىقتاردىڭ وكىمەتكە نارازىلىقپەن باس كوتەرۋشىلەرگە قارسى ءتيىمدى ارەكەتتەر ەكەنىن ايتۋدا. بىراق تۇنگى جورىقتار كەزىندەگى تىنتۋلەر مەن قورقىتۋلار تۇرعىنداردىڭ نارازىلىعىن تۋدىراتىنى پرەزيدەنتتى قاتتى مازالايتىنى ايقىن اڭعارىلادى.
«ءىسى بىلمەس, كىسىسى بىلەردىڭ» كەرى
قىلمىستى ىسكە بايلانىستى جاۋاپ بەرۋگە كەلمەگەن «ينتەكو» فيرماسىنىڭ يەسى ەلەنا باتۋريناعا ماسكەۋ سوتى سۇعىن قاتتى قاداپ وتىر. ەندى كەلمەسە, ول كۇش قولدانۋ ارقىلى جەتكىزىلۋى مۇمكىن دەگەن حابار تاراتىلدى. ال ونىڭ جۇبايى يۋ.لۋجكوۆ بۇل ءىستىڭ ساياسي استارى بار ەكەنىن ايتۋدا.
جۋىردا عانا ماسكەۋگە كەلگەن بويىندا يۋ.لۋجكوۆ تۇتقىندالۋ مۇمكىندىگىنە بايلانىستى زايىبىنا شەت ەلدەن قايتپاۋدى قاتتى تاپسىرعانىن باق-قا اشىق ايتقان بولاتىن. ءىس «بانك موسكۆانىڭ» 2009 جىلى قالا بيلىگىنەن قوسىمشا ەميسسياعا دەپ بولگەن ۇلان-اسىر قاراجاتقا ە.باتۋرينانىڭ جەرىن الۋىنا بايلانىستى بولىپ وتىر. قۇجات جۇزىندە ءبارى دە دۇرىس جاسالعان بۇل ءىستىڭ جەكە باستىڭ پايداسىن كوزدەگەنى, ارينە, بەسەنەدەن بەلگىلى.
«ەۋرو-2012»-دە وينايتىندار انىقتالدى
فۋتبولدان ەۋروپانىڭ كەزەكتى چەمپيوناتىنا قاتىساتىن كوماندالار تۇپكىلىكتى انىقتالدى. بۇل حورۆاتيا مەن تۇركيا كوماندالارىنىڭ جاۋاپتى كەزدەسۋى 0:0 ەسەبىمەن اياقتالعاننان كەيىن بەلگىلى بولدى.
ءسويتىپ, ءبىرىنشى كارزەڭكەدە: ۋكراينا, پولشا, يسپانيا, گوللانديا; 2-دە گەرمانيا, يتاليا, انگليا, رەسەي; 3-دە حورۆاتيا, گرەكيا, شۆەتسيا, پورتۋگاليا; 4-دە دانيا, فرانتسيا, چەحيا, يرلانديا وينايتىن بولدى. وكىنىشكە قاراي, تۇرىك كومانداسى چەمپيوناتقا قاتىسا الماي قالدى.
اعايىنعا ارتىقشىلىق جوق
ۋكراينا مەن رەسەي اراسىنداعى گاز پروبلەماسى ءالى اياقتالار ەمەس. رەسەي پرەمەر-ءمينيسترىنىڭ ءباسپاسوز حاتشىسى دميتري پەسكوۆ بۇل ىستە جاڭا كەلىسىمگە كەلۋ مۇمكىندىگى بار دەپ جاريالادى.
ال ۋكراينا پرەمەر-ءمينيسترى ن.ازاروۆتىڭ ادامدارى جاڭا باعاعا قول جەتكىزسەك, 6 ملرد. اقش دوللارى شاماسىندا اقشا ۇنەمدەيمىز دەپ جاريالاپ ۇلگەردى. بىراق رەسەي جاعى بارلىق جەڭىلدىكتەردى ۋكراينانىڭ كەدەن وداعىنا كىرۋىمەن بايلانىستىرعىسى كەلەدى. ۋكراينا بولسا, ءوزىنىڭ ۇلتتىق مۇددەسىنە قارسى دەپ بۇل ماسەلەگە اياق باسار ەمەس. بۇگىنگى كۇنى كيەۆكە جونەلتىلەتىن 1 مىڭ تەكشە مەتر گازدىڭ باعاسى 446 دوللار, ال گەرمانياعا بوساتىلاتىن وسىنشا گاز 436 دوللار بولىپ وتىر.
قىسقا قايىرىپ ايتقاندا:
*رەسەي اۋەجايىنىڭ بيۋروكرات قىزمەتكەرلەرى وزگە ەمەس ءوزدەرىنىڭ ەڭ جاقىن اعايىنى, تانىلماعان «پريدنەستروۆە» ادامدارىنا دا تىزە باتىرۋدا. تانىلماعان رەسپۋبليكا باسشىلارى اۋەجايدا زاڭسىز ۇستالعان ءوز شەنەۋنىكتەرىن بوساتۋدى تالاپ ەتىپ, نوتا جاساۋعا ءماجبۇر بولدى. *نيۋ-يورك بيرجاسىنداعى مۇنايدىڭ جەلتوقسان ايىنا جاسالعان الدىن-الا باعامى ءبىر باررەلگە 98 دوللاردان اسىپ ءتۇستى. بۇل – كۇتىلگەن باعادان ايتارلىقتاي جوعارى. *تۇركىمەنستان ۇكىمەتى وزدەرىنىڭ مۇناي-گاز قورى 71,2 ملرد. شارتتى تونناعا جەتكەنىن جاريالادى. وسىدان بەس جىل بۇرىن ول 45,5 ملرد. توننا بولعان ەدى. *ازەربايجان ءوزىنىڭ اسكەري الەۋەتىن قىتاي قارۋىمەن ارتتىرۋدى كوزدەپ وتىر. ول جۋىردا قىتاي مەن پاكستان بىرلەسىپ شىعارعان جويعىش ۇشاقتار ساتىپ الۋ جونىندە شارت جاساسقان.ينتەرنەت ماتەريالدارى نەگىزىندە ازىرلەندى.
