پارلامەنتتىڭ جاڭارۋى – ۋاقىت تالابى

كەشە اقوردادا مەملەكەت باسشىسى نۇرسۇلتان نازارباەۆ پرەمەر-مينيستر كارىم ماسىموۆپەن, پارلامەنت سەنا­تىنىڭ توراعاسى قايرات ماميمەن, پارلامەنت ءماجىلىسىنىڭ توراعاسى ورال مۇحامەدجانوۆپەن كەزدەسىپ, قازاقستان رەسپۋبليكاسى پارلامەنتىنىڭ ءماجىلىسىن تاراتۋ جانە كەزەكتەن تىس سايلاۋ وتكىزۋ تۋرالى ءماجىلىستىڭ 53 دەپۋتاتىنىڭ ۇندەۋى پرەزيدەنتتىڭ اتىنا كەلىپ تۇسۋىنە بايلانىستى كونسۋلتاتسيا وتكىزدى. كەزدەسۋگە سونداي-اق پرەزيدەنت اكىمشىلىگىنىڭ باسشىسى اسلان مۋسين قاتىستى. ءوز سوزدەرىندە پرەمەر-مينيستر مەن پارلامەنت پالاتا­لا­رى­نىڭ توراعالارى پارلا­مەنت­تىڭ تومەنگى پالاتاسىنىڭ ءماجىلىستى تاراتۋ جانە كەزەكتەن تىس سايلاۋ وتكىزۋ تۋرالى ۇسىنىسىن قولدادى. مەملەكەت باسشىسى دەپۋتاتتار ءوز ۇندەۋىن بىرنەشە فاك­تور­لارعا نەگىزدەگەنىن اتاپ ءوتتى. بىرىنشىدەن, كونستيتۋتسياعا ەنگىزىلگەن وزگەرىستەرگە سايكەس ءما­جى­لىس­تە كەمىندە ەكى ساياسي پار­تيا بو­لۋى ءتيىس. بۇل ءۇشىن ساياسي جۇيەدە رەفورما ءجۇر­گىزىلدى. العاش رەت ورتالىق ازيادا دەپۋتاتتاردى پارتيا­لىق ءتىزىم بويىنشا سايلاۋ ەنگىزىلدى. پرەزيدەنت قازاق­ستان­نىڭ ساياساتىنىڭ دامۋىندا دەمو­كراتيالىق ۆەكتور دايەكتىلىكپەن ىسكە اسىرىلۋى كەرەكتىگىنە توق­تال­دى. ەكىنشىدەن, قازاقستان 2008-2009 جىلدارى كۇردەلى الەم­دىك داعدارىستىڭ اسەرىن باستان كەشىردى. ەلدەر مەن كۇللى الەم ودان ەندى عانا شىعىپ كەلەدى, ال بۇل كەزدە الەم­دىك ەكونوميكا ءالى دە كۇشتى قۇبىلمالى كۇيدە قالىپ وتىر. – ءبىز ەۋروپادا نە بولىپ جات­­قانىن, G-20 كەزدەسۋىندە قان­داي ماسەلەلەر تالقىلان­عا­نىن قادا­عا­لاپ وتىرمىز. ەكو­نوميكا تۇ­راق­­تاندى دەپ ايتۋعا ءالى ەرتە. ەۋروپالىق وداقتاعى وقيعالار بىزگە دە تىكەلەي ىق­پال ەتۋدە. ەۋروپا مەملەكەتتەرى قازاقستاننىڭ تەك ماڭىزدى سەرىكتەسى عانا ەمەس, سونىمەن بىرگە ءبىزدىڭ تاۋار­لا­رى­مىز ءۇشىن ينۆەستور ءارى رىنوك. ءبىز وقي­عا­لاردىڭ دامۋىنىڭ بارلىق ىق­تيمال نۇسقالارىنا دايىن­دا­لۋدا­مىز. وتكەن داعدارىستى ءبىز ابىرويمەن ەڭسەردىك. قازاق­ستان­دا داعدارىستى ەڭسەرۋ ءجو­نىندە ەڭ ۇزدىك باعدارلامانىڭ ءبىرى جۇزەگە اسىرىلدى, – دەپ اتاپ كورسەتتى مەملەكەت باس­شىسى. پرەزيدەنت ءماجىلىستىڭ اعىم­­دا­عى شاقىرىلىمىنىڭ جۇ­مىس كەزەڭى اۋقىمدى الەمدىك داعدا­رىس­قا تۇسپا-تۇس كەلگەنىنە, جۇ­مىس جەدەل جۇرگىزىل­گەنىنە, قاجەت­تى شەشىمدەر تەز قابىل­دان­عا­نى­نا, الايدا زاڭ­دار­دىڭ ساپاسىنا زيان كەلمەگەنىنە, سايلاۋ وتكەنشە سەنات ءما­جىلىستىڭ فۋنكتسيالارىن ات­قاراتىنىنا توقتالىپ ءوتتى. مەملەكەت باسشىسى قوعام كوپ پارتيالىق پارلامەنتتى قاجەت ەتىپ وتىرعانىن اتاپ كور­سەتتى. پار­لامەنتتىڭ جا­ڭارۋى ەلدە ءجۇر­گىزىلىپ جاتقان اۋقىمدى جاڭ­عى­ر­تۋ­لار ءۇشىن قاجەت. بۇدان باسقا, ەگەر كەلەسى داعدارىس سايلاۋ ناۋ­قانىنا سايكەس كەلەتىن بولسا, وندا ەل باسشىلىعىنىڭ, ۇكىمەتتىڭ جانە بۇل ماسەلە بويىنشا ءوڭىر­لەر­دىڭ جۇمىسى قيىندايدى. دەپۋتاتتاردان سونداي-اق ءماجىلىس پەن جەرگىلىكتى وكىلدىك ورگانى – ءماسليحاتتار سايلاۋىن بىرگە وتكىزۋ تۋرالى ۇسىنىستار ءتۇ­سۋدە. – اتالعان ماسەلە بويىنشا سىزدەردىڭ ۇستانىمدارىڭىزدى ەسكەرە وتىرىپ, مەن ءماجىلىستى تاراتۋ جانە سايلاۋ وتكىزۋ تۋرالى جارلىق جوباسىن قاراستىرامىن, – دەدى مەملەكەت باسشىسى. ءومىر ەسقالي, سۋرەتتى تۇسىرگەندەر س.بوندارەنكو, ب.وتارباەۆ.