بالا كەزىنەن ديزاينعا قىزىعاتىن. قاعازعا ءتۇسىپ تۇرعان سان ءتۇرلى دۇنيەلەردى ىسكە اسىرعانشا اسىققان ول اقىرى تەمىرگە توقتادى. تەمىر – ءتوزىمدى جانە باستىسى سىنبايدى. العاشقى جۇمىسى مەكەن-جاي جازىلعان تاقتا بولدى. كەيىن تەمىر ۇكى دەيسىز بە, تاۋىس دەيسىز بە, اڭ مەن قۇستىڭ نەشە ءتۇرى جاسالدى.
– نەگە ەكەنىن بىلمەيمىن, مايكل دجەكسوننىڭ ءار ءتۇرلى كەيپىندەگى تەمىر مۇسىندەرىن جاساۋ ماعان ەرەكشە شابىت بەرەدى, – دەيدى بەيبىت.
– اندەرىن ءسۇيىپ تىڭدايمىن دەپ ايتا المايمىن. مۇمكىن ماعان مايكلدىڭ قيمىل-ارەكەتى, ءستيلى ۇنايتىن شىعار. قازىر شەبەرحانامدا الەمگە ايگىلى پوپ-مۋزىكا كورولىنىڭ سۇلباسىنىڭ توپتاماسى بار.
ال جاڭا جىل قارساڭىندا بەيبىت ەيفەل مۇناراسىنىڭ كوشىرمەسىن جاساپ ءبىتىردى. بيىكتىگى ەكى مەتر مۇنارا مەتالدان دايىندالعان. ءار سانتيمەترىنە دەيىن اسقان ىجداعاتتىلىقپەن, كوركەمدىكپەن اسەمدەلگەن. رومانتيكالىق فوتوسەسسيالارعا, كوشپەلى سالتاناتتارعا تاپتىرماس كورنەكىلىك. ەندى استاناداعى بايتەرەك پەن اتىراۋ قالاسىنىڭ گەربىن جاساۋدى ويلاپ ءجۇر.
كىشكەنە عانا شەبەرحانانى جالعا الىپ, ءىس باستاعان جاس جىگىت ۇلكەن دۇنيەلەردى ارماندايدى جانە سوعان جەتەرىنە سەنەدى. وسى ماقساتتا رەسەيگە بارىپ وقىپ تا كەلدى. وتكەن جىلى اتىراۋدا بولعان «Start up اكادەميا» بايقاۋىنا «مەتالل بۇيىمدار جاساۋ» جوباسىن ۇسىنىپ, جۇلدەگەر اتاندى. تەمىردەن ءتۇيىن تۇيگەن جاس شەبەرلىگىن شىڭداپ, ەندى اعاشتان ءتۇرلى زاتتار جاساۋدى قولعا الماق نيەتتە.
باقىتگۇل باباش,
«ەگەمەن قازاقستان»
اتىراۋ
