اۆتورلار بۇعان دەيىن وسى مازمۇنداعى حاتتى قورعانىس جانە اەروعارىش ونەركاسىبى ءمينيسترى ب.اتامقۇلوۆقا دا جولداعان ەكەن. الايدا ولار مينيسترلىكتەن كەلگەن جاۋاپتىڭ وزدەرىن قاناعاتتاندىرمايتىنىن مالىمدەيدى. ناقتىراق ايتقاندا, ءمينيستردىڭ جاۋابىندا كورسەتىلگەن «جەردى جالعا بەرمەيمىز», «بۇل اقشا رەسەي ءۇشىن ەمەس», «اۋدانعا بولىنەتىن 152 ملن تەڭگە قازىنادان ەمەس, عارىشقا جاۋاپتى «بايتەرەك» كومپانياسىنىڭ قارجىسىنان الىنادى» دەگەن ۋاجدەردىڭ شىندىققا جاناسىمدى ەكەنىنە كۇمان كەلتىرەدى. ولار: «ەگەر جەر جالعا بەرىلمەسە, 152 ملن تەڭگەنىڭ اۋدانعا نە ءۇشىن تولەنەتىنىن» تۇسىنبەي وتىرعاندارىن العا تارتادى. سەبەبى جاۋاپ حاتتا اقشانىڭ نەگە بەرىلەتىنى شىنىمەن اشىپ ايتىلماعان كورىنەدى.
«سونىمەن قاتار «بايتەرەك» قازاقستاننىڭ كومپانياسى بولسا, جەرىمىزگە قۇلايتىن رەسەيدىڭ زىمىراندارى ءۇشىن تولەمدى دە ءوزىمىز تولەپ وتىرعان بولىپ شىقپايمىز با؟ ءتىپتى, بۇل اقشا وتەماقى بولعان كۇندە دە, ونى ءوزىمىزدىڭ وزىمىزگە تولەۋىمىز قاي قيسىنعا جاتادى, مۇنىڭ قاي جاعى جالعا بەرىلگەن بولماق؟» دەپ جازادى حات اۆتورلارى.
تورعايلىق ازاماتتار مينيستر ب.اتامقۇلوۆتىڭ تاۋەلسىزدىك العالى بەرى بايقوڭىردى جالعا العانى ءۇشىن رەسەيدىڭ 880 ملرد تەڭگە تولەگەنىن اۋىز تولتىرىپ ايتقانىنا كوڭىلدەرى تولمايتىنىن ءبىلدىرىپ, بۇل سومانىڭ قازاقستاننىڭ جىلدىق بيۋدجەتىنىڭ 10 پايىزىن عانا قۇرايتىنىن ەسكە سالادى. حات اۆتورلارى بۇدان ءارى «بىزدە كەي جىلدارى بيۋدجەتتىڭ تاپشىلىعى 500 ملرد تەڭگە شامالاس بولىپ جاتادى. سوندا بۇل ءبىزدىڭ قازىنامىزدىڭ ءبىر جىلدىق ولقى تۇسىن عانا جابۋعا جارايدى ەكەن. ال 880 ملرد تەڭگەنى 25 جىلعا شاقساق, ءبىر جىلدىق الاشاعىمىز نەبارى 30 ملرد تەڭگە عانا بولىپ شىعادى. ەندەشە بۇل قارجى بايقوڭىر عارىش ايلاعىنا جاقىن ورنالاسقان ەلدى مەكەندەر مەن زىمىران قالدىقتارى قۇلايتىن اۋماقتاعى اۋىلداردىڭ شەككەن زالال-زارداپتارىنىڭ وتەۋى بولا الا ما؟», دەگەن ساۋال تاستايدى.
تاعى ءبىر ايتارلىعى, قوستاناي وبلىسىنان وسى جولى دا جەر بولىنەدى دەپ وتىرعان جانگەلدين اۋدانىنىڭ اۋماعىنا بۇعان دەيىن دە تالاي مارتە زىمىران بولشەكتەرى قۇلاپ كەلگەن. ناقتى ايتقاندا, اقتوبە وبلىسىمەن شەكارالاس اقشىعاناق اۋىلىنىڭ ماڭىنداعى 46 مىڭ گەكتار القاپ ۇزاق جىلدار بويى وسى ماقساتقا پايدالانىلعان. ولارعا كۇنى بۇگىنگە دەيىن ەشقانداي اقشا تولەنبەگەن. زىمىران قۇلاۋ اۋماعىنا ەندى قوسىمشا كىرگەلى تۇرعان اقكول جانە قاراسۋ اۋداندارىنىڭ تۇرعىندارى مىنا حاباردان كەيىن قۇلاقتارىن ايرىقشا ءتۇرىپ وتىر.
حاتتى جولداۋشىلار بۇعان قوسا, مينيستر ب.اتامقۇلوۆ كەلگەندە, اۋدان ارداگەرلەرىنىڭ جوعارىدا ايتىلعان اۋدان ءۇشىن قوسىمشا بولىنەتىن 152 ملن تەڭگە, اقكول جانە قاراسۋ اۋىلدارىنا جاردەم ءۇشىن «جەدەل» بەرىلىپ, سۋ قۇبىرى تارتىلاتىنى ءۇشىن كەلىسىم بەرىپ, «قۇلاپ تۇسكەندەرىن» ايتا وتىرىپ, كۇنى ەرتەڭ پوليگوننىڭ ميللياردتاعان تەڭگەلىك زيان كەلتىرمەيتىنىنە كىمنىڭ كەپىل بولا الاتىنىن سۇرايدى.
ءبىز وسى حاتتىڭ نەگىزىندە پرەمەر-مينيستر باقىتجان ساعىنتاەۆتىڭ اتىنا دەپۋتاتتىق ساۋال جولداپ, بۇل ماسەلەنىڭ ءبىزدى دە تولعاندىراتىنىن, وسىعان قاتىستى بىرقاتار جايتتاردىڭ وزىمىزگە دە تولىق ءمالىم ەمەس ەكەنىن ايتتىق. سوندىقتان تورعاي ءوڭىرى وكىلدەرى العا تارتىپ وتىرعان وسى وزەكتى ماسەلەگە وراي جان-جاقتى تۇسىندىرىلگەن جاۋاپ بەرۋىن كۇتەمىز.
مۇرات باقتيار ۇلى,
سەنات دەپۋتاتى
