ەلباسى قابىلدادى

مەملەكەت باسشىسى نۇرسۇلتان نازارباەۆ جوعارعى سوت توراعاسى بەكتاس بەكنازاروۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. ب.بەكنازاروۆ مەملەكەت باس­شى­سىنا سوت تورەلىگىن ودان ءارى جەتىلدىرۋ جانە سوت رە­فور­ماسىن تەرەڭدەتۋ جونىندە قا­بىلداعان شارالار تۋرالى حا­بارلادى. جوعارعى سوت توراعاسى پرەزيدەنتكە اعىمداعى جىلدىڭ 10 ايىندا سوت تورەلىگىن جۇزەگە اسى­رۋدىڭ ناتيجەلەرى, سوت جۇيەسىن نىعايتۋ جونىندەگى شارالار, ەكو­نو­ميكالىق سوتتار جۇمىسى, سون­داي-اق قازاقستاندا سوت ءىسىن ءجۇر­گىزۋدى دامىتۋ ماسەلەسىندە حالىق­ارالىق ىنتىماقتاستىق تۋرالى باياندادى. ب.بەكنازاروۆ قىلمىستىق سوت ءىسىن جۇرگىزۋدى ىزگىلەندىرۋ بويىن­شا جۇزەگە اسىرىلعان شارالار قاۋىپتى ەمەس قىلمىس جاساپ سوتتى بولعان قازاقستاندىق ازامات­تار­دىڭ سانىن ەداۋىر تومەندەتكەنىن اتاپ ءوتتى. سونىمەن قاتار, جوعارعى سوت توراعاسى پرەزيدەنتتى بارلىق وب­لىس ورتالىقتارىندا جەتكىنشەك­تەردىڭ ىستەرى بويىنشا سوتتاردىڭ قۇرىلۋى تۋرالى حاباردار ەتتى. كامەلەتكە تولماعانداردىڭ ىستەرى بويىنشا مامانداندىرىلعان سوت­تاردىڭ قىزمەتى سوت شەشىمىنىڭ اناعۇرلىم دالەلدى قابىلدا­نۋى­نا مۇمكىندىك تۋعىزىپ, قۇقىق ءتار­تىبىن بۇزعان جەتكىنشەكتەردى قايتا تاربيەلەۋ جانە تۇزەتۋ ۇدە­رىسىنە وڭ ىقپالىن تيگىزەتىن بولادى. ازاماتتاردىڭ جوعارى دەڭ­گەي­دە قۇقىقتىق قورعالۋىن ارتتىرۋ, سوت راسىمدەرىنىڭ قولجەتىمدى جانە اشىق بولۋى ماقساتىندا سونداي-اق تاجىريبەگە ەلەكتروندىق سوت ءىسىن جۇرگىزۋ ەنگىزىلۋدە. مەملەكەت باسشىسى جوعارعى سوتتىڭ جانە بارلىق سوت تورە­لىگى جۇيەسى جۇمىسىنىڭ تيىمدىلىگىن ارتتىرۋ ماسەلەلەرى ءجو­نىن­دە ءبىر­قاتار ناقتى تاپسىرمالار بەردى.