مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قوستاناي وبلىسى بويىنشا دەپارتامەنتى باسشىسىنىڭ ورىنباسارى ەرلان سالىقباەۆتىڭ ايتۋىنشا, قازىر قاراماعىنداعى قىزمەتكەرى سىبايلاس جەمقورلىق قىلمىس جاساسا مەملەكەتتىك ورگان باسشىسى سول ءۇشىن قىزمەتتەن الىناتىن نورما جوق, بىراق مۇنداي اسا اۋىر قىلمىس جاسالعاندا ءۇنسىز قالۋ, باعاسىن بەرمەۋ تاعى دا ورىنسىز.
قازىر كوررۋپتسيالىق تاۋەكەلدەردى جويۋدىڭ باستى جولى ونى ەسكەرتىپ وتىرۋ بولىپ تابىلادى. ەرلان سالىقباەۆتىڭ ايتقان اقپاراتى بويىنشا, مەملەكەتتىك قىزمەت جۇمىسىنداعى رەفورما دا وسى باعىتقا ارنالعان. نەگىزى مەملەكەتتىك قىزمەتكە بارۋعا نيەت بىلدىرەتىندەردىڭ قاتارى كوپ. وتكەن جىلى مەملەكەتتىك قىزمەت پەن قۇقىق قورعاۋ ورگاندارىنا قىزمەتكە تۇرعىسى كەلگەن 5700 ادام زاڭنامالار جونىندەگى ءبىلىمىن تەكسەرەتىن تەستەن وتكەن بولاتىن. سونىڭ جارتىسى عانا ەمتيحان تاپسىرا العان. سولاردىڭ اراسىندا كونكۋرس ارقىلى لاۋازىمدى ورىنعا يە بولعاندارى ءتىپتى از, سەبەبى ولار بىلىكتىلىك تالاپتارىنا سايكەس كەلمەگەن. كەرىسىنشە, مەملەكەتتىك ورگانداردا, اسىرەسە, وڭىرلەردە بوس ورىندار كوپ.
وتكەن جىلى دەپارتامەنت 27 مەملەكەتتىك ورگاندار مەن 12 ۇيىمدا سىبايلاس جەمقورلىق تاۋەكەلىنە تالداۋ جاساعان. تالداۋ بويىنشا 160 زاڭ بۇزۋشىلىق تىركەلىپ, جويىلعان. قارابالىق اۋدانىندا اكىم لاۋازىمىن ارتىق پايدالانعانى ءۇشىن سوتتالدى. وتكەن جىلى بارلىعى قىلمىستىق جاۋاپكەرشىلىككە 55 ادام تارتىلعان, ال 2016 جىلى بۇل كورسەتكىش 45 بولاتىن. ولار نەگىزىنەن پوليتسيا قىزمەتكەرلەرى. كوررۋپتسيالىق قۇقىق بۇزۋدىڭ ساناتى جونىنەن ءبىرىنشى ورىندا پارا, ەكىنشى ورىندا لاۋازىمدىق وكىلەتتىلىگىن اسىرا پايدالانۋ تۇر.
ءنازيرا جارىمبەت,
«ەگەمەن قازاقستان»
قوستاناي
