بوس ۋاقىتىنىڭ ءبارىن ءوزىنىڭ شاعىن شەبەرحاناسىندا وتكىزەتىن تالانت يەسى شىعارماشىلىقپەن اينالىسقاندا جانىنىڭ راحات تاباتىنىن ايتادى. ءدال وسى قاباقتان جاسالعان تاباقتار مەن قاسىقتار, مۋزىكالىق اسپاپتار مەن تۇرمىستا تۇتىناتىن ءتۇرلى بۇيىمدار شەبەرحانانىڭ شىرايىن اشىپ تۇر. وسى ونەردىڭ ارقاسىندا 2010 جىلى جارىق كورگەن «قازاقتىڭ رەكوردتار كىتابىنا» مىڭ قاباقتان جاسالعان ەرەكشە تۋىندىسىمەن ەنگەن ول – وسىنداي ەڭبەگىنىڭ ءبىرىن ەلباسى نۇرسۇلتان نازارباەۆقا سىيعا تارتىپتى.
شەبەردىڭ ايتۋىنشا, تومەنگى سىنىپتا وقىپ جۇرگەنىندە سالعان ءبىراز سۋرەتتەرىن اكەسى اسىم قۇربانوۆ اۋىلداسى ءابىلحان قاستەەۆكە اپارىپ كورسەتكەن ەكەن. سوندا داڭقتى سۋرەتشى بالانىڭ سالعان سۋرەتتەرىنە ۇزاق قاراپ تۇرىپ: « ۇلىڭ وسى جولدى تاستاماسىن, ۇلكەن سۋرەتشى بولادى» دەپ ريزاشىلىعىن ءبىلدىرىپتى. « ۇلى سۋرەتشىنىڭ اكەمە ايتقان وسى ءبىر اماناتى بۇكىل ونەرىم مەن ومىرىمە قۋات بولدى. اراعا ەلۋ جىل سالىپ ءابىلحان قاستەەۆ اتىنداعى التىن مەدالمەن ماراپاتتالعانىمدا, وسى ءسوز ويىما ورالىپ كوزىمە ەرىكسىز جاس كەلدى», دەيدى ول.
«جىبەك جولى شوقجۇلدىزى», «مەنىڭ اتامنىڭ كوشەسى», «قاشقارداعى ساۋداگەر», «توميريس» سياقتى بىرقاتار شىعارمالارى سۋرەتشىلەر وداعىندا جىلىنا ەكى رەت وتەتىن ءداستۇرلى كورمەدە كورەرمەن نازارىنا ۇسىنىلىپ ءجۇر. ماسەلەن, «جىبەك جولى شوقجۇلدىزى» تۋىندىسى تۇركى جۇرتىنىڭ سان عاسىرلىق تاريحىنان سىر شەرتەدى. وندا ءتۇبى ءبىر تۇركىنىڭ تانىمال تۇلعالارى, تۇركىلەردىڭ نانىم-سەنىمدەرى مەن اڭىز-داستاندارداعى كونە زامانداردىڭ كورىنىسى بەينەلەنگەن. وسىنداي كولەمدى تۋىندىنى جاساۋ ءۇشىن جىلعا جۋىق ۋاقىت كەتەدى ەكەن. ءبارى دە شىعارماشىلىق كوڭىل كۇي مەن شابىتقا بايلانىستى.
– ونەر ەشقاشان تاپسىرىسپەن تۋمايدى. ونىڭ بار قۇدىرەتى سوندا. تاپسىرىسپەن جاسالعان شىعارمادان جاساندىلىق بايقالىپ تۇرادى. بۇكىل بولمىسىڭمەن سەزىنبەي, ونە بويىڭنان وتكىزبەي جاساعان ءىسىڭ دىتتەگەن جەرىنەن شىقپايدى. ەش بوياماسىز, ءومىردىڭ وزىنەن الىنعان شىعارمالار عانا ومىرشەڭ بولادى. وسى ۋاقىتقا دەيىن ءار ءتۇرلى پىشىندەگى قاباقتاردان مىڭداعان ەستەلىك بۇيىمدار جاسادىم. قاباق ەرتەدەن-اق ۇيعىر حالقى ءۇشىن, جالپى تۇركىلەر ءۇشىن قاستەرلى سانالعان. ول تابيعاتتىڭ بىزگە بەرگەن سىيى, – دەيدى قازاقستاننىڭ ەڭبەك سىڭىرگەن قايراتكەرى حاشيمجان قۇربانوۆ.
ارمان وكتيابر,
«ەگەمەن قازاقستان»
الماتى
سۋرەتتەردى تۇسىرگەن اۆتور
