ء«بىزدىڭ سپورتشىلار پحەنچحاندا وتەتىن وليمپيا ويىندارىنا سپورتتىڭ توعىز تۇرىنەن 50-دەن استام ليتسەنزيا الۋدى جوسپارلاپ وتىر. قازىرگى تاڭدا سپورتتىڭ ءتورت تۇرىنەن 33 ليتسەنزيا جەڭىپ الدى. 10 جولدامانى بياتلونشىلار, ونىن شورت-ترەكشىلەر, ۇشەۋىن مانەرلەپ سىرعاناۋشىلار جانە 10 ليتسەنزيانى كونكيمەن جۇگىرۋشىلەر يەلەندى. جالپى, ءبىز سپورتتىڭ توعىز تۇرىنەن قاتىسۋدى ويلاستىرىپ وتىرمىز. ولاردىڭ قاتارىندا ترامپليننەن سەكىرۋ, شاڭعى قوسسايىسى, فريستايل بار. شورت-ترەكتەن قازاقستان قۇراماسىنىڭ سپورتشىلارىن ەرەكشە اتاپ وتكىم كەلەدى. ولار بارلىق ليتسەنزيالىق تۋرنيرلەردە باقتارىن سىناپ, جاقسى كورسەتكىش كورسەتىپ, 10 جولداما جەڭىپ الدى. الداعى وليمپيا ويىندارىندا قازاقستان قۇراماسىنىڭ تۋىن ابزال اجعاليەۆ الىپ شىعادى. ول ۇلتتىق قۇرامادا بىرنەشە جىلدان بەرى ونەر كورسەتىپ كەلە جاتقان سپورتشى. سوندىقتان دا تۋ ۇستاپ شىعۋعا ابدەن لايىقتى», دەيدى سەرىك جاراسباەۆ.
ۇلتتىق قۇرامامىز تۇڭعىش رەت نورۆەگيانىڭ ليللەحامەر قالاسىندا (1994) وتكەن قىسقى وليمپيا ويىندارىنا قاتىستى. وندا قازاقستان تۋىن ترامپليننەن سەكىرۋشى, ەلىمىزدىڭ ءتورت دۇركىن چەمپيونى, تمد ەلدەرى كۋبوگىنىڭ يەگەرى قايرات بيەكەنوۆ ۇستاپ شىقتى. وليمپيادادا ول 90 مەترلىك ترامپليننەن سەكىرۋدە 49-شى ورىن السا (157,5 ۇپاي), 120 مەترلىك ترامپليننەن سەكىرۋدە 58-ءشى (35,2 ۇپاي) ورىننان كورىندى. قايرات 2001 جىلى سپورتتىق كارەراسىن اياقتاپ, باپكەرلىككە ءبىرجولا بەت بۇردى. بۇگىندە ترامپليننەن سەكىرۋدەن قازاقستان ۇلتتىق قۇراماسىنىڭ باپكەرى.
1998 جىلى جاپونيانىڭ ناگانو قالاسىندا جالاۋى جەلبىرەگەن اق وليمپيادادا كوك تۋدى ۇستاۋ مارتەبەسى ليللەحامەردە قازاقستان قۇراماسىنىڭ قورجىنىنا ءۇش جۇلدە سالعان شاڭعىشى ۆلاديمير سميرنوۆقا بۇيىردى. ۆلاديمير سميرنوۆ ناگانودا دا جۇلدەگەرلەر قاتارىنان كورىنىپ, وليمپيادانىڭ قولا جۇلدەسىن يەلەندى. 1999 جىلى سپورتتىق مانسابىن اياقتاپ, 2000 جىلى حالىقارالىق وليمپيادا كوميتەتىنىڭ اتقارۋ كوميتەتىنىڭ مۇشەسى بولىپ سايلاندى. ال 2002 جىلدان 2010 جىلعا دەيىن قازاقستان بياتلون فەدەراتسياسىنىڭ پرەزيدەنتى قىزمەتىن اتقاردى. سونداي-اق سميرنوۆ 2014-2015 جىلدارى ارالىعىندا «استانا» پرەزيدەنتتىك كاسىبي سپورت كلۋبىنىڭ باس ديرەكتورى بولدى.
اقش-تىڭ سولت-لەيك-سيتي قالاسىندا وتكەن XIX قىسقى وليمپيا ويىندارىندا قازاقستان بايراعىن كونكيمەن جۇگىرۋشى راديك بيكچەنتاەۆ ۇستاپ شىقتى. راديك بيكچەنتاەۆ ءۇش وليمپياداعا قاتىستى (1994, 1998 جانە 2002 جىلدارى). ونىڭ وليمپياداداعى ەڭ ۇزدىك كورسەتكىشى – 16-شى ورىن. بۇل ناتيجەگە ول 1994 جىلى ليللەحامەردە وتكەن دودادا 5000 مەتر قاشىقتىققا جۇگىرۋدە قول جەتكىزگەن. ر.بيكچەنتاەۆ كونكيمەن جۇگىرۋدەن قازاقستاننىڭ ءۇش دۇركىن چەمپيونى جانە ءتورت رەت ەل بىرىنشىلىگىنىڭ قولا جۇلدەسىن يەلەندى. سونداي-اق 1999 جىلعى قىسقى ازيا ويىندارىندا التىن مەدال العان. ول بۇگىندە قازاقستاننىڭ كونكيمەن جۇگىرۋ فەدەراتسياسىنىڭ اتقارۋشى ديرەكتورى.
2006 جىلى يتاليانىڭ تۋرين قالاسىندا وتكەن وليمپيادادا ەلىمىزدىڭ كوك تۋىن حوككەيشى الەكساندر كورەشكوۆ ۇستادى. تۋريندە وتكەن باسەكەدە حوككەيدەن قازاقستان قۇراماسى ىرىكتەۋ كەزەڭىندە «ۆ» توبىندا سىنعا ءتۇسىپ, ەكى ۇپايمەن التى قۇرامانىڭ ىشىندە بەسىنشى ورىن الدى. ءسويتىپ ىرىكتەۋدەن ىركىلگەن قۇرامامىز وليمپيادانى ەرتە اياقتاۋعا ءماجبۇر بولدى.
2010 جىلى كانادانىڭ ۆانكۋۆەر قالاسىندا جالاۋى جەلبىرەگەن قىسقى وليمپيا ويىندارىندا قازاقستاننىڭ تۋىن بياتلونشى دياس كەنەشەۆ الىپ شىقتى. دەگەنمەن تۋ ۇستاۋشى بۇل ءدۇبىرلى دودادا كوڭىل كونشىتەرلىك ناتيجە كورسەتە المادى.
قازاقستان قۇراماسى قاتىسقان سوڭعى سوچي وليمپياداسىندا كوك تۋدى ۇستاپ شىعۋ شاڭعىشى ەردوس احماديەۆكە سەنىپ تاپسىرىلدى. تۋ ۇستاعان سپورتشىمىز شاڭعىدان 15 شاقىرىمدىق كلاسسيكالىق ستيلدە ءجۇرۋ جارىسىندا سىنعا ءتۇسىپ, مارەگە 54-ءشى بولىپ كەلدى. ەردوس احماديەۆ بىلتىر جاپونيانىڭ ساپپورو قالاسىندا وتكەن قىسقى ازيا ويىندارىنا قاتىسىپ, ەستافەتالىق جارىستا كۇمىس جۇلدە يەلەندى.
پحەنچحاندا وتەتىن وليمپيادادا قازاقستاننىڭ تۋىن شورت-ترەكشى ابزال اجعاليەۆ ۇستاپ شىعاتىنىن جوعارىدا ايتىپ وتتىك. نەگىزى, تۋ وليمپيادادا مەدال الۋى مۇمكىن دەگەن سپورتشىعا تاپسىرىلدى. وڭتۇستىك كورەيادا ابزال وزىنە ارتىلعان سەنىمدى اقتاپ, ەلگە جۇلدەمەن ورالادى دەگەن ءۇمىتىمىز باسىم. اجعاليەۆ حالىقارالىق جارىستارعا قاتىسىپ, ىسىلعان, تاجىريبەسى تولىسقان سپورتشى. ابزال 2016 جىلى سولت-لەيك-سيتيدە (اقش) وتكەن الەم كۋبوگى كەزەڭىندە 500 مەتر قاشىقتىقتا التىن العان. سونىمەن قاتار بىلتىر الماتىدا وتكەن قىسقى ۋنيۆەرسيادانىڭ كۇمىس جۇلدەگەرى. اجعاليەۆ پحەنچحانداعى ويىنداردا 500 جانە 1000 مەترلىك قاشىقتىقتا مەدالعا تالاساتىن بولادى.
ءالي بيتورە,
«ەگەمەن قازاقستان»
