اياۋلىم پويىزدان تۇسە سالىسىمەن اكەسى سەرىكتى قۇشاقتاي الدى. ءتورت جاسىنان سپورتتىڭ اسا ءبىر كۇردەلى ءتۇرى – فريستايلدىڭ موگۋل تۇرىنە باۋلىعان اكەسى سەرىك پەن اناسى گاۋھاريا دەگەندە قىزدارىنىڭ شىعاردا جانى بولەك. ولار ەرىنبەي-جالىقپاستان قالانىڭ سىرت جاعىنداعى تاۋعا اپارىپ, بىرنەشە ساعاتتان كەيىن كەرى الىپ قايتىپ ءجۇردى. ويىن بالاسى ەمەس پە, ابدەن شارشاعان كەزدە سپورتتى تاستاپ كەتپەكشى بولعان كەزدە اتا-اناسى جىگەرىن جانىپ, نامىستى قايراي تۇسەتىن. قازاق قىزدارى بارا بەرمەيتىن اسا قاۋىپتى دە كۇردەلى سپورتپەن شۇعىلدانعان 12 جىلدا اياۋلىم تالاي اسۋدان ءوتتى.
2011 جىلدىڭ ناۋرىزى. وسكەمەننىڭ ىرگەسىندەگى «التاي ءالپىسى» شاڭعى بازاسىندا ەرەسەكتەر مەن جاسوسپىرىمدەر اراسىندا فريستايلدان ەل چەمپيوناتى ءوتتى. ەرلەر اراسىنداعى سايىستا دميتري رەيحەرد, دميتري بارماشوۆ, ال قىزدار اراسىنداعى جارىستا يۋليا گالىشەۆا, يۋليا روديونوۆا الدارىنا جان سالمادى. قازاقستان رەسپۋبليكاسىنىڭ ءى جاستار ويىنىندا اياۋلىم موگۋلدان جۇپتاسۋدا التىننان القا تاقسا, فريستايل-موگۋلدا ەكىنشى, ال فريستايل-اكروباتيكادان ءۇشىنشى ورىندى يەلەندى. قارشاداي قىز بيىكتەن تومەن قاراي زۋلاعان كەزدە بويىنداعى قورقىنىشتى ىسىرىپ قويىپ, اۋەدە بىرنەشە سالتو جاسادى, جوعارى بالعا يە بولدى. جارىستى تاماشالاپ تۇرعان اتا-اناسى سەرىك پەن گاۋحاريا, تۋىستارى مارات پەن گۇلميرا ورمانبەتوۆتەر اياۋلىمدى جەڭىسىمەن قۇتتىقتاپ, بەتىنەن ءسۇيدى.
– قىزىمىز اياعىنا شاڭعى بايلاعان كەزدە نەبارى ءۇش, ال فريستايل سەكتسياسىنا جازىلعان كەزدە ءتورت جاستا بولاتىن, – دەيدى اكەسى سەرىك امىرەنوۆ. – فريستايلدىڭ موگۋل ءتۇرىن تاڭداعان كەزدە قوبالجىعانىمىز راس. بىراق اياۋلىم قايسار, العان بەتىنەن قايتپايتىن وجەت بولىپ ءوستى. العاشقى باپكەرى سەرگەي پاۆلوۆيچ اكسەنوۆ بىلگەنىن ۇيرەتتى. سەكتسياعا جازىلعان كەزدە 80 بالا بولعان, ونىڭ تورتەۋى ءوزىمىزدىڭ قاراكوزدەر. اقىرى سول 80 بالانىڭ تورتتەن ءبىرى عانا قالدى. قازىر وزىمەن بىرگە 12-13 جاستاعى ورىنحان مۇقاتاەۆ, ءامينا ساتەنوۆا, 17 جاستاعى ولجاس بەيسەمباەۆ فريستايلمەن شۇعىلدانىپ, جاقسى ناتيجەلەرگە جەتۋدە. قازاق قىزدارىنىڭ سپورتتىڭ كۇردەلى ءتۇرىن تاڭداۋى – قۇپتارلىق ءىس. بۇعان دەيىن قىزىمىز بىرنەشە رەت ەۋروپا كۋبوگى كەزەڭىنە قاتىسىپ, 6-شى ورىندى يەلەنگەن. ءتىپتى 8, 10-شى ورىندارعا تابان تىرەگەن كەزدە كۇيزەلگەنى راس. وعان جىگەر بەرىپ, ءالى جاسسىڭ, جەڭىستى كۇندەرىڭ الدا, – دەپ جىگەر بەرەتىنبىز. ەندى, مىنە, العاشقى جەڭىسىنە جەتتى.
– اياۋلىمدى اكەسى ەكەۋىمىز بىرنەشە جىل جاتتىعۋلارعا بىرگە اپارىپ جۇردىك, سەرىكتىڭ زايساندا شارۋا قوجالىعى بار, ول جوق كەزدە مەن قامقور بولدىم. قىزىمنىڭ بويىنداعى فريستايلعا دەگەن سۇيىسپەنشىلىك مەنى ءتانتى ەتتى. ودان ءۇمىت كۇتەمىن, – دەيدى اناسى گاۋحاريا.
الماتىدا ستۋدەنت-جاستاردىڭ ۋنيۆەرسيادا ويىندارى ءوتىپ جاتقان كەزدە سەرىك حابارلاسىپ, «اعا, ءسۇيىنشى, اياۋلىم ەۋروپادان ورالعان سوڭ جاپونيانىڭ ساپپورو قالاسىندا جالاۋىن كوتەرەتىن ازيا ويىندارىنا قاتىساتىن بولدى, مەن دە بارىپ, قىزىما جانكۇيەر بولامىن», دەگەن ەدى. الايدا سپورت باسشىلارى اياۋلىمنىڭ ورنىنا يۋليا گالىشەۆانى جىبەرۋدى ءجون ساناعان. سوعان قاراعاندا, نە جاسى تولمادى نەمەسە ماماندار قازاقستان قورجىنىنا مەدال ءتۇسىرۋدى كوزدەگەن سىڭايلى. الايدا نەبارى 16 جاستاعى, وسكەمەندەگى دارىندى بالالارعا ارنالعان سپورت مەكتەبىنىڭ 11-سىنىپ وقۋشىسى اياۋلىمنىڭ الار اسۋى ءالى الدا.
– 2017 جىل مەن ءۇشىن تابىستى بولدى. 25 قاڭتاردا ءبىزدى فرانتسيانىڭ البيەز قالاسىنداعى ەۋروپا كۋبوگىنىڭ كەزەكتى كەزەڭىنە ەلىمىزدىڭ جاستار قۇراماسىنىڭ اعا باپكەرى ۆيكتور رەيحەرد باستاپ اپاردى. جارتىلاي فينالدا المانيانىڭ ەڭ تانىمال فريستايلشىسى سوفي ۆازامەن جولىمىز ءتۇيىسىپ, ونى ەڭسەردىم. ال اقتىق سىندا بريتانيالىق گارگەن شوفيل ماكايا مەنەن ءسال عانا وزىپ كەتتى. ونىڭ الدىندا جەكە سايىستا قولاعا يە بولعانمىن. جۇپتاسىپ ونەر كورسەتۋدە كۇمىس مەدال قولعا ءتيدى. 11-12 اقپاندا اۋستريانىڭ كريشپەل قالاسىندا دا ەۋروپا كۋبوگى جارىسى ءوتىپ, وعان 15 ەلدىڭ اتاقتى ساڭلاقتارى قاتىستى. جەكە جانە جۇپتاسۋدا 2 التىنعا يە بولعان كەزدە قۋانىشىمدى بىردەن اتا-اناما جەتكىزدىم. شۆەيتساريانىڭ پراتو-لەۆەنتينو قالاسىندا جالاۋىن كوتەرگەن ەۋروپا كۋبوگىنىڭ كەزەكتى كەزەڭىندە دە نامىستى قولدان بەرمەي, 1 التىن القانى ولجالادىم, – دەيدى اياۋلىم امىرەنوۆا.
– بىلتىر تاعى قانداي جارىستارعا قاتىستىڭ؟
– وتكەن جىلدىڭ 8-9 ناۋرىزىندا يسپانيانىڭ سيەرا-نەۆادا قالاسىندا جالاۋىن كوتەرگەن فريستايلدان ەرەسەكتەر اراسىنداعى الەم چەمپيوناتىنا قاتىستىم. شۆەتسيا مەن فينلياندياداعى ەۋروپا كۋبوگىنىڭ كەزەكتى كەزەڭدەرىنە قاتىسىپ, شەبەرلىكتى شىڭداي ءتۇستىم. ساناۋلى كۇننەن كەيىن وڭتۇستىك كورەيانىڭ پحەنچحان قالاسىنداعى اق وليمپيا ويىندارىنا وسكەمەندىك تالانتتى فريستايلشى يۋليا گالىشەۆا ەكەۋىمىز قاتىساتىن بولدىق. ادەتتە ءار مەملەكەتتەن اق وليمپياداعا ليتسەنزيانى يەلەنگەن 4 ساڭلاق قاتىسا الادى, قازىردىڭ وزىندە د.رەيحەرد, پ.كولماكوۆ جانە يۋ.گالىشەۆانىڭ جولدامالارى قالتادا. تەك ونى قورعاۋلارى ءتيىس. مەن كۆوتا بويىنشا قاتىسامىن, بىراق ليتسەنزيانى قورعاۋىم كەرەك. الدا 6 قاڭتاردا كانادادا, سوسىن اقش-تا, بۇدان كەيىن تاعى دا كانادا مەن امەريكادا وتەتىن الەم كۋبوگىنىڭ كەزەكتى كەزەڭىنە قاتىسامىز. قازاق ەلىنىڭ جانكۇيەرلەرىنە قۋانىش سىيلاۋ ماقساتىم, – دەيدى 16 جاستاعى چەمپيون قىز.
– اياۋلىمنىڭ بويىنداعى جەڭىسكە دەگەن ىنتا-جىگەر, كۇش-قۋاتى ءبىزدى قۋانتادى. ونىڭ بويىندا فريستايلشىعا قاجەت وجەتتىلىك پەن تەز شەشىم قابىلداۋ, كۇردەلى قيمىل جاساۋ كەزىندەگى تاپقىرلىق قاسيەتتەرى ۇيلەسىم تاۋىپ تۇر. كورەيادا اياۋلىم مول تاجىريبە جينايدى, كەلەشەكتە قازاق ەلىنىڭ نامىسىن قورعايدى دەگەن ويدامىز, – دەيدى ەلىمىزدىڭ جاستار كومانداسىنىڭ اعا باپكەرى ۆيكتور الەكساندروۆيچ رەيحەرد.
وڭداسىن ەلۋباي,
جۋرناليست
وسكەمەن
