ءيا, قازىرگى ءومىر جەدەل وزگەرىپ بارادى. جاھاندىق دەڭگەيدە ءجۇرىپ جاتقان وسى وزگەرىستەرگە ساي بولۋىمىز ءۇشىن الدىمىزدان جول كورسەتەتىن ايقىن باعىت قاجەت ەدى. وسى باعىت جولداۋدا كورسەتىلىپتى. مۇندا بەلگىلەنگەن 10 مىندەتتىڭ قاي-قايسىسى بولماسىن وتە وزەكتى.
ماسەلەن, جولداۋدا كورسەتىلگەن ءبىرىنشى مىندەتتى الايىق. مۇندا ەلباسىمىز ەلىمىزدە جۇزەگە اسىرىلۋ ۇستىندەگى يندۋستريالاندىرۋدى جاڭا تەحنولوگيالاردى ەنگىزۋدىڭ كوشباسشىسىنا اينالدىرۋ مىندەتىن قويعان. «ونىڭ ناتيجەلەرى مۇناي باعاسى كۇرت تومەندەگەن 2014-2015 جىلدارداعى داعدارىستا نەگىزگى تۇراقتاندىرۋشى فاكتورلاردىڭ ءبىرى بولدى. سول سەبەپتى جوعارى ەڭبەك ونىمدىلىگى بار قايتا وڭدەۋ سەكتورىنا دەگەن باعدارىمىز وزگەرگەن جوق. سونىمەن قاتار يندۋستريالاندىرۋ 4.0 جاڭا تەحنولوگيالىق قالىپتىڭ بارلىق مۇمكىندىكتەرىن پايدالانا وتىرىپ, مەيلىنشە يننوۆاتسيالىق سيپاتقا يە بولۋعا ءتيىس. كاسىپورىندارىمىزدى جاڭعىرتۋعا جانە تسيفرلاندىرۋعا باعىتتالعان, ءونىمنىڭ ەكسپورتقا شىعۋىن كوزدەيتىن جاڭا قۇرالداردى ازىرلەپ, سىننان وتكىزۋ قاجەت», دەلىنگەن جولداۋدا.
جالپى, مەن عالىم رەتىندە قازىرگى زاماندىق جاڭا تەحنولوگيالاردى وندىرىسكە ەنگىزۋدىڭ قانشالىقتى ءتيىمدى ەكەندىگىن ءوز تاجىريبەم ارقىلى كوزىممەن كورگەن اداممىن دەسەم, ارتىق ماقتانعاندىق بولماس. ماسەلەن, وسىدان بىرنەشە جىل بۇرىن سول كەزدە ەلىمىزدەگى ءىرى جانە دەربەس قۇرىلىم رەتىندە جۇمىس ىستەپ تۇرعان «جەر رەسۋرستارى جانە جەرگە ورنالاستىرۋ مەملەكەتتىك عىلىمي-وندىرىستىك ورتالىعىنىڭ» كاسىپورىندارىنا تمد ەلدەرىندە ءالى كۇنگە دەيىن تەڭدەسى جوق سانالاتىن «قازاقستان رەسپۋبليكاسىنىڭ جەر كاداسترىن جانە ونىڭ اۆتوماتتاندىرىلعان اقپاراتتىق جۇيەسىن» مەملەكەتتىك ينفراقۇرىلىم رەتىندە وندىرىستىك تاجىريبەگە ەنگىزۋدى باستاعان ەدىك. ونى ەنگىزۋ وڭاي بولعان جوق. وسى جۇيەنى ەنگىزۋ بارىسىندا «اقپاراتتىق تەحنولوگيالار ءداۋىرىنىڭ» تالاپتارىن تەرەڭنەن ءتۇسىنىپ, الەم دەڭگەيىندە ساراپتاما جۇرگىزە وتىرىپ, بۇل جاڭا جۇيەنى زامان تالابىنا ساي ەتىپ قۇرۋعا ۇمتىلدىق. سونىڭ ناتيجەسىندە «قازاقستان رەسپۋبليكاسىنىڭ جەر كاداسترى جانە ونىڭ اۆتوماتتاندىرىلعان اقپاراتتىق جۇيەسى» الەمدەگى ەڭ وزىق گەواقپاراتتىق تەحنولوگيالاردى پايدالانۋ نەگىزىندە دۇنيەگە كەلدى.
بۇل جۇيە قازىرگى كۇنى دە ءتيىمدى جۇمىس ىستەپ, حالىققا پايداسىن تيگىزىپ كەلەدى. ويتكەنى جەرگە ورنالاستىرۋ ماماندارى وسى جۇيەنىڭ تەحنولوگيالارىن پايدالانۋ ناتيجەسىندە جەر تەلىمىنىڭ سىزباسى مەن اۋماقتاعى ورنالاسۋىن ميلليمەترلىك دالدىكپەن بەلگىلەي الادى. ال جەر تەلىمىنىڭ يەسى بولسا, ونىڭ ينتەرنەت ارقىلى كاداسترلىق ءنومىرىن كورسەتۋ ارقىلى جەر كاداسترىنىڭ اۆتوماتتاندىرىلعان جۇيەسىنەن كورە الادى.
بۇل جۇيە ەلىمىزدە «ەلەكتروندى ۇكىمەت» قۇرىلعان كەزدە دە ونىڭ پورتالىنا اۆتوماتتاندىرىلعان قىزمەتتىڭ العاشقى باستاماسى رەتىندە ءبىرىنشى بولىپ تىركەلگەن بولاتىن. وسى جۇيە بويىنشا ءبىزدىڭ الدىمىزداعى ەندىگى مىندەت ەلباسى جولداۋىندا كورسەتىلىپ وتىرعان تسيفرلى تەحنولوگياعا ءوتۋ بولىپ تابىلادى.
دەمەك, قازىرگى جاڭا تەحنولوگيالارعا نەگىزدەلگەن مەملەكەتتىك يندۋستريالىق ساياساتتى جۇزەگە اسىرۋ دەگەنىمىز, بۇل – بولاشاعىمىزدىڭ كىلتى, جاس ۇرپاقتىڭ باقىتتى ءومىرىنىڭ كەپىلى. حالىقتىڭ يىعىنداعى ءومىر مەن تۇرمىستىڭ جۇگى ەلباسىنىڭ جولداۋداعى ەل الدىنا قويىپ وتىرعان مىندەتتەرىن دۇرىس جۇزەگە اسىرىپ, وسى ارقىلى قازىرگى جاھاندىق باسەكەلەستىكتىڭ جاڭا اعىمدارى مەن تەحنولوگيالىق ترەندتەرىن يگەرگەندە عانا الدەقايدا جەڭىلدەي تۇسەتىندىگىنە سەنىمدىمىن.
زايروللا دۇيسەنبەكوۆ,
ۇعا اكادەميگى
