باتىل دا بايىپتى جازىلا باستادى
مەن سەكسەننىڭ ورتاسىنا اياق باسقان ەڭبەك ارداگەرىمىن. ۇستازدىق ءبىلىم بەرگەن ينستيتۋتتان كەيىنگى ساياسي وي-ءورىسىمدى, ءبىلىم-بىلىگىمدى ارتتىرعان, پايىم-پاراساتىمدى تولىقتىرعان كۇندەلىكتى باسىلىمدار مەنىڭ جان ازىعىم, عۇمىرلىق ۋنيۆەرسيتەتىم بولدى. سول عۇمىرىمدا الدىمەن «ورازامدى» «ەگەمەن قازاقستاننىڭ» بەتتەرىن پاراقتاۋمەن اشامىن. بۇل ادەتتەن اينىعان كۇنىم بولعان ەمەس. ويتپەسەم قوڭىلتاقسىپ, قىمباتىمدى جوعالتقانداي «اشقۇرساق» جۇرەمىن. ويتكەنى كەڭ-بايتاق رەسپۋبليكامىزداعى كۇندەلىكتى ساياسي, ەكونوميكالىق كورسەتكىشتەر, كادرلىق جانە شەتەلدەگى جاڭالىقتار الدىمەن وسى گازەتتە بايىپتى باياندالادى. باسىلىم تانىمدىق تالدامالاردى, ۇلتتىق بولمىسىمىزدىڭ كۇنگەيى مەن كولەڭكەلى جاقتارىن عىلىمي تۇرعىدا باتىل دا بايىپتى جازا باستادى. ۇلتتىق ەرەكشەلىكتەرىمىز, ۇلاعاتتى قايراتكەرلەرىمىزدىڭ جاسامپاز ءىس-ارەكەتتەرى كەڭىنەن باياندالاتىن بولىپ ءجۇر.
قىسقاسى, «ەگەمەننىڭ» ءار سانى ەرىكسىز ساعىنتاتىن قۇتتى قوناققا, وزىنە ءتاۋ ەتتىرەتىن «سيقىرشىعا» اينالىپ بارادى. بۇل رۋحاني جاڭعىرۋ قوزعالىسى كەزىندەگى ۇجىمنىڭ ناسيحاتشىلار كوشىن باستاۋعا دەن قويعان يگى قادامى. وقىرمانىنىڭ جان ازىعىنا اينالعان عاسىرلىق تاريحى بار باس باسىلىمعا وسى جىلعا جازىلۋ ناۋقانى جالعاسىپ جاتىر. بۇل ورايدا مەن تۇراتىن كەنتتەگى 20-دان استام ارداگەر اسا بەلسەندىلىك تانىتىپ وتىر. وزدەرى تۇگەل جازىلىپ, وزگەلەردى دە, جاستاردى دا ۇگىتتەپ ءجۇر.
ورايى كەلگەندە ايتارىم, شەتەلدىك وقيعالار تۋرالى ماتەريالدار ءجيى جازىلىپ تۇرسا ەكەن. سوسىن ەل ومىرىنە, داستۇرىمىزگە, ەكونوميكامىزعا جات قىلىقتار دايەكتى دە باتىل جازىلسا ەكەن. ء«سوز سويىلدى» اسىعا, ساعىنا كۇتەمىز. ونىڭ ىشىندە ناقتى فاكتىگە قۇرىلعان دۇنيە بولسا وقىرمان قىزىعا تۇسەر ەدى.
سۇلتانقازى ۇسەنوۆ,
ەڭبەك ارداگەرى
قىزىلوردا
تولەماقى قابىلداۋداعى شيكىلىك...
تاياۋدا ءبىر تانىسىمىزبەن جولىعىپ قالدىق. پايدالانعان ەلەكتر ەنەرگياسىنا تولەم جاساپ كەلە جاتقان بەتى كورىنەدى. جۇزىنەن اشۋدىڭ تابىن بايقاپ, سابىرعا شاقىرىپ, ءىستىڭ ءمان-جايىن بىلمەك بولىپ, اڭگىمەگە تارتتىق.
– اي سايىن ءتيىستى مەكەمەگە بارىپ, پايدالانعان ەلەكتر ەنەرگياسىنا تولەم جاساپ تۇرامىن. بۇگىن بارعانىمدا قىزمەتشى قىز پايدالانعان ەلەكتر ەنەرگياسىنا قوسىمشا تاعى دا 70 تەڭگە تولەۋىم كەرەك ەكەنىن ەسكەرتتى. «نە ءۇشىن؟» دەسەم, «كورسەتكەن قىزمەت ءۇشىن» دەيدى. سوندا قالاي, ول بىزگە كورسەتكەن قىزمەتى ءۇشىن اي سايىن تۇراقتى ەڭبەكاقى الىپ وتىرعان جوق پا؟
مەنىڭشە, ءبارىن «وسىلاي ەكەن» دەپ نارىققا جابا بەرۋدى قويۋىمىز كەرەك. ايتالىق, ءبىز تۇرىپ, ءومىر ءسۇرىپ جاتقان اۋدان بويىنشا 60 مىڭنان استام حالىقتىڭ كۇندەلىكتى ەلەكتر ەنەرگياسىن تۇراقتى پايدالاناتىنى بەلگىلى جايت. وسىنداعى 10 مىڭنىڭ ۇستىندەگى تۇرعىن ۇيدە 11 مىڭنان كوپ وتباسى جوعارىدا ءبىز ايتقان ەلەكتر ەنەرگياسىن تۇتىنادى ەكەن. سوندا ءار تۇتىنۋشىدان 70 تەڭگەدەن العاننىڭ وزىندە, اي سايىن قانشا قارجىنىڭ مەكەمە كاسساسىنا تۇسەتىنىن ءوزىڭىز ەسەپتەي بەرىڭىز.
بىرەۋدىڭ قالتاسىنداعى قارجىنى ساناۋدان اۋلاقپىز. الايدا, بەس ساۋساقتىڭ بىردەي ەمەستىگى سەكىلدى, تۇتىنۋشىلاردىڭ ءبارى بىردەي تولەم تولەۋگە قابىلەتتى ەمەس ەكەندىگىن دە ەسكەرۋىمىز كەرەك ەمەس پە؟
مەنىكى دۇرىس ەكەن دەپ, ءوزىم بىلەمدىككە سالىنىپ, زاڭدى, زاڭسىز بۇيرەكتەن سيراق شىعارا بەرۋ دە ءجون ەمەس-اۋ...
ءبىر مەزگىل حالىقتىڭ جاعدايىنا قاراعانعا نە جەتسىن!
كارىباي امزە ۇلى,
زەينەتكەر
وڭتۇستىك قازاقستان وبلىسى,
سوزاق اۋدانى
جاستاي بەرگەن تاربيە ابزال
قازىرگىدەي وزىق تەحنولوگيالار, جاھاندانۋ ءۇردىسى تامىرىن تەرەڭگە جايىپ, ءبارىمىز ۇلتتىق قۇندىلىقتاردان قول ۇزىڭكىرەگەن تۇستا ەردىڭ قۇنىن ءبىر اۋىز سوزبەن شەشكەن حالقىمىزدىڭ شەشەندىك, ۇلاعاتتى سوزدەرىنىڭ قادىر-قاسيەتىن جان-تانىڭمەن ۇققانداي بولاسىڭ. وسىعان قاراپ-اق بالانىڭ ۇيادان قانات قاعىپ ۇشىپ, ازامات ساناتىنا جەتكەنگە دەيىنگى ءتالىم-تاربيەسىنە اسا ىقتياتتى, جاۋاپتى بولعانىن اڭعارامىز. ەرتەدەن قارا كەشكە دەيىن كومپيۋتەردەن تۇسپەيتىن جاستاردىڭ بويىنان يناباتتىلىق, سىپايىلىق, مەيىرىمدىلىك قاسيەتتەردىڭ جەتىسپەيتىنىن كورىپ, وسىلار نەگە قاتىگەزدەنىپ بارادى دەگەن سۋىق ويدىڭ سۋماڭداپ قويا بەرەتىنى بار.
مەكتەپ جاسىنا جەتكەن بالانى اتا-اناسى ۇستازدار قاۋىمىنا سەنىپ تاپسىرادى. ۇستاز ءۇشىن ناعىز سىن باستالادى. وسى ۇدەدەن كورىنۋ وڭاي ەمەس. ايانباي ەڭبەك ەتۋ, تەر توگۋ از. اتا-انامەن ۇنەمى تىعىز قارىم-قاتىناس جاساي وتىرىپ, ساپالى ءبىلىم بەرۋمەن قاتار رۋحاني جاعىنان جان-جاقتى كەمەلدەنۋىنە دە ەرەكشە ءمان بەرگەن دۇرىس. قازىرگى تاڭدا ۇستازدار وقۋشىنى دەربەس تۇلعا رەتىندە قالىپتاستىرۋ, سىني ويلاۋ جاعىنا كوبىرەك ويىسىپ كەتتى دە, تاربيەنىڭ كەمشىندىگى وسىندايدا بايقالىپ قالادى.
كەي ۇستازدار دا ءبىلىمدى الدىڭعى ورىنعا شىعارىپ, تاربيە جاعىن ۇمىتىپ قالدىرىپ جاتادى. بالانىڭ بولاشاعى جارقىن, كەلەشەگى كەمەل بولسىن دەسەك ۇلتتىق ءتالىم-تاربيەنىڭ تۇنىپ تۇرعان اسىلدارى مەن ءىنجۋ-مارجاندارىن تەرىپ الىپ, بويلارىنا سىڭىرە بىلەيىك دەگىم كەلەدى. مەكتەپتە ءبىلىم مەن تاربيەگە قاتار كوڭىل بولىنسە, ەل قورعانى, قالقانى بولاتىن ازاماتتاردىڭ قاتارى قالىڭداي تۇسەرى ءسوزسىز.
گۇلناراي تالاسباەۆا,
م.احمەتبەكوۆ اتىنداعى
ورتا مەكتەپتىڭ باستاۋىش سىنىپ مۇعالىمى
سولتۇستىك قازاقستان وبلىسى,
شال اقىن اۋدانى
ناۋقاستىڭ جانىنا شۋاق شاشقان
التى بالانىڭ اناسى ورىنشا ەرماعامبەتقىزىنا بيىلعى قازان ايىندا كۇردەلى وتا جاسالىنىپ, قۇدىرەتتى جاراتۋشىنىڭ جانە وتا جاساعان دارىگەرلەردىڭ بىلىكتىلىگى ارقاسىندا امان قالدى. وتانىڭ ءساتتى جاسالۋىنا جانە وتادان كەيىنگى جاعدايىن قالىپقا كەلتىرۋگە بارىن سالعان باتىس قازاقستان وبلىستىق ونكولوگيالىق ديسپانسەرى قىزمەتكەرلەرى – ونكولوگ تايمان امانوۆ, حيرۋرگ رۋسلان سايدەنوۆ, مەيىربيكەلەر شىنار تولەگەنوۆا, مەيرامگۇل راحمەتوۆا, باقىتجامال ماقپوزوۆا, تولقىن قوشقاروۆاعا العىس بىلدىرەمىز. انامىزدىڭ ايتۋىنشا, بۇل دارىگەرلەر ءار ناۋقاسقا ايرىقشا ىلتيپاتپەن قاراپ, ناۋقاستىڭ جان دۇنيەسىنە شۋاق شاشقان ەرەكشە جاندار ەكەن. اق جەلەڭدى ابزال جانداردىڭ وتباسىنا ىنتىماق, باق-بەرەكە تىلەيمىز!
حاديشا سەيىلحانقىزى
باتىس قازاقستان وبلىسى,
شىڭعىرلاۋ اۋىلى
مەكتەپكە ۇلاعاتتى ۇستازدىڭ ەسىمى بەرىلدى
شايىر اۋىلىنداعى ورتا مەكتەپكە ماڭعىستاۋ ولكەسىنە تانىمال, ء«بىلىم بەرۋ ءىسىنىڭ ۇزدىگى» تۇرار جالعاسباي ۇلى ەسىمى بەرىلدى. تۇرەكەڭنىڭ الدىنان سان الۋان شاكىرتتەر ءوتتى. بارلىعى دا ءبىلىمدى جانە ەل تۇتقاسىن ۇستاعان ەل ازاماتتارى بولدى. ۇلاعاتتى ۇستاز 1950-1987 جىلدار ارالىعىندا وسى مەكتەپتىڭ ديرەكتورى بولىپ ەرەن ەڭبەك ەتتى. اۋدانداعى ءبىلىم جۇيەسىن العاشقى قۇرۋشىلاردىڭ ءبىرى بولدى. ەڭبەك جولىن ءوز اۋىلىندا مۇعالىمدىكتەن باستاپ, قىزان, شەبىر, جارمىش باستاۋىش مەكتەپتەرىنىڭ مەڭگەرۋشىسى, اۋىزدىباس ورتا مەكتەبىنىڭ ديرەكتورى بولدى. 1964 جىلى «حالىق اعارتۋ ءىسىنىڭ ۇزدىگى» اتاعىن, 1974 جىلى «ەڭبەك ارداگەرى» مەدالىن يەلەندى.
اللابەرگەن قونارباەۆ
ماڭعىستاۋ وبلىسى,
ماڭعىستاۋ اۋدانى
