قاڭتار
جىل باسىندا XXIII قىسقى وليمپيا ويىندارىنا ليتسەنزيا الۋ ءۇشىن شاڭعىشىلارىمىز جارىس جولىنا شىعادى. قۇراما كوماندامىز ءدۇبىرلى دوداعا 11 سپورتشى اپارۋدى جوسپارلاپ وتىر. 6 ەر جانە 5 ايەل سپورتشى قازاقستاننىڭ نامىسىن قورعاۋى ءتيىس. ولاردىڭ ىشىندە ءدال قازىر وليمپياداعا بارۋى تيىستىلەردىڭ قاتارىندا ەلەنا كولومينا, اننا شەۆچەنكو, الەكسەي پولتورانين, سەرگەي مالىشەۆتەر بار. ال قالعان شاڭعىشىلاردى باپكەرلەر وسى قاڭتار ايىندا انىقتايتىن بولادى. ونىڭ ۇستىنە سپورتشىلارىمىزدى شۆەيتسارياداعى لەنتسەرحايدە, گەرمانياداعى وبەرستدورف, يتالياداعى ۆال دي فيەممەدە وتەتىن شاڭعىدان الەم كۋبوگىنىڭ كەزەڭدەرى كۇتىپ تۇر. وليمپياداعا باراتىن سپورتشىلاردىڭ كوبىسىنىڭ ەسىمدەرى ءدال وسى قاڭتار ايىندا انىقتالادى.
اقپان
اقپان ايىنىڭ ءوزى تۇگەلدەي وليمپيادانىڭ اينالاسىندا وتەتىنى بىلگىلى. كۇللى الەمدىك سپورتتىڭ كوڭىلى وڭتۇستىك كورەياعا تۇسەدى. 9-25 ارالىعىندا پحەنچحان قالاسىنداعى ءدۇبىرلى دوداعا ءبىز دە كوز تىگەمىز. ءبىرلى-جارىم سپورت تۇرلەرىنەن مەدال الىپ قالۋىمىز عاجاپ ەمەس. دەنيس تەن سەكىلدى مانەرلەپ سىرعاناۋشىمىزدى, شورت-ترەكتەگى كوماندامىزدى, نەمەسە گالينا ۆيشنەۆسكايا باستاعان بياتلونشىلارىمىزدىڭ, سەرگەي پولتورانين قوستاعان شاڭعىشىلارىمىزدىڭ جولىنا ۇمىتپەن قارايمىز.
اي باسىندا دەۆيس كۋبوگى اياسىنداعى 1/8 فينالدىق ويىندار جوسپارلانعان. سولاردىڭ قاتارىندا قازاقستان مەن شۆەيتساريا اراسىنداعى كەزدەسۋ بار. ماتچتار ەلورداداعى «داۋلەت» ۇلتتىق تەننيس ورتالىعىندا وتەدى.
سونىمەن قاتار, اقپان ايىندا «استانا» فۋتبول كلۋبى ەۋروپا ليگاسىنىڭ پلەي-وفف كەزەڭىندەگى ويىنىن وتكىزەدى. استاناعا پورتۋگاليانىڭ «سپورتينگ» كومانداسى كەلەدى. ال 30 قاڭتار مەن 10 اقپان ارالىعىندا سلوۆەنيا استاناسى ليۋبليانا قالاسىندا فۋتزالدان ەۋروپا چەمپيوناتى وتەدى. وعان قازاقستان ۇلتتىق قۇراماسى قاتىسادى.
ناۋرىز
ناۋرىز ايىندا قازاقستاننىڭ فۋتبولدان پرەمەر-ليگاسى باستالادى. ەلىمىزدىڭ 12 قالاسىندا ىشكى بىرىنشىلىك ويىندارى ءوتىپ, فۋتبول ماۋسىمى رەسمي تۇردە اشىلادى. مانەرلەپ سىرعاناۋشىلاردىڭ الەمدىك دوداسى 18 ناۋرىز كۇنى يتاليانىڭ ميلان نەمەسە تۋرين قالاسىندا ۇيىمداستىرىلادى دەپ جوسپارلانعان. وعان قازاقستاندىق سپورتشىلار دا قاتىسادى دەپ كۇتىلۋدە. اقپان ايىنىڭ سوڭىندا باستالاتىن كۇرەس تۇرلەرىنەن ازيا بىرىنشىلىگى بىشكەك قالاسىندا وتەدى. وعان قازاقستاندىق بالۋاندار قاتىساتىنىن دا ايتا كەتەيىك.
ءساۋىر
ءساۋىر ايىندا چەمپيوندا ليگاسىنىڭ جانە ەۋروپا ليگاسىنىڭ جارتىلاي فينالدىق كەزدەسۋلەرى بولادى. بۇل ويىندار كۇللى عالامشاردىڭ نازارىن وزىنە اۋدارتاتىنى انىق. الايدا, قازاقستاندىق سپورتشىلار قاتىساتىن دودالارعا توقتالاتىن بولساق, ولاردىڭ ىشىندەگى ەڭ سۇيەكتىسى, ماڭىزى جوعارىسى – جاسوسپىرىمدەر اراسىنداعى حوككەيدەن الەم چەمپيوناتى. وعان قازاقستان U-18 كومانداسى قاتىسادى. 19-29 ءساۋىر ارالىعىندا رەسەيدىڭ ماگنيتاگورسك جانە چەليابينسك قالالارىندا وتەتىن بۇل جارىستان ءۇمىتىمىز زور. سەبەبى, وتكەن جىلى جىگەرلى جاستارىمىز كۇمىس مەدال ەنشىلەپ قايتقان ەدى.
مامىر
مامىر ايىندا چەمپيوندار ليگاسى مەن ەۋروپا ليگاسىنىڭ فينالدارى وتەتىنىن دە ەستەن شىعارمايىق. سونىمەن قاتار, وسى ايدا ءوزىمىزدىڭ «استانا» ۆەلو كومانداسى قاتىساتىن «دجيررو يتاليا» كوپكۇندىگى ۇيىمداستىرىلادى. ايتپاقشى, مامىر ايىندا تاعى ءبىر قىزۋ, ءباسى جوعارى بوكس باسەكەسى ۇيىمداستىرىلۋى ىقتيمال. گەننادي گولوۆكين مەن ساۋل الۆارەس اراسىنداعى ەكىنشى قايتارا كەزدەسۋ ءدال وسى مامىر ايىندا ءوتىپ قالۋى ابدەن مۇمكىن. قازىر كەلىسسوزدەر جۇرگىزىلۋدە.
ماۋسىم
ماۋسىم ايىنىڭ 6-سى كۇنى رەسەي-ساۋد ارابيا ويىنىمەن 2018 جىلعى فۋتبولدان الەم چەمپيوناتى باستالادى. كورشىلەس رەسەي جەرىندە ءوتىپ جاتقان ءدۇبىرلى دوداعا بارىپ, كەيبىر ويىنداردى تريبۋنادان تاماشالاۋعا تاماشا مۇمكىندىك بار.
شىلدە
قازاقستاندىق فۋتبول كلۋبتارى ەۋروپا ليگاسىنداعى ىرىكتەۋ ماتچتارىن باستايدى. «قايرات», «ەرتىس», «ورداباسى» كوماندالارى كارى قۇرلىقتاعى جورىقتارىن العاشقى اينالىمداردان باستاسا, ءىزىن الا «استانا» كومانداسى چەمپيوندار ليگاسىنداعى ويىندارىن وتكىزەدى. شىلدە ايىنىڭ سوڭىنا قاراي ادەتتەگىدەي «تۋر دە فرانس» ۆەلوكوپكۇندىگىنىڭ كۇندەرى كەلە قالادى. الەمدەگى مىقتى ۆەلوشاباندوزداردىڭ باسىن تەگىس قوساتىن داڭقتى جارىسقا «استانا» پرو تيم كومانداسى دا قاتىسادى. ءدۇبىرلى دودا 7-29 شىلدە ارالىعىندا وتەدى.
تامىز
18 تامىز كۇنى دزيۋدودان ەۋروپانىڭ اشىق بىرىنشىلىگى جالاۋىن جەلبىرەتەدى. باس باپكەرىن اۋىستىرعان قازاقستان ۇلتتىق قۇراماسى يزرايلدە وتەتىن دوداعا تىڭعىلىقتى دايىندىقپەن بارادى. ارينە, وعان دەيىن دە, ودان كەيىن دە گران-پري سايىستارى بولعانىمەن, ءبىزدىڭ كوماندا اسىرەسە وسى ەۋروپا چەمپيوناتىنا باسا نازار اۋدارادى. تامىز ايىنىڭ بەل ورتاسىندا يندونەزيا استاناسى دجاكارتادا جازعى ازيا ويىندارى وتەدى. بۇل دا ەلىمىز سپورتشىلارىنىڭ سارى قۇرلىقتاعى شاماسىن بايقاپ الاتىن تۇسى. وسى جولى ادەتتەگىدەي بوكسشىلار مەن پالۋاندارىمىزدان بولەك وزگە دە سپورت تۇرلەرىندەگى جاستارىمىزعا كوز تىگەتىن بولامىز. مىسالى, جەڭىل اتلەتيكا مەن جۇزۋشىلەرىمىز مەدال الىپ قالۋى ابدەن مۇمكىن. ازيا ويىندارىنىڭ باستالۋى دا 18 تامىز كۇنى.
قىركۇيەك
قىركۇيەك ايىندا ۆەلوسپورتتىڭ سوڭعى ءۇشىنشى ءىرى گراند-تۋر جارىسى وتەدى. 21 كەزەڭنەن تۇراتىن «ليا-ۆۋەلتا يسپانيا» ۆەلوبايگەسى «استانا» كومانداسى ءۇشىن جۇلدە الاتىن تاماشا مۇمكىندىك. بۇل اسىرەسە قازاقستاندىق شاباندوزدار جاندوس بيجىگىتوۆ, رۋسلان تىلەۋباەۆ, دميتري گرۋزدەۆتەردىڭ جارقىرايتىن شاعى.
بۇل جارىس اياقتالىسىمەن ۆەلوشاباندوزدارىمىز اۋستريانىڭ ينسبۋرگ قالاسىندا وتەتىن الەم چەمپيوناتىنا اتتانادى. ءبىز ادەتتەگىدەي الەكسەي لۋتسەنكو باستاعان جەرلەستەرىمىزگە جانكۇيەر بولامىز.
قازان
جاپونيا جەرىندە قىزدار اراسىنداعى ۆولەيبولدان الەم چەمپيوناتى وتەدى. ازيا قۇرلىعىنان ىرىكتەلىپ شىققان 4 كوماندانىڭ ىشىندە ءبىزدىڭ قاراكوزدەرىمىز دە بار. بۇل جارىس 30 قىركۇيەك پەن 21 قازان ارالىعىندا وتەدى. جارىستىڭ جەرەبەسى تارتىلىپ, قازاقستان «D» توبىنا ءتۇستى. وندا بىزدەن بولەك سەربيا, برازيليا, دومەنيكان, پۋەرتو-ريكو جانە كەنيا قۇرامالارى بار.
قاراشا
قاراشانىڭ 24-ءى كۇنى تۇرىكمەنستان استاناسى اشعابادتا اۋىر اتلەتيكادان الەم چەمپيوناتى وتەدى. كوپتەگەن دوپينگ داۋىنا ۇشىراعان ءبىزدىڭ سپورتشىلارىمىز وسى جولى ءتاۋىر ناتيجە كورسەتۋى ءتيىس. اتالعان جارىسقا داڭقتى سپورتشىمىز يليا يلين دە قاتىسۋى بەك مۇمكىن. سوندىقتان دا, ءدال وسى جولعى الەم چەمپيوناتى ءبىزدىڭ كوماندا ءۇشىن وتە قىزىقتى وتەتىنى انىق.
جەلتوقسان
جەلتوقسان ايى باستالىسىمەن 2018/2019 جىلعى قىسقى سپورتتىڭ ماۋسىمى اشىق دەپ جاريالانادى. بىردەن بياتلون مەن شاڭعىشىلاردا الەم كۋبوگىنىڭ كەزەڭدەرى شىمىلدىعىن تۇرەدى. ءبىز ادەتتەگىدەي گالينا ۆيشنەۆسكايا مەن ماكسيم براۋندارعا سەنىم ارتامىز. 2019 جىلدىڭ كوكتەمىندە ەۋرو-2020 جارىسىنىڭ ىرىكتەۋ كەزەڭى باستالاتىندىقتان فۋتبولدان قازاقستان ۇلتتىق قۇراماسى وسى ايدا وقۋ-جاتتىعۋ جيىندارىن وتكىزىپ, جولداستىق ويىندار وتكىزەدى.
ەرمۇحامەد ماۋلەن,
«ەگەمەن قازاقستان»
