نۇرسۇلتان نازارباەۆ بۇۇ قاۋىپسىزدىك كەڭەسىندە ءسوز سويلەيدى

ەلشى قاۋىپسىزدىك كەڭەسىنىڭ وسى ايداعى جۇمىسى جايىندا اڭگىمەلەدى, سونداي-اق 18 قاڭتاردا كەڭەستە جاپپاي قىرىپ-جويۋ قارۋلارىن تاراتپاۋعا ارنالعان جوعارى دەڭگەيدەگى تاقىرىپتىق بريفينگ وتەتىندىگىن ايتتى. وعان بىرقاتار ەلدەردىڭ باسشىلارى مەن مينيسترلەرى قاتىسادى. بريفينگتە قازاقستان پرەزيدەنتى نۇرسۇلتان نازارباەۆ ءسوز سويلەيدى. «نەلىكتەن بۇل ماسەلەنى قوزعاۋعا شەشىم قابىلدادىق؟ ءبىز بۇگىنگى تاڭدا ءتۇرلى ساياسي كوشباسشىلاردىڭ, ەلدەردىڭ اراسىندا سەنىمدى قارىم-قاتىناستار قۇرۋعا كوبىرەك ءمان بەرۋىمىز قاجەت دەپ ەسەپتەيمىز», - دەدى قايرات وماروۆ.

- ونسىز ەشقانداي ماسەلەنى شەشۋ مۇمكىن ەمەس. مەنىڭشە, قازىرگى الەمدە ءدال وسى جەتپەي تۇر». ق. وماروۆ 19 قاڭتار كۇنى قاۋىپسىزدىك كەڭەسىندە قازاقستاننىڭ سىرتقى ىستەر ءمينيسترى قايرات ءابدىراحمانوۆ اۋعانستان مەن ورتالىق ازيا ەلدەرى اراسىنداعى وڭىرلىك ىنتىماقتاستىقتى نىعايتۋعا ارنالعان مينيسترلەر دەڭگەيىندەگى پىكىرسايىسقا توراعالىق ەتەتىندىگىن ءمالىم ەتتى. وتىرىستا بۇۇ باس حاتشىسى انتونيۋ گۋتەرريش ءسوز سويلەيدى.

بۇۇ باسشىسى ورتالىق ازياعا وتكەن جىلدىڭ جازىندا كەلگەن. قازاقستان ەلشىسىنىڭ سوزىنە قاراعاندا, قاۋىپسىزدىك كەڭەسىنىڭ قاڭتارداعى كۇن تارتىبىندە تۇرعان ءۇشىنشى ماڭىزدى تاقىرىپ تاياۋ شىعىس, سونىڭ ىشىندە پالەستينا ماسەلەسى بولماق. سونداي-اق قاۋىپسىزدىك كەڭەسىنىڭ مۇشەلەرى سيرياداعى جاعدايدى دا تالقىلايدى, - دەدى ق. وماروۆ. ول 2017 جىلى جەلتوقساندا استانادا سيريا بويىنشا كەزەكتى كەزدەسۋ وتكەندىگىن ەسكە سالدى. بۇۇ-دا ونى ناتيجەلى دەپ باعالادى. قازاقستان العاش رەت قاۋىپسىزدىك كەڭەسىنىڭ مۇشەسى بولدى جانە العاش رەت وعان توراعالىق ەتۋدە. قازاقستان ورتالىق ازيا ەلدەرىنىڭ ىشىندە قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانعان العاشقى مەملەكەت اتاندى.