جانكەشتى ءشيى باعىتىن ۇستاناتىنداردىڭ عيماراتىنا ەنىپ, ءوزىن ءوزى جارىپ جىبەرگەن. اۋعانستاننىڭ ىشكى ىستەر مينيسترلىگى بۇل وقيعادان كەيىن ارتىنشا تاعى ەكى جەردە جارىلىس بولعانىن حابارلادى.
تەررورشىنىڭ ارەكەتىنەن سول ماڭايداعى Afghan Voice اقپارات اگەنتتىگىنىڭ رەداكتسياسى دا زارداپ شەكتى. وقىس وقيعانى يگيل سودىرلارى ۇيىمداستىردى دەگەن اقپارات بار. سەبەبى, سوڭعى ايلاردا اتالعان توپ مۇشەلەرى اۋعانستاننىڭ ءتۇرلى پروۆينتسيالارىنداعى شيىلەرگە ءجيى شابۋىلداپ ءجۇر.
ال Afghan Press قىزمەتكەرى عيماراتتان ونداعان ادامنىڭ ءمايىتى شىعارىلعانىن ايتتى. شابۋىل كەزىندە عيماراتتا جوعارى وقۋ ورىندارىنىڭ ستۋدەنتتەرى, اقپاراتتىق قىزمەتكەرلەر بولعان.
وتكەن دۇيسەنبى كۇنى, ياعني 25 جەلتوقساندا كابۋلدا بارلاۋ قىزمەتىنىڭ عيماراتتار كەشەنىندە جارىلىس بولىپ, ون ادام قازا تاپقان.
يگيل ۇيىمى 2015 جىلى قاڭتاردا اۋعانستان جەرىندە «حوراسان» ءبولىمى قۇرىلعانىن حابارلاعان بولاتىن. ءتۇرلى مالىمەتتەرگە بايلانىستى اتالعان توپتىڭ 1000-5000 سودىرى بار.
