قوس ەل بۇگىندە سەنىمدى سەرىكتەس, مىزعىماس دوس, باۋىرداي تاتۋ. ۆەنگرلەر قازاقستاندى وزدەرىنىڭ اتا-جۇرتى سانايدى. XIII عاسىردا 40 مىڭ قىپشاق موڭعولداردىڭ شاپقىنشىلىعىنان وسى ۆەنگرياعا قونىس اۋدارعان. بەرتىندە جۇرگىزىلگەن گەنەتيكالىق زەرتتەۋلەر ماجارلار مەن قازاقتاردىڭ ءبىر-بىرىنە بوتەن ەمەس ەكەندىگىن دالەلدەدى. قوس تاراپ وسى تۋىستىقتى, ىنتىماقتى ودان ءارى ارتتىرۋعا ىنتالى.
ءبىرى ەۋروپانىڭ, ەكىنشىسى ازيانىڭ التىن قاقپاسىنا اينالعان قوس ەلدىڭ تاۋار اينالىمى قارت قۇرلىقتاعى داعدارىسقا قاراماستان جىل وتكەن سايىن ارتىپ كەلەدى. ۆەنگريانىڭ ءبىر عانا «MOL» كومپانياسى وسى ۋاقىتقا دەيىن باتىس قازاقستان وبلىسىنا 200 ملن.دوللار ينۆەستيتسيا قۇيدى. جاقىندا قۇرىلعان قازاق-ۆەنگر ينۆەستيتسيالىق قورى ەندى اقتوبە, اقمولا وبلىستارىندا اۋىل شارۋاشىلىعى جوبالارىن قارجىلاندىرادى. ماجارلاردىڭ كولىك ينفراقۇرىلىمىن دامىتۋداعى تاجىريبەسىن يگەرۋ دە بىزگە كوپتىك ەتپەيدى. بۇل تۋرالى «قازاقستان» ۇلتتىق ارناسى حابارلادى.
ۆەنگريانىڭ گەوفيزيكتەرى, IT ماماندارى دا الەمدەگى ەڭ ۇزدىكتەردىڭ قاتارىندا. سول مىقتىلاردى دايىندايتىن جوعارعى وقۋ ورىندارىندا قازىر 200 قازاقستاندىق ستۋدەنت ماجار ۇكىمەتىنىڭ گرانتىنا تەگىن ءبىلىم الىپ جاتىر. ماجار جاستارى اراسىندا دا قازاق ءتىلىن ۇيرەنىپ, قازاقستاندا وقىسام دەۋشىلەر كوپ. سولاردىڭ ءبىرى - زولتان حۋستي.
زولتان قازاقشاعا ءازىر شورقاق. ەندى ۇيرەنىپ ءجۇر. ەسەسىنە, دومبىرامەن قازاقتىڭ كۇيلەرىن كۇمبىرلەتكەندە تاڭداي قاقتىرماي قويمايدى.
- مەن وسى كۇيدى تارتىپ, الماتىدا وتكەن ونەرپازدار بايقاۋىندا 3-ءشى ورىندى يەمدەندىم. قىپشاق ەكەنىمدى, قازاقتار باۋىرىم ەكەنىن كىشكەنتايىمنان ساناما ءسىڭىرىپ وسكەندىكتەن, اتا-بابام سياقتى دومبىرادا ويناعىم كەلدى. ءسويتىپ, عالامتوردان ۇيرەنۋدى باستادىم. سوسىن بەلگىلى عالىم يشتۆان قوڭىردىڭ جارى وڭعايشا ماندوكيدىڭ قولداۋىمەن قازاقستانعا بارىپ, كاسىبي مامانداردان ءبىراز شەبەرلىك ساباعىن الدىم, - دەدى ماجارلىق ونەرپاز زولتان حۋستي.
«ناعىز قازاق - قازاق ەمەس, ناعىز قازاق - دومبىرا» دەپ ماقالداتقان زولتان قازىر قۇرمانعازى, دينا مەن تاتتىمبەتتىڭ 5-6 كۇيىن جاتقا بىلەدى. استانادان سۋ جاڭا دومبىراسى جەتسە, مەكتەپتەگى مەرەكەلىك كەشتە ءوز ونەرىن كورسەتەدى. قازاق ءتىلىن جەتىك مەڭگەرىپ, شەرتپە كۇيدىڭ شەبەرى بولسام دەيتىن وقۋشى ستۋدەنتتىك ءومىرىن قازاقستاندا وتكىزۋدى كوزدەپ وتىر. تاعى ءبىر ارمانى - تەكتىك تۇتاستىعىن ساقتاپ, باۋىرلاس حالىقتاردىڭ دوستىعىن نىعايتۋعا ۇلەس قوسۋ.
