الدا كەلە جاتقان مەرەكەنىڭ ەڭ نەگىزگى اتريبۋتىنىڭ ءبىرى "ەكسپو" كورمەسىنىڭ اۋماعىندا نۇر الەم سفەراسىنىڭ ماڭايىنا ورناتىلدى.
"بيىل استانادا ورناتىلعان جاڭا جىلدىق شىرشانى 200 مىڭ جارقىراعان گيرليانديا مەن 6000 شار جانە دە ءارتۇرلى جانىپ-ءسونىپ تۇراتىن اشەكەيلەرمەن ساندەلدى. شىرشانىڭ ۇزىندىعى 25 مەتردى قۇرايدى" - دەيدى استانا قالاسىنىڭ مادەنيەت, مۇراعات جانە قۇجاتتاما باسقارماسى باسشىسىنىڭ ورىنباسارى ناريما مۇحامبەتالينا.
استانا قالاسىنىڭ تۇرعىنى مەن قوناقتارى ءۇشىن قازاقستاندىق ەسترادا جۇلدىزدارىنىڭ قاتىسۋىمەن كونتسەرتتىك باعدارلاما ۇيىمداستىرىلدى, ال بالالارعا ارناپ سۇيىكتى كەيىپكەرلەرىنىڭ بەينەسىندە انيماتورلار شىقتى. شىرشانى تۇتاندىرۋ راسىمىنە كەلۋشىلەر مەرەكەلىك فەيەرۆەرككە كۋا بولدى.
"وسىنداي كەزەكتى رەت استانانىڭ باس شىرشاسىن جاعاتىن ادەمى سيمۆوليكالىق ءىس-شاراسىن ءبارى جاقسى كورەدى, بارشامىز وسى مەرەكەنى ۇلكەن قۋانىشپەن كۇتەمىز. مۇندا كەلگەن بالالاردىڭ دا, ۇلكەندەردىڭ دە, قوناقتاردىڭ دا كوڭىل-كۇيى كەرەمەت", - دەيدى ن.مۇحامبەتالينا.
باس شىرشانى جاعۋمەن قاتار ەكسپو-2017 كورمەسىنىڭ اۋماعىندا ورنالاسقان ءىرى مۇز قالاشىقتىڭ دا اشىلۋى بولىپ ءوتتى.
مۇندا ەرەسەكتەر ءۇشىن بيىكتىگى 5 مەتر جانە ۇزىندىعى 40 مەتر سىرعاناق پەن بالالار ءۇشىن ەكى سىرعاناق بوي كوتەردى, بالالار سىرعاناعى سايكەسىنشە - 2,5 جانە 14 مەتر. ال قالاشىقتىڭ تاقىرىبى "ەكسپو-2017" بولاشاقتىڭ ەنەرگياسى" دەپ اتالدى, سوندىقتان لوندوننىڭ گايد-پاركىندە 1851 جىلى اشىلعان ءبىرىنشى ەكسپو كورمەسى مەن 1889 جىلعى كورمەدەگى كىرە بەرىس قاقپا - ەيفەل مۇناراسىنىڭ مۇز كوشىرمەسى قويىلدى.
بالالاردى اسىرەسە بيىكتىگى 6 مەتر اتاقتى ديسنەي لەند سارايىنىڭ كوشىرمەسى قىزىقتىردى. مينونا, تانىمال كوميك قاھارماندارى, ماكۋين نايزاعايى, ءۇش مەتر اياز اتا مەن قارشا قىزدىڭ مۇز بەينەسى كومپوزيتسيالاردىڭ ءسانىن اشا ءتۇستى. بۇلاردىڭ ءبارى دە ءتۇرلى-ءتۇستى مۇزدان جاسالدى.
سونىمەن قاتار, قوناقتار ءۇشىن مۇز قالاشىقتا بيىكتىگى جارتى مەترگە جۋىق 80 مەترلىك لابيرينت اشىلدى. قالاشىق بارلىق پەريمەترى بويىنشا فۋتۋريستىك ستيلدەگى ارحيتەكتۋرالىق فورمادا ورناتىلدى.
