نۇرسات شاعىن اۋدانىندا بوي كوتەرگەن كوپقاباتتى 11 تۇرعىن ءۇي «نۇرلى جەر» تۇرعىن ءۇي قۇرىلىسى باعدارلاماسىنىڭ ەكىنشى باعىتى بويىنشا سالىنعان. جالپى 31,5 مىڭ شارشى مەتر بولاتىن ۇيلەردەگى 558 باسپانا كىلتى تۇرعىن ءۇي قۇرىلىس جيناق بانكىنىڭ سالىمشىلارى مەن جەرگىلىكتى اتقارۋشى ورگاندا كەزەكتە تۇرعان ازاماتتارعا بەرىلدى.
اكىمشىلىك-ىسكەرلىك ورتالىعىندا پايدالانۋعا بەرىلگەن 9 قاباتتى 48 پاتەرلى ەكى تۇرعىن ۇيدەگى باسپانا كىلتىن وڭتۇستىك قازاقستان وبلىسىنىڭ اكىمى ج.تۇيمەباەۆ, وبلىستىق ءماسليحاتىنىڭ حاتشىسى ق.بالابيەۆ, شىمكەنت قالاسىنىڭ اكىمى ن.ساۋرانباەۆ جانە قالالىق ءماسليحاتىنىڭ حاتشىسى ن.بەكنازاروۆ ارنايى تابىستاپ, بارشا تۇرعىنداردى جاڭا قونىسپەن قۇتتىقتادى.
«ەلىمىزدە تۇرعىنداردى باسپانامەن قامتۋ ماسەلەسى جۇيەلى تۇردە جۇرگىزىلۋدە. بۇگىندە مەملەكەت قولداۋىنىڭ ناتيجەسىندە وبلىسىمىزدا باسپاناعا قولى جەتىپ, قونىس تويىن تويلاپ جاتقانداردىڭ قاتارى از ەمەس. ماسەلەن. وسى جىلى «نۇرلى جەر» تۇرعىن ءۇي باعدارلاماسى اياسىندا شىمكەنت قالاسىندا 83 تۇرعىن ءۇيدىڭ ياعني 5052 پاتەردىڭ قۇرىلىسى باستالعان بولاتىن. بۇگىن مەرەكەسى قارساڭىندا وسى تۇرعىن ۇيلەردىڭ 11-ءى, ياعني, 558 پاتەر بەرىلىپ وتىر. جىل سوڭىنا دەيىن تاعى دا ارەندالىق 1152 پاتەر بولاتىن 16 تۇرعىن ءۇيدىڭ قۇرىلىسىن پايدالانۋعا تاپسىرۋ جوسپارلانۋدا. دەمەك, وسى ايدىڭ وزىندە قانشاما وتباسى قونىس تويىن تويلاماق. بۇل ەگەمەندى ەلىمىزدىڭ جەمىسى دەپ بىلەمىن», - دەپ ايتتى ايماق باسشىسى.
سونداي-اق, جانسەيىت قانسەيىت ۇلى باسپانالى بولعان تۇرعىندارعا بالالارىنىڭ اتىنان ءبىر-ءبىر اعاشتان وتىرعىزىپ, سونى كۇتىپ باپتاۋدى ۇسىندى.
جالپى 2017 جىلى بارلىق قارجىلاندىرۋ كوزدەرى ارقىلى وبلىستا 279 تۇرعىن ءۇيدىڭ قۇرىلىسى جۇرگىزىلۋدە. ول جالپى شارشى مەترى 995,7 مىڭ بولاتىن 14 694 پاتەر. جىل سوڭىنا دەيىن اتالعان ۇيلەردىڭ 109-نىڭ ياعني 5893 پاتەردىڭ قۇرىلىسىن اياقتاپ, پايدالانۋعا تاپسىرۋ جوسپارلانىپ وتىر.
2017 جىلدىڭ 11 ايىنىڭ قورىتىندىسى بويىنشا وبلىستاعى جالپى جەكە جانە كوپقاباتتى 547,1 مىڭ ش.م. تۇرعىن ءۇي پايدالانۋعا بەرىلدى, وتكەن جىلدىڭ وسى مەرزىمىمەن سالىستىرعاندا 4,1 پايىزعا ۇلعايعان.
