استانا قالاسى اكىمىنىڭ تاپسىرماسى بويىنشا ەلوردانىڭ دەنساۋلىق ساقتاۋ باسقارماسى «استانا – دەنى ساۋ ادامداردىڭ قالاسى» اتتى سالانى دامىتۋ تۇجىرىمداماسىن ازىرلەۋدە.
اتالمىش باعدارلامالىق قۇجات ەلوردانىڭ دەنساۋلىق ساقتاۋ جۇيەسىنىڭ الداعى بەسجىلدىق دامۋ باعىتىن انىقتايتىن بولادى.
«حالىقتىڭ دەنساۋلىعىن مەديتسينالىق كومەكتىڭ ساپاسىن جوعارىلاتۋ مەن قولجەتىمدىلىگىن قامتاماسىز ەتۋدىڭ نەگىزىندە نىعايتۋ, دەنساۋلىق كورسەتكىشىن جوسپارلى تۇردە الەمنىڭ 30 دامىعان ەلىنىڭ دەڭگەيىنە جەتكىزۋ ءۇشىن مەديتسينالىق كومەك كولەمى مەن قۇرىلىمىن اۋرۋ-سىقاۋ مەن حالىق سۇرانىسىنا ساي كەلتىرۋ تۇجىرىمدامانىڭ باستى ماقساتى بولىپ تابىلادى», - دەدى قالالىق دەنساۋلىق ساقتاۋ باسقارماسىنىڭ باسشىسى قامالجان نادىروۆ قوعامدىق تىڭداۋ بارىسىندا.
ونىڭ ايتۋىنشا, 2022 جىلعا قاراي ەلورداداعى بالا تۋ كورسەتكىشىن ارتتىرۋ مەن حالىقتىڭ ءومىر ءسۇرۋ ۇزاقتىعىن 72 جاسقا دەيىن جەتكىزۋ باعدارلامانىڭ نەگىزگى ماقساتتى ينديكاتورلارى بولىپ انىقتالعان.
«نەگىزگى ينديكاتورلارعا قول جەتكىزۋ ماقساتىندا ءبىز بىرقاتار فوكۋس ينديكاتوردى انىقتادىق. دالىرەك ايتقاندا, بۇل: قاناينالىم جۇيەسى اۋرۋلارىنان, قاتەرلى ىسىكتەردەن, جاراقاتتار مەن ۋلانۋلاردان بولاتىن ولىمدەر سانىن, سونداي-اق, انا مەن بالا ولىمدەرىن ازاايتۋ ينديكاتورلارى», - دەپ اتاپ ءوتتى ق. نادىروۆ.
كۇن سايىن ەلوردادا 70 بالا دۇنيەگە كەلىپ, 10 ادام ومىردەن وزادى, 400-دەن استام ادام اۋرۋحاناعا جاتقىزىلادى, 1500 تارتا ادام جەدەل جاردەم قىزمەتىن شاقىرادى. كۇن سايىن قالا ەمحانالارىنىڭ كومەگىنە 8,5 مىڭ ادام جۇگىنەدى. جەرگىلىكتى حيرۋرگتەر كۇن سايىن 120 اسا كۇردەلى وتا جاسايدى.
