جيىنعا كەڭەس مۇشەلەرى, ءماجىلىس دەپۋتاتتارى, مادەنيەت جانە سپورت مينيسترلىگىنىڭ وكىلدەرى مەن كاسىبي ساراپشىلار قاتىستى. ءىس-شارا بارىسىندا «قاسيەتتى قازاقستان» عىلىمي-زەرتتەۋ ورتالىعىنىڭ ديرەكتورى بەرىك ابدىعالي ۇلى قاسيەتتى ورىندار تۋرالى بايانداما جاسادى. ونىڭ ايتۋىنشا, قازاقستاننىڭ كيەلى مەكەندەرى ەرەكشەلىكتەرىنە وراي بولىنگەن. ماسەلەن, تابيعي تۇرعىدا قالىپتاسقان قاسيەتتى ورىندار دەربەس قاراستىرىلعان. ولاردىڭ قاتارىندا قوڭىر اۋليە ۇڭگىرى, حان ءتاڭىرى, شارىن شاتقالى سەكىلدى مەكەندەر بار. ارحەولوگيالىق ەسكەرتكىشتەر مەن ورتا عاسىرداعى شاھارلار كەلەسى بولىمگە ەنگەن. سونداي-اق ب.ابدىعالي ۇلى «قازاقستاننىڭ قاسيەتتى جەرلەرىنىڭ جالپىۇلتتىق جانە ايماقتىق ءتىزىمى» دەگەن كىتاپ جارىققا شىعاتىنىن مالىمدەدى.
«قازاقستاننىڭ قاسيەتتى جەرلەرىن بەكىتكەندە ولاردىڭ مارتەبەسىن ايقىنداۋ ارقىلى ەسكەرتكىشتەردى قورعاۋ جونىندەگى زاڭعا وزگەرىس ەنگىزۋدى كوزدەپ وتىرمىز. مادەني ەسكەرتكىشتەردى قورعاۋ تۋرالى زاڭعا «قاسيەتتى ورىندار» دەگەن تارماقتى قوسۋ جوسپاردا بار. وسىنداي قادام ارقىلى ءار مەكەننىڭ عىلىمي ءارى زاڭدى تۇردە انىقتاماسى بەرىلەدى. وسىلايشا, قازاقستانداعى قاسيەتتى ورىنداردىڭ مارتەبەسى زاڭدى تۇردە بەلگىلەنەدى», دەدى ب.ابدىعالي ۇلى.
سونىمەن قاتار ءىس-شارادا «قازاقستاننىڭ كيەلى جەرلەرىنىڭ گەوگرافياسى» جوباسىنىڭ ورىندالۋ بارىسى جونىندە مادەنيەت جانە سپورت مينيسترلىگى تاراپىنان اتقارىلىپ جاتقان جۇمىستار باياندالدى. وتىرىسقا قاتىسۋشىلار وسى توڭىرەكتە وي قوزعاپ, ءوز پىكىرلەرىمەن ءبولىستى.
اباي اسانكەلدى ۇلى,
«ەگەمەن قازاقستان»
