ەل تىلەگى ورىندالدى. پرەزيدەنت وسى جولدا بارىن سالدى. 1991 جىلدىڭ 17 جەلتوقسانىندا, ياعني تاۋەلسىزدىكتىڭ العاشقى كۇنىندە ءوز سوزىندە بىلاي دەدى: «كەڭ-بايتاق جەرىمىزدىڭ بايلىعى وسى دالانىڭ تۇپكىلىكتى حالقىنا دا, تاعدىر قوسىپ بىرگە ءومىر ءسۇرىپ جاتقان وزگە ۇلت وكىلدەرىنە دە مولىنان جەتەدى. نە ىستەسەك تە اقىلمەن ىستەيىك, ارزان ۇرانعا ەرمەيىك, ۇشپا سەزىمگە ەرىك بەرمەيىك دەگىم كەلەدى. اسىرەسە جاستار سالقىنقاندىلىقتان, ۇلكەندى سىيلاۋدان, سوزگە توقتاۋدان اينىماسا, قاشاندا دوستىققا ادال بولسا, باۋىرماشىل, كەڭپەيىل بولسا, حالىقتىڭ اتىنا ءسوز كەلتىرەتىن ۇستامسىزدىق اتاۋلىدان اۋلاق جۇرسە دەپ تىلەيىك». ەلباسىنىڭ وسى ۇندەۋى ارقىلى قازاقستان ساياسي تۇراقتىلىققا, تىنىش ومىرگە قول جەتكىزگەنىن جاستار ءبىلۋى كەرەك. بۇگىندە ەلىمىز الەمگە ادامزات مۇددەسى ءۇشىن ۇستامدىلىق تانىتىپ, بەيبىتشىلىككە قولداۋ بىلدىرۋدە ەرىكتى تۇردە ۇلگى بولىپ وتىر.
تاۋەلسىز حالقىنىڭ بەيبىت, تىنىش ءارى قولايلى ءومىر ءسۇرۋ جاعدايىن جاساعان تۇلعا عانا تاريحتا ەرەكشە اتالادى. سەمەي يادرولىق پوليگونىنىڭ جابىلۋى, شىعىستاعى قىتاي مەن باتىستاعى رەسەيمەن اراداعى شەكارا ماسەلەسىنىڭ شەشىمى تابىلىپ, ونىڭ كارتاسىنىڭ بۇۇ-عا تاپسىرىلۋى, جاڭا ەلوردا استانانىڭ بوي كوتەرۋى, الەمدىك جانە ءداستۇرلى دىندەر كوشباسشىلارىنىڭ استانادا وتكەن ءۇش قۇرىلتايى, ايگىلى ەكسپو-17 حالىقارالىق كورمەسىنىڭ استانادا تابىستى ءوتۋى, قازاقستان حالقى اسسامبلەياسىنىڭ كەلىسىم مەن تىنىشتىق ساقتاۋ قىزمەتى سياقتى تەڭدەسسىز تاريحي تابىستاردى ۇرپاقتان-ۇرپاققا جەتكىزۋ ءۇشىن تاۋەلسىزدىك كۇنى سياقتى مەملەكەتتىك مەرەكەنىڭ جالپىحالىقتىق سيپاتتا وتەتىنى اسا ماڭىزدى جەڭىسىمىز دەگىم كەلەدى.
اياگۇل ميرازوۆا,
قازاقستاننىڭ ەڭبەك ەرى
