كودەكس جوباسىمەن كەدەندىك باجدار, سالىقتار, ارنايى دەمپينگكە قارسى جانە وتەماقى باجدارى تۋرالى ەرەجەلەر, سونداي-اق كەدەن باجدارىن ەسەپتەۋ, تولەم جونىندەگى مىندەتتەمەلەردىڭ تۋىنداۋى مەن توقتاتىلۋى, كەدەن باجدارى مەن سالىقتاردى تولەۋ مەرزىمى, ولاردىڭ تولەۋ جانە ءوندىرۋ جونىندەگى مىندەتتەردىڭ ورىندالۋىن قامتاماسىز ەتۋ جونىندەگى ەرەجەلەر رەتتەلەدى.
زاڭ جوباسى ەاەو-نىڭ كەدەندىك اۋماعىنا تاۋاردىڭ كەلۋى مەن كەتۋىنە بايلانىستى كەدەندىك وپەراتسيالاردى جۇزەگە اسىرۋ, كەدەندىك دەكلاراتسيانى بەرۋ جانە شاقىرىپ الۋ, تاۋارلاردى شىعارۋ ءتارتىبىن رەتتەيدى. حالىقارالىق تاسىمال قۇرالى, حالىقارالىق پوشتا جونەلتىلىمدەرى, تۇربا قۇبىرلارى تاسىمالى جانە ەلەكتر جەلىلەرى ارقىلى بەرىلەتىن جانە وسى سەكىلدى باسقا دا تاۋارلاردى ەاەو كەدەندىك شەكاراسى ارقىلى وتكىزۋ ءتارتىبى مەن شارتتارىنىڭ ەرەكشەلىكتەرى بەلگىلەندى.
كودەكس اياسىندا دەكلاراتسيا بەرۋشىنى اكىمشىلىك جاۋاپكەرشىلىكتەن بوساتۋ جاعدايلارى ايقىندالىپ, كەدەندىك باقىلاۋ رەتتەلەدى, كەدەن ءىسى سالاسىنداعى جانە ەكونوميكالىق وپەراتورعا وكىلەتتى ادامداردىڭ قىزمەتىنە قاتىستى ەرەجەلەر ەنگىزىلەدى.
ودان باسقا, زاڭ جوباسى كەدەندىك رەتتەۋ سالاسىنداعى باسىمدىققا يە جاڭا باعىتتاردى, ونىڭ ىشىندە كەدەن ورگانىنا ءتيىستى قۇجاتتاردى بەرمەي-اق كەدەن دەكلاراتسياسىن ەلەكتروندىق نۇسقادا بەرۋ; كەدەندىك باجداردى اۆانستىق تولەمدەر ەنگىزۋ ارقىلى تولەۋ; مەملەكەتتىك ورگانداردىڭ ءوزارا اقپاراتتىق ءىس-قيمىلىنىڭ ء«بىر تەرەزە» تەتىگىن پايدالانۋ مۇمكىندىگىن كوزدەيدى.
سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كەدەندىك رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى دا ءبىرىنشى وقىلىمدا تالقىلادى.
جاڭا كەدەن كودەكسىنىڭ قابىلدانۋىنا بايلانىستى 35 زاڭعا تۇزەتۋ ەنگىزىلەدى. ونىڭ ىشىندە قىلمىستىق, كاسىپكەرلىك, ەكولوگيا جانە بيۋدجەت كودەكستەرى, «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس, اكىمشىلىك قۇقىق بۇزۋشىلىق تۋرالى كودەكس جانە «قازاقستان رەسپۋبليكاسىنداعى بانكتەر جانە بانك قىزمەتى تۋرالى», «وسىمدىكتەر كارانتينى تۋرالى», «اۆتوموبيل كولىگى تۋرالى», «تەحنيكالىق رەتتەۋ تۋرالى» جانە باسقا دا زاڭدارعا تۇزەتۋلەر ەنگىزىلەتىن بولدى.
زاڭ جوباسىمەن تاۋارلار شىعارۋ تۋرالى وتىنىشتە نەمەسە ۋاقىتشا اكەتىلگەن حالىقارالىق تاسىمالداۋ كولىك قۇرالدارىنا قاتىستى وپەراتسيالار جاساۋ تۋرالى وتىنىشتە كورىنەۋ انىق ەمەس مالىمەتتەر كورسەتىپ ەاەو كەدەن شەكاراسى ارقىلى ءىرى كولەمدەگى تاۋارلار وتكىزۋدى ەكونوميكالىق كونترابانداعا جاتقىزۋ بولىگىنە وزگەرىس ەنگىزىلەدى.
كەدەن وپەراتسيالارىن جاساۋ بارىسىندا رەسپۋبليكالىق بيۋدجەتكە جىبەرىلەتىن سالىق تۇسىمدەرىنىڭ تۇرلەرى, ونىڭ ىشىندە: ىشكى نارىقتى قورعاۋ شارالارىن قولدانۋعا بايلانىستى تولەنەتىن كەدەن باجدارى, كەدەن الىمدارى مەن ارنايى, دەمپينگكە قارسى جانە وتەماقى باجدارى, سونداي-اق الداعى تولەمدەردى تولەۋ ەسەبىنەن اۆانس تولەمدەرى ناقتىلانادى.
زاڭ جوباسىنىڭ اياسىندا بىرقاتار زاڭدارعا باسقا دا تۇزەتۋلەر ەنگىزىلەدى.
زاڭ جوبالارى پالاتانىڭ قاراۋىنا جىبەرىلدى.
