جارىستىڭ ۇيىمداستىرىلۋىنا مۇرىندىق بولعان «Marat#ON» جۇگىرۋ كلۋبىنىڭ قۇرمەتتى مۇشەسى, اتاقتى قازاقستاندىق ۋلترامارافونشى مارات جىلانباەۆ جارىستا 3 قاشىقتىق كوزدەلەتىنىن, ولار, كلاسسيكالىق مارافون – 42 كم 195 م, جارتىلاي مارافون – 21 كم جانە 10 كم-ءنى قۇرايتىنىن تىلگە تيەك ەتىپ, بايگەنىڭ ماقساتىمەن ءبولىستى.
«قىسقى جۇگىرۋدى ۇيىمداستىرۋ شەشىمى بۇقارالىق سپورتقا قازاقستاندىقتاردى مەيلىنشە مولىنان تارتۋمەن نەگىزدەلگەن, اشىق اۋا استىندا جىل بويى جاتتىعۋلارمەن اينالىسۋعا كەدەرگى ەمەستىگىن دالەلدەۋ. «Marat#ON» جۇگىرۋ كلۋبى 2016 جىلعى قاراشادان بەرى جۇمىس ىستەيدى, اي سايىن جاڭادان كەلگەندەر جۇگىرۋدىڭ قىر-سىرىن ۇيرەنىپ, سوڭىنان اۋەسقوي سپورتشىلار جاپپاي جۇگىرۋگە قاتىسادى. 10 كم اسا قاشىقتىققا قىسقى سايىستى ءبىز استانادا تۇڭعىش رەت ۇيىمداستىرامىز, تىركەۋ 12 جەلتوقساننان باستاپ 20 جەلتوقسانعا دەيىن جالعاسىپ, جارىستىڭ ءوزى 24 جەلتوقساندا استانانىڭ ترياتلون پاركى اۋماعىندا وتەدى. ءىس-شارا كوممەرتسيالىق ەمەس جانە كلۋب مۇشەلەرىنىڭ, دەمەۋشىلەر مەن سەرىكتەستەردىڭ قاراجاتىنا ۇيىمداستىرىلادى», دەدى اتاقتى مارافونشى.
«قازاقستان رەسپۋبليكاسى جەڭىل اتلەتيكا فەدەراتسياسى» اق ەرەكشە ماسەلەلەر بويىنشا كەڭەسشىسى وكسانا حاشاگۋلگوۆا 2017 جىلى قازاقستاندا استانا, الماتى, اتىراۋ, رۋدنىي, قاراعاندى قالالارىندا 6 مارافون ءىس-شارالارى ءوتىپ, ولارعا شامامەن 30 000 ادام قاتىسقانىن تىلگە تيەك ەتىپ, 2018 جىلى فەدەراتسيا مارافونعا قاتىسۋشىلاردىڭ سانىن ءۇش ەسەگە ارتتىرۋعا نيەتتى ەكەنىن جەتكىزدى.
مارە سىزىعىن العاشقى بولىپ كەسكەندەرگە مەدالدار, كۋبوكتار مەن باعالى سىيلىقتار تابىستالادى.
راۋان قايدار,
«ەگەمەن قازاقستان»
