ۇلى عۇلاما ءابۋ ناسىر ءال-فارابي بابامىزدىڭ «تاربيەسىز بەرىلگەن ءبىلىم – ادامزاتتىڭ قاس جاۋى» قاعيداسىن بەرىك ۇستاناتىن شىمكەنت قالاسىنداعى جوعارى جاڭا تەحنولوگيالار كوللەدجى ءاربىر جىلدى تاربيە تاقىرىبىنا ارناپ, ءتۇرلى ءىس-شارالار وتكىزۋدى داستۇرگە اينالدىرعان. اتاپ ايتساق, كوللەدجدە 2014 جىلدى «مادەنيەت جىلى» دەپ جاريالاپ, سونىڭ شەڭبەرىندە كوپتەگەن مادەني شارالار ۇيىمداستىرىلدى. تاريحتى تەرەڭنەن تانۋ, وتكەنىمىزدى زەردەلەپ, ۇرپاقتىڭ ساناسىنا ءسىڭىرۋ قاشاندا ماڭىزىن جويماعان ماسەلە. ء«وز تاريحىن بىلمەگەن ۇلتتىڭ بولاشاعى دا ب ۇلىڭعىر» تاقىرىبىندا ەلباسى باستاماسىمەن قازاق حاندىعىنىڭ 550 جىلدىق مەرەيتويىن مەملەكەتتىك دەڭگەيدە اتاپ ءوتۋ يدەياسىنا ساي, 2015 جىل كوللەدجدە «تاريح جىلى» بولىپ جاريالاندى. بۇل جىلى دا تاقىرىپقا ساي ماڭىزدى شارالار, ايماقتىق كونفەرەنتسيا, شىعارمالار بايقاۋى ۇيىمداستىرىلدى. جاستارعا ەستەتيكالىق, اسەمدىك, رۋحاني قۇندىلىقتاردى اقىن-جازۋشىلاردىڭ شىعارمالارى ارقىلى تاربيە بەرە وتىرىپ, ەلدىكتى, ۇلتتىق قۇندىلىقتاردى قاستەرلەۋگە, تۋعان ەلىن, ءتىلىن, ادەبيەتى مەن مادەنيەتىن سۇيۋگە, ولاردى كىتاپ وقۋعا, كوركەمسوز ونەرىنە باۋلۋ ماقساتىندا جانە ەل تاۋەلسىزدىگىنىڭ 25 جىلدىعىنا وراي, 2016 جىل كوللەدجدە «كىتاپ جىلى» بولىپ جاريالاندى. العاشقى ءىس-شارا م.اۋەزوۆتىڭ الەمگە ايگىلى «اباي جولى» رومان-ەپوپەياسىن ۇجىمدىق تالقىلاۋدان باستاۋ الدى. «كىتاپ جىلىندا» تاۋەلسىزدىگىمىزدىڭ 25 جىلدىعىنا ورايلاستىرىپ, كوللەدج ۇجىمىنىڭ ۇيلەستىرۋىمەن 25 مادەني ءىس-شارا ءوتتى.
ال, بيىلعى جىلداعى ءىس-شارالار رۋحاني جاڭعىرۋمەن تىكەلەي بايلانىستىرىلىپ وتىر. ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى – شيرەك عاسىردى ارتقا تاستاعان تاۋەلسىز قازاقستاننىڭ جاھاندانۋ داۋىرىندەگى رۋحاني كەڭىستىگىنىڭ جاڭا باستاۋى. ەلباسى نۇرسۇلتان نازارباەۆتىڭ بۇل ماقالاسى ەل دامۋىنىڭ جارقىن ۇلگىسى مەن ناقتى قادامدارىن كورسەتەتىن كەلەلى وي, ساليقالى پىكىر, باتىل شەشىمدەرگە قۇرىلعان ماڭىزدى قۇجات. «ۇلتتىق كود, ۇلتتىق مادەنيەت ساقتالماسا, ەشقانداي جاڭعىرۋ بولمايدى». ۇلتتىق جادىنى جاڭعىرتۋ رۋحاني قۇلدىقتان ارىلۋعا باستايدى. بۇل باعىتتا مەملەكەت باسشىسىنىڭ مەملەكەتتىك ءتىلدى لاتىن گرافيكاسىنا كوشىرۋدى جارلىقپەن بەكىتۋى تاۋەلسىز ەلىمىزدىڭ باقىتتى بولاشاعى مەن الاڭسىز كەلەشەگى ءۇشىن جاسالىپ جاتقان جۇمىس. بۇل قازاق ءتىلىنىڭ الەمدىك وركەنيەت كەڭىستىگىنە شىعۋىنا, جاڭا گەوساياسي جاعدايداعى ونىڭ قولدانىلۋ اياسىن كەڭەيتۋگە جانە عىلىمي-تەحنيكالىق پروگرەستە جەتىستىكتەرگە جەتۋگە ۇلكەن مۇمكىندىكتەر بەرەتىنىنە سەنىمدىمىز.
پرەزيدەنت: «جاڭعىرۋ اتاۋلى بۇرىنعىداي تاريحي تاجىريبە مەن ۇلتتىق داستۇرلەرگە شەكەدەن قاراماۋعا ءتيىس. كەرىسىنشە, زامانا سىنىنان سۇرىنبەي وتكەن وزىق داستۇرلەردى تابىستى جاڭعىرۋدىڭ ماڭىزدى العىشارتتارىنا اينالدىرا ءبىلۋ قاجەت. ەگەر جاڭعىرۋ ەلدىڭ ۇلتتىق-رۋحاني تامىرىنان ءنار الا الماسا, ول اداسۋعا باستايدى. سونىمەن بىرگە رۋحاني جاڭعىرۋ ۇلتتىق سانانىڭ ءتۇرلى پوليۋستەرىن قيىننان قيىستىرىپ, جاراستىرا الاتىن قۇدىرەتىمەن ماڭىزدى», دەپ رۋحاني جاڭعىرۋدىڭ نەگىزگى قىزمەتى مەن ەرەكشەلىكتەرىن اتاپ كورسەتتى. ەلباسىنىڭ رۋحاني جاڭعىرۋعا, ءبىلىم-عىلىمعا ماڭىز بەرۋى – ۇلكەن كورەگەندىك, ۇلتتىڭ العا ىلگەرىلەۋىن جىلدام قارقىنمەن جىلجىتاتىن قوزعاۋشى كۇش. بۇل رەتتە تۇڭعىش پرەزيدەنتىمىز تۇتاس قوعامنىڭ جانە ءاربىر قازاقستاندىقتىڭ ساناسىن جاڭعىرتۋدىڭ التى باعىتىن بەلگىلەپ بەردى. ولاردىڭ ءبارى بارىنشا وزەكتەندىرىلگەن جانە ۋاقىتتىڭ تالاپتارىنا ناقتى جاۋاپ بەرەدى. «ماڭگىلىك ەل» بولۋىمىز ءۇشىن بىزگە اۋاداي قاجەتتى قاسيەتتەر مەن قۇندىلىقتاردىڭ قاينارى توعىسىپ, اقىل-پاراساتى تولىسقان, عالامدىق عىلىمدى يگەرگەن ادامدار كوپ بولسا, ەلىمىز وركەنيەتتى, باسەكەگە قابىلەتتى بولاتىنى اقيقات.
قاناتبەك دوساليەۆ,
جوعارى جاڭا تەحنولوگيالار
كوللەدجىنىڭ ديرەكتورى
وڭتۇستىك قازاقستان وبلىسى
